ବାଲେଶ୍ୱର: ଫକୀରମୋହନ ସ୍ୱୟଂଶାସିତ ମହାବିଦ୍ୟାଳୟ ଛାତ୍ରୀ ସୌମ୍ୟାଶ୍ରୀ ବିଶିଙ୍କ ଦେହାନ୍ତ ପରେ ପ୍ରଥମ ଥର ପାଇଁ ଇଣ୍ଟରନାଲ କମ୍ପେ୍ଲନ କମିଟି ସଦସ୍ୟମାନେ ମଙ୍ଗଳବାର ଗଣମାଧ୍ୟମ ପ୍ରତିନିଧିଙ୍କୁ ପ୍ରତିକ୍ରିୟା ଦେଇଛନ୍ତି । କହିଛନ୍ତି , ତଦନ୍ତ ପରେ କମିଟିପକ୍ଷରୁ ଏଚଓଡି ସମୀର କୁମାର ସାହୁଙ୍କୁ ବଦଳି କରିବା ପାଇଁ ଅଧ୍ୟକ୍ଷ ଦିଲ୍ଲୀପ ଘୋଷଙ୍କୁ କୁହାଯାଇଥିବା ସେମାନେ କହିଛନ୍ତି । ଆଇସିସି ସଦସ୍ୟା ଡ. ମିନତି ସେଠୀ କହିଛନ୍ତି, ଗତ ମାସ ୩୦ ତାରିଖରେ ସୌମ୍ୟାଶ୍ରୀ ପରୀକ୍ଷା ପରୀକ୍ଷା ଦେବାରୁ ବଞ୍ଚିତ ଥିଲେ । ଏହା ପଛରେ ତାଙ୍କର କମ ଉପସ୍ଥାନ ପ୍ରମୁଖ କାରଣ ଥିଲା । ପରୀକ୍ଷା ଦେବାରୁ ବଞ୍ଚିତ ହେବା ପରେ ସୌମ୍ୟାଶ୍ରୀ ମାନସିକ ଓ ଶାରୀରିକ ନିର୍ଯାତନାର ଶିକାର ହୋଇଥିବା ଅଭିଯୋଗ କରିଥିଲେ । ଅଭିଯୋଗକ୍ରମେ ଚଳିତ ମାସ ୧ ତାରିଖରେ କଲେଜ ପକ୍ଷରୁ ଆଇସିସି ଗଠନ ହେବା ସହ ତଦନ୍ତ ପ୍ରକ୍ରିୟା ଆରମ୍ଭ ହୋଇଥିଲା । ସୌମ୍ୟାଶ୍ରୀଙ୍କ ଅଭିଯୋଗ ଥିଲା ଯେ, ସେ ଉଭୟ ମାନସିକ ଓ ଶାରୀରିକ ନିର୍ଯାତନାର ଶିକାର ହୋଇଛନ୍ତି । ତଦନ୍ତ ବେଳେ ଜଣାପଡିଥିଲା ଯେ ଏଚଓଡି ଜଣଙ୍କ ବିଭିନ୍ନ ଭୁଲ ପାଇଁ ଦଣ୍ଡିତ କରୁଥିଲେ ।
ସେହିଭଳି ସୌମ୍ୟାଶ୍ରୀଙ୍କୁ ଶାରୀରିକ ନିର୍ଯାତନା ଅଭିଯୋଗ ଉପରେ ସୂଚନା ଦେଇ ସେଠୀ କହିଥିଲେ, ବିଏଡର ୬୦ ଜଣ ଛାତ୍ରୀଙ୍କ ସହ ଆଲୋଚନା କରାଯାଇଥିଲା । ମାତ୍ର ସେମାନେ ସମସ୍ତେ ଏଭଳି ଅଭିଯୋଗକୁ ଖଣ୍ଡନ କରିଥିଲେ । ସୌମ୍ୟାଶ୍ରୀଙ୍କ ଅଭିଯୋଗ ଥିଲା ପଡିଆରେ ଆସିଲା ବେଳେ ଏଚଓଡି ତାଙ୍କୁ ଭେଟିଥିଲେ । ସନ୍ଦେହ ଥିବା କିଛି ବିଷୟ ଉପରେ ବୁଝାଇ ଦେବା ପାଇଁ ସୌମ୍ୟା କହିଥିଲେ । ଏଚଓଡି ଏଥିପାଇଁ ତାଙ୍କୁ ଫେଭର ମାଗିଥିଲେ । ସୌମ୍ୟା ଫେଭରମାନେ କଣ ପଚାରିଥିଲେ । ଏତେ ବଡ ପିଲା, ଫେଭର ମାନେ କଣ ବୁଝିପାରୁନ ବୋଲି ଏଚଓଡି ତାଙ୍କୁ କହିଥିବା ସୌମ୍ୟା ଅଭିଯୋଗ କରିଥିଲେ । ସୌମ୍ୟାଙ୍କ ଅଭିଯୋଗ ସତ ହୋଇପାରେ ମାତ୍ର ଏହାର କୌଣସି ପ୍ରମାଣ ସୌମ୍ୟାଙ୍କ ନିକଟରେ ନଥିଲା । ଏନେଇ ଏଚଓଡିଙ୍କ ପଚାରିଥିଲୁ ମାତ୍ର ସେ ଅସ୍ୱୀକାର କରିଥିଲେ । ଏହା ସତ୍ତ୍ୱେ ଆଇସିସି ଟିମ ଏଚଓଡିଙ୍କୁ ନିଜର ବ୍ୟବହାରରେ ପରିବର୍ତ୍ତନ ଆଣିବାକୁ କହିଥିଲେ । ସୂଚନା ଯୋଗ୍ୟ ଡ. ଜୟଶ୍ରୀ ମିଶ୍ର , ଡ. ମୌସୁମୀ ଦାସ ପଚ୍ଚନାୟକ, ଡ. ମିନତି ସେଠୀ ବନ୍ଦିତା ପରିଡା, ଗୋପମୁଦ୍ରା ମହାପାତ୍ରଙ୍କ ସମେତ ୩ ବରିଷ୍ଠ ଛାତ୍ରଛାତ୍ରୀ ରୋଜାଲିନ ମହାନ୍ତି, ଅନନ୍ୟା ମିଶ୍ର, ଚନ୍ଦ୍ରକାନ୍ତ ଦାସଙ୍କୁ ଆଇସିସିରେ ସ୍ଥାନିତ କରାଯାଇଥିଲା । ସୌମ୍ୟାଶ୍ରୀ ପାଠପଢା ସହିତ ବହୁ ପ୍ରତିଭାର ଅଧିକାରୀ ଥିଲେ ।
ପାଠ ପଢାରେ ଯେଭଳି ମେଧାବୀ ଥିଲେ, ଅଭିନୟ କ୍ଷେତ୍ରରେ ମଧ୍ୟ ବେଶ ଭଲ ଦକ୍ଷତା ଥିଲା । ଆତ୍ମ ସୁରକ୍ଷା କୌଶଳ ତାଲିମ ଶିବିରରେ ମାଷ୍ଟର ଟ୍ରେନର ଭାବେ ଛାତ୍ରୀମାନଙ୍କୁ ଶିକ୍ଷା ଦେଉଥିଲେ । ୨୦୨୩କେ ଯୁକ୍ତ ୨ କଳାରେ ଭୋଗରାଇ ମହିଳା ଉଚ୍ଚ ବିଦ୍ୟାଳୟରୁ ଟପ ୨ରେ ରହିବା ସହିତ ଭୋଗରାଇରୁ ତୃତୀୟ ସ୍ଥାନ ଅଧିକାର କରିଥିଲେ । ଏଥିପାଇଁ ବିଦ୍ୟାଳୟ ଏବଂ ବିଭିନ୍ନ ସାମାଜିକ ସଂଗଠନ ପକ୍ଷରୁ ତାଙ୍କୁ ସମ୍ମାନିତ କରାଯାଇଥିଲା ।
