ନୂଆଦିଲ୍ଲୀ: ମଧ୍ୟ ଏବଂ ଉତ୍ତର ଗାଜା ଉପରେ ଇସ୍ରାଏଲ ସେନାର ଆକ୍ରମଣରେ ୧୨ ଜଣ ଲୋକଙ୍କର ମୃତ୍ୟୁ ଘଟିଛି ।ଏହି ବିସ୍ଫୋରଣ ପାଇଁ ହଜାର ହଜାର ଲୋକ ସେମାନଙ୍କ ଘରେ ଫସି ରହିଛନ୍ତି । ପାଲେଷ୍ଟାଇନ ଅଧିକାରୀ ମାନେ ଏହି ବିଷୟରେ ସୂଚନା ଦେଇଛନ୍ତି । ଗୋଟିଏ ବର୍ଷ ଧରି ଜାରି ରହିଥିବା ଯୁଦ୍ଧରେ ୪୨ ହଜାରରୁ ଅଧିକ ଲୋକଙ୍କ ପ୍ରାଣହାନୀ ଘଟିଛି । ଏନେଇ ଗାଜା ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ, ରବିବାର ଠାରୁ ମଙ୍ଗଳବାର ପର୍ଯ୍ୟନ୍ତ ସେମାନେ ଜବାଲିଆରୁ ୪୦ ଟି ମତଦେହ ଏବଂ ଉତ୍ତାରାଞ୍ଚଳରୁ ୧୪ ଟି ମୃତଦେହ ଉଦ୍ଧାର କରିଛନ୍ତି । ମନ୍ତ୍ରଣାଳୟ କହିଛି ଯେ, ମୃତକଙ୍କ ସଂଖ୍ୟା ଅଧିକ ହୋଇପାରେ ।
କାରଣ ଅନେକ ମୃତଦେହ ଆବର୍ଜନା ତଳେ ଏବଂ ଦୁର୍ଗମ ଅଞ୍ଚଳରେ ପୋତି ହୋଇ ରହିଛନ୍ତି । ଏହି ସମୟରେ, ଇସ୍ରାଏଲର ସାମରିକ ମୁଖପାତ୍ର ରିୟର ଆଡମିରାଲ ଡାନିଏଲ ହଗାରୀ କହିଛନ୍ତି ଯେ, ହାମାସକୁ ପୁନର୍ଗଠନ ନକରିବା ପାଇଁ ଇସ୍ରାଏଲ୍ ସୈନ୍ୟବାହିନୀ ଜବାଲିଆରେ କାର୍ଯ୍ୟ କରୁଛନ୍ତି ଏବଂ ସେମାନେ ପ୍ରାୟ ୧୦୦ ଜଣ ଆତଙ୍କବାଦୀଙ୍କୁ ହତ୍ୟା କରିଛନ୍ତି ।
ହେଲେ ସେ ଏ ବାବଦରେ କୌଣସି ପ୍ରମାଣ ଦେଇନାହାଁନ୍ତି। ଇସ୍ରାଏଲ୍ କହିଛି ଯେ,ଏହା କେବଳ ଆତଙ୍କବାଦୀଙ୍କୁ ଟାର୍ଗେଟ କରୁଛି ଏବଂ ସାଧାରଣ ନାଗରିକଙ୍କ ମୃତ୍ୟୁରେ ହାମାସ ଦୋଷୀ। ଏକ ବର୍ଷ ପୂର୍ବେ ହାମାସ ନେତୃତ୍ୱାଧୀନ ଆତଙ୍କବାଦୀ ମାନେ ଇସ୍ରାଏଲର ସୁରକ୍ଷା ଉପରେ ହଠାତ୍ ଆକ୍ରମଣ କରିଥିଲେ । ଏଥିରେ ଅତି କମରେ ୧୨୦୦ ଜଣଙ୍କର ମୃତ୍ୟୁ ଘଟିଥିଲା । ଏହା ବ୍ୟତୀତ ଆତଙ୍କବାଦୀ ମାନେ ଅନ୍ୟ ୨୫୦ ଜଣଙ୍କୁ ଅପହରଣ କରି ନେଇଥିଲେ । ବର୍ତ୍ତମାନ ସୁଦ୍ଧା ସେମାନେ ଗାଜାରେ ଅତି କମରେ ୧୦୦ ଲୋକଙ୍କୁ ବନ୍ଧକ ରଖିଛନ୍ତି ।
