ଭୁବନେଶ୍ୱର: ଆଜି ବି କଲବଲ କରିବ ତାତି। ୮ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି କରାଯାଇଛି । କଳାହାଣ୍ଡି, ବଲାଙ୍ଗୀର,ସୋନପୁର, ବୌଦ୍ଧ, ଅନୁଗୁଳ, ସମ୍ବଲପୁର, ଝାରସୁଗୁଡା ଓ ଢେଙ୍କାନାଳ । ମାର୍ଚ୍ଚ ୩୦ରେ ବିଶେଷ କରି ୪ଟି ସ୍ଥାନ ଝାରସୁଗୁଡ଼ା, ସମ୍ୱଲପୁର, ବଲାଙ୍ଗୀର ଓ ଟିଟିଲାଗଡ଼ରେ ୪୩ ଡିଗ୍ରୀ ତାପମାତ୍ରା ଛୁଇଁପାରେ ବୋଲି ଆକଳନ କରିଛି ପାଣିପାଗ କେନ୍ଦ୍ର । ସେପଟେ ଖରା ପାଇଁ ଆସିଲା ଗାଇଡ୍ ଲାଇନ୍ । ଯାତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ମାର୍ଗଦର୍ଶିକା ଜାରି କରିଛି ପରିବହନ ବିଭାଗ । ଏନେଇ ଆରଟିଓ ଏବଂ ଏଆରଟିଓଙ୍କ ସହ ବୈଠକ କରି ଯାତ୍ରୀଙ୍କ ସୁରକ୍ଷା ପାଇଁ ପଦକ୍ଷେପ ନେବାକୁ ବିଭିନ୍ନ ଆଲୋଚନା ହୋଇଛି ।ଯାତ୍ରୀଙ୍କ ସୁରକ୍ଷା ପାଇଁ ସବୁ ବସରେ ରହିବ ପାନୀୟ ଜଳ ବ୍ୟବସ୍ଥା। ବରଫ ପ୍ୟାକ୍, ଓଆରଏସ ଓ ପ୍ରାଥମିକ ଚିକିତ୍ସା କିଟ୍ ରହିବ। ସାର୍ବଜନୀନ ଯାନରେ ଭିଡ଼ ରୋକିବାକୁ ନିଆଯିବ ପଦକ୍ଷେପ। ବସ୍ ଷ୍ଟପେଜରେ ରହିବ ଯାତ୍ରୀ ବିଶ୍ରାମ ସ୍ଥାନ। ଦିନ ୧୧ଟାରୁ ଅପରାହ୍ନ ୪ଟା ଯାଏ ବିଶେଷ ଧ୍ୟାନ ଦିଆଯିବ।
