ଉତ୍ତର ପ୍ରଦେଶ: ଉତ୍ତର ପ୍ରଦେଶର ମୁରାଦାବାଦରୁ ଏକ ବଡ ଅଗ୍ନିକାଣ୍ଡର ଖବର ସାମ୍ନାକୁ ଆସିଛି। ମୁରାଦାବାଦର କଟଘର ଥାନା ଅଞ୍ଚଳରେ ଏକ ତିନି ମହଲା ବିଶିଷ୍ଟ ରେଷ୍ଟୁରାଣ୍ଟରେ ଭୟଙ୍କର ଅଗ୍ନିକାଣ୍ଡ ଘଟିଛି। ଏହି ଆଗ୍ନିକାଣ୍ଡ ଘଟି ଜଣେ ମହିଳାଙ୍କର ମୃତ୍ୟୁ ଘଟିଥିବା ବେଳେ ପ୍ରାୟ ୧୦ ଜଣ ଆହତ ହୋଇଛନ୍ତି। ସ୍ଥାନୀୟ ବାସିନ୍ଦାଙ୍କ ସହାୟତାରେ ପୋଲିସ ଏବଂ ଅଗ୍ନିଶମ ବାହିନୀର କର୍ମଚାରୀମାନେ ନିଆଁରେ ଫସି ରହିଥିବା ପ୍ରାୟ ୧୨ ଜଣଙ୍କୁ ଉଦ୍ଧାର କରିଥିଲେ। କେତେକ ଲୋକ ନିଜ ଜୀବନ ବଞ୍ଚାଇ କୋଠାରୁ ଡେଇଁ ପଳାଇ ଯାଇଥିଲେ। ରେଷ୍ଟୁରାଣ୍ଟରେ ଗଚ୍ଛିତ ପାଞ୍ଚଟି ଗ୍ୟାସ ସିଲିଣ୍ଡର ବିସ୍ଫୋରଣ ହୋଇଥିଲା, ଯାହା ଫଳରେ ଭୟଙ୍କର ଅଗ୍ନିକାଣ୍ଡ ଘଟିଥିଲା ଏବଂ ସମଗ୍ର କୋଠା ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା।
ରବିବାର ରାତିରେ ଘଟିଥିବା ଏହି ଘଟଣାରେ ରେଷ୍ଟୁରାଣ୍ଟ ମାଲିକଙ୍କ ମାଆ ମାୟା ଶ୍ରୀବାସ୍ତବଙ୍କ ମୃତ୍ୟୁ ହୋଇଛି। ରେଷ୍ଟୁରାଣ୍ଟ ମାଲିକ ନିକଟରେ ଥିବା ଏକ ବିବାହ ଉତ୍ସବରେ ବାଣ ଫୁଟାଇବା ଯୋଗୁଁ ଅଗ୍ନିକାଣ୍ଡ ଘଟିଥିବା କହିଛନ୍ତି। ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲା। ଲୋକମାନଙ୍କୁ ସିଡ଼ି ବ୍ୟବହାର କରି ଉଦ୍ଧାର କରାଯାଇଥିଲା। ଘଟଣାସ୍ଥଳରେ ପହଞ୍ଚିଥିବା ଅଗ୍ନିଶମ ବାହିନୀ କଠିନ ପରିଶ୍ରମ ପରେ ଦୁଇ ଘଣ୍ଟା ମଧ୍ୟରେ ନିଆଁକୁ ନିୟନ୍ତ୍ରଣ କରିବାରେ ସଫଳ ହୋଇଥିଲା। ଆହତମାନଙ୍କୁ ପରେ ଡାକ୍ତରଖାନା ପଠାଯାଇଥିଲା। ପୋଲିସ ଅଗ୍ନିକାଣ୍ଡର କାରଣ ଏବଂ କ୍ଷୟକ୍ଷତିର ତଦନ୍ତ କରୁଛି।
ପୋଲିସ କହିଛି ଯେ ରେଷ୍ଟୁରାଣ୍ଟ ପାଖରେ ଏକ ବିବାହ କାର୍ଯ୍ୟକ୍ରମ ଚାଲିଥିଲା। ରାତି ପ୍ରାୟ ୧୦ଟା ସମୟରେ ବିବାହ ସମୟରେ ବାଣ ଫୁଟାଯାଇଥିଲା, ସେହି ସମୟରେ ଏକ ବାଣ ରେଷ୍ଟୁରାଣ୍ଟ ଭିତରେ ପଡ଼ି ନିଆଁ ଲାଗିଗଲା। ରେଷ୍ଟୁରାଣ୍ଟ ମାଲିକଙ୍କ ନାମ ପ୍ରଦୀପ ଶ୍ରୀବାସ୍ତବ। ପ୍ରେମ ୱାଣ୍ଡରଲ୍ୟାଣ୍ଡ ବ୍ରିଜ୍ ନିକଟରେ ତାଙ୍କର ଏକ ତିନି ମହଲା କୋଠା ଅଛି। ସେ ଦୁଇଟି ମହଲାରେ “ପରୀ” ନାମକ ଏକ ରେଷ୍ଟୁରାଣ୍ଟ ଚଳାନ୍ତି ଏବଂ ତାଙ୍କ ପରିବାର ତୃତୀୟ ମହଲାରେ ରୁହନ୍ତି।
