ନୂଆଦିଲ୍ଲୀ : ପୁଣି ବଢିଲା ରାହୁଲ ଗାନ୍ଧୀ ଓ ସୋନିଆ ଗାନ୍ଧୀଙ୍କ ଅଡୁଆ। ନ୍ୟାସସନାଲ ହେରାଲ୍ଡ ମାମଲାରେ ନୂଆ ଏଫ୍ଆଇଆର ରୁଜୁ। ମାମଲା ରୁଜୁ କଲା ଦିଲ୍ଲୀର ଅର୍ଥନୈତିକ ଅପରାଧ ଶାଖା। ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଏବଂ କଂଗ୍ରେସ ସଂସଦୀୟ ଦଳ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସହ ୬ ଜଣଙ୍କ ବିରୋଧରେ ମାମଲା ରୁଜୁ କରାଯାଇଛି। ୯୮୮ କୋଟି ଟଙ୍କାର ଦୁର୍ନୀତି ହୋଇଥିବା ଇଡି ଦାବି କରିଛି। ଅଭିଯୋଗ ହୋଇଛି ଯେ କଂଗ୍ରେସ ଦଳ ସହିତ ଜଡିତ ଏକ କମ୍ପାନୀ ଏଜେଏଲକୁ ଠକେଇ ଭାବରେ ନିଜ କବଜାକୁ ନେବା ପାଇଁ ଏକ ଅପରାଧିକ ଷଡଯନ୍ତ୍ର ରଚନା କରିଥିଲା।
ଇଡି ଏହାର ତଦନ୍ତ ରିପୋର୍ଟ ଦିଲ୍ଲୀ ପୋଲିସକୁ ପଠାଇଛି। ଦିଲ୍ଲୀ ପୋଲିସର ଅର୍ଥନୈତିକ ଅପରାଧ ଶାଖା ଦ୍ୱାରା ଦାୟର କରାଯାଇଥିବା ଏଫଆଇଆରରେ ସୋନିଆ ଗାନ୍ଧୀ, ରାହୁଲ ଗାନ୍ଧୀ, ଇଣ୍ଡିଆନ ଓଭରସିଜ୍ କଂଗ୍ରେସ ମୁଖ୍ୟ ସାମ ପିଟ୍ରୋଡା ଏବଂ ଅନ୍ୟ ତିନି ଜଣଙ୍କ ନାମ ଅଭିଯୁକ୍ତ ଭାବରେ ଉଲ୍ଲେଖ କରାଯାଇଛି। ଏଥିରେ ତିନୋଟି କମ୍ପାନୀ ଭାବେ ଏଜେଏଲ, ୟଙ୍ଗ ଇଣ୍ଡିଆନ୍ ଏବଂ ଡୋଟେକ୍ସ ମର୍ଚାଣ୍ଡାଇଜ୍ ପ୍ରାଇଭେଟ୍ ଲିମିଟେଡ୍ ମଧ୍ୟ ଅଭିଯୁକ୍ତ ଭାବରେ ଉଲ୍ଲେଖ କରାଯାଇଛି। କୋଲକାତାର ଏକ ସେଲ୍ କମ୍ପାନୀ ଡୋଟେକ୍ସ ମର୍ଚାଣ୍ଡାଇଜ୍ ପ୍ରାଇଭେଟ୍ ଲିମିଟେଡ୍, ୟଙ୍ଗ୍ ଇଣ୍ଡିଆନ୍କୁ ₹୧ କୋଟି ଦେଇଥିବା ଅଭିଯୋଗ ହୋଇଛି।
ଏହି କାରବାର କଂଗ୍ରେସକୁ ₹୫୦ ଲକ୍ଷ ଦେଇ ୟଙ୍ଗ୍ ଇଣ୍ଡିଆନ୍କୁ ପ୍ରାୟ ₹୨୦୦୦ କୋଟି ଟଙ୍କାର ସମ୍ପତ୍ତି ଥିବା ଏଜେଏଲ ଉପରେ ନିୟନ୍ତ୍ରଣ ହାସଲ କରିବାରେ ସାହାଯ୍ୟ କରିଥିଲା ବୋଲି ଅଭିଯୋଗ ହୋଇଛି। ରାଉଜ୍ ଆଭେନ୍ୟୁ କୋର୍ଟ ଗତ ଶନିବାର ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀଙ୍କ ସହ ଜଡିତ ଏହି ମାମଲାରେ ଚାର୍ଜସିଟ୍ ଉପରେ ନିଷ୍ପତ୍ତି ଦେବାକୁ ସ୍ଥିର କରାଯାଇଥିଲା, କିନ୍ତୁ ଏହାକୁ ସ୍ଥଗିତ ରଖାଯାଇଥିଲା। ପୂର୍ବ ଶୁଣାଣିରେ, କୋର୍ଟ ମାମଲା ଫାଇଲଗୁଡ଼ିକୁ ପୁନଃପରୀକ୍ଷଣ କରିବା ଆବଶ୍ୟକ ମନେ କରି ପ୍ରବର୍ତ୍ତନ ନିର୍ଦ୍ଦେଶାଳୟର ଚାର୍ଜସିଟ୍ ଉପରେ ତାଙ୍କର ନିର୍ଦ୍ଦେଶକୁ ସ୍ଥଗିତ ରଖିଥିଲେ । ବର୍ତ୍ତମାନ ଡିସେମ୍ବର ୧୬ ତାରିଖରେ ରାୟ ଘୋଷଣା କରାଯିବ।
