ସ୍କୁଲରେ ଫଳକ ପଡି ପଞ୍ଚମ ଶ୍ରେଣୀ ଛାତ୍ରର ମୃତ୍ୟୁ

ବାଲେଶ୍ବର: ସ୍କୁଲରେ ଫଳକ ଭାଙ୍ଗି ପଞ୍ଚମ ଶ୍ରେଣୀ ଛାତ୍ରର ମୃତ୍ୟୁ ଘଟିଛି। ସ୍କୁଲ ପରିସରରେ ଖେଳୁଥିବାବେଳେ ଫଳକ ଭାଙ୍ଗି ପଡିଥିଲା। ବାଲେଶ୍ବର ଜିଲା ବାଲିଆପାଳ ବ୍ଲକ ଅନ୍ତର୍ଗତ ବଡାସ ସରକାରୀ ପ୍ରାଥମିକ ବିଦ୍ୟାଳୟରେ ଘଟିଛି ଅଭାବନୀୟ ଘଟଣା। ମୃତକ ହେଲେ ଜାମକୁଣ୍ତା ପଞ୍ଚାୟତ କେନ୍ଦୁଆଡିହା ଗ୍ରାମର ସନାତନ ଧଳଙ୍କ ପୂଅ ପ୍ରହ୍ଲାଦ ଧଳ। ସୂଚନା ଅନୁଯାୟୀ ୩ ବର୍ଷ ପୂର୍ବରୁ ଏହି ବିଦ୍ୟାଳୟରେ ଏକ ନୂତନ କୋଠା ଘର ନିର୍ମାଣ ପାଇଁ ସୂଚନା ଫଳକ ଲଗାଇଥିଲେ ଠିକାଦାର। ଗତକାଲି ମଧ୍ୟାହ୍ନଭୋଜନ ବିରତି ସମୟରେ ଛାତ୍ରୀଛାତ୍ରମାନେ ଏହି ଫଳକ ନିକଟରେ ଖେଳୁଥିବା ବେଳେ ଫଳକଟି ଭାଙ୍ଗି ପଡି ପ୍ରହ୍ଲାଦଙ୍କ ଉପରେ ପଡିଯାଇଥିଲା। ପ୍ରଧାନଶିକ୍ଷକ ପିଲାଟିକୁ ସଙ୍ଗେ ସଙ୍ଗେ ବାଲିଆପାଳ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲେ। ମାତ୍ର ସନ୍ଧ୍ୟାରେ ଅବସ୍ଥା ଗୁରୁତର ହେବାରୁ ପରିବାର ଲୋକେ ବାଲେଶ୍ବର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରିଥିଲେ। ହେଲେ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ଯାହାକୁ ନେଇ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି ।