ନୂଆଦିଲ୍ଲୀ: ଦିଲ୍ଲୀର ଲାଲକିଲ୍ଲା ନିକଟରେ ଘଟିଥିବା କାର ବିସ୍ଫୋରଣ ଘଟଣାରେ ମଙ୍ଗଳବାର ଦିନ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ଚଢାଉ। ଅଲ୍ ଫଲାହ ବିଶ୍ୱବିଦ୍ୟାଳୟ ସମେତ ୨୫ଟି ସ୍ଥାନରେ ଚଢାଉ କରିଛି ଇଡି। ସୂତ୍ର ଅନୁଯାୟୀ, ସକାଳ ୫ଟାରୁ ଦିଲ୍ଲୀର ୨୫ଟି ସ୍ଥାନରେ ଏବଂ ଫରିଦାବାଦରେ ଅବସ୍ଥିତ ଅଲ୍ ଫଲାହ ବିଶ୍ୱବିଦ୍ୟାଳୟର ଓଖଲା କାର୍ଯ୍ୟାଳୟ ସମେତ ଅନେକ ସ୍ଥାନରେ ଚଢାଉ କରିଛି । ବର୍ତ୍ତମାନ ପର୍ଯ୍ୟନ୍ତ ଚଢାଉ ଜାରି ରହିଛି। ବିଶ୍ୱବିଦ୍ୟାଳୟର ପାଣ୍ଠିରେ ଅନିୟମିତତା ଏବଂ ସନ୍ଦେହଜନକ କାରବାର ଅଭିଯୋଗ ଆଧାରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏହା ଉଲ୍ଲେଖଯୋଗ୍ୟ ଯେ ଅଲ୍ ଫଲାହ ବିଶ୍ୱବିଦ୍ୟାଳୟ ଲାଲକିଲ୍ଲା ବୋମା ବିସ୍ଫୋରଣରେ ସମ୍ପୃକ୍ତ ବ୍ୟକ୍ତିବିଶେଷଙ୍କ ସହ ମଧ୍ୟ ଜଡିତ ଏବଂ ବିଭିନ୍ନ ଠକେଇର ଅଭିଯୁକ୍ତ। ଅଲ୍ ଫଲାହ ବିଶ୍ୱବିଦ୍ୟାଳୟ ହରିୟାଣାର ଫରିଦାବାଦ ଜିଲ୍ଲାରେ ଅବସ୍ଥିତ ଏକ ଘରୋଇ ବିଶ୍ୱବିଦ୍ୟାଳୟ, ଯାହା ଅଲ୍ ଫଲାହ ଚାରିଟେବଲ୍ ଟ୍ରଷ୍ଟ ଦ୍ୱାରା ପ୍ରତିଷ୍ଠିତ।
ଆପଣଙ୍କୁ ଜଣାଇ ଦେଉଛୁ ଯେ ଅଲ୍ ଫଲାହ ବିଶ୍ୱବିଦ୍ୟାଳୟର କୁଳପତି ଜାଭେଦ ଅହମ୍ମଦ ସିଦ୍ଦିକୀଙ୍କ ସାନ ଭାଇ ୫୦ ବର୍ଷୀୟ ହମୁଦ ଅହମ୍ମଦ ସିଦ୍ଦିକୀଙ୍କୁ ମଧ୍ୟପ୍ରଦେଶ ପୋଲିସ ରବିବାର ହାଇଦ୍ରାବାଦରୁ ଗିରଫ କରିଛି। ହାମୁଦଙ୍କ ବିରୋଧରେ କିଛି ବର୍ଷ ପୂର୍ବେ ମହୁ ସହରରେ ନିବେଶ ନାମରେ ଲୋକଙ୍କଠାରୁ ପ୍ରାୟ ୪୦ ଲକ୍ଷ ଟଙ୍କା ନେଇ ୨୦ ପ୍ରତିଶତ ସୁଧ ପ୍ରଲୋଭନ ଦେଖାଇବା ଅଭିଯୋଗ ରହିଛି। ଦୁଇ ବର୍ଷ କମ୍ପାନୀ ଚଳାଇବା ପରେ, ସେ ତୃତୀୟ ବର୍ଷରେ ତାଙ୍କ ପରିବାର ସହିତ ଫେରାର୍ ହୋଇଯାଇଥିଲେ। ଠକେଇର ତିନୋଟି ପୁରୁଣା ମାମଲାରେ ୧୦ ହଜାର ଟଙ୍କାର ପୁରସ୍କାର ମଧ୍ୟ ଘୋଷଣା କରାଯାଇଥିଲା। ତଥାପି, ପୋଲିସ କହିଛି ଯେ ଠକେଇର ଏହି ମାମଲା ସହିତ କୁଳପତି ଜାଭେଦ ଅହମ୍ମଦ ସିଦ୍ଦିକୀଙ୍କ କୌଣସି ସମ୍ପର୍କ ନାହିଁ।
