କଲେଜ ଛାତ୍ରୀ ଗଣଦୁଷ୍କର୍ମ ମାମଲା: ଆଉ ଜଣେ ଅଭିଯୁକ୍ତ ଗିରଫ

କଟକ: କଟକରେ ବହୁ ଚର୍ଚ୍ଚିତ କଲେଜ ଛାତ୍ରୀ ଗଣଦୁଷ୍କର୍ମ ଘଟଣାରେ ଆଉ ଜଣେ ଅଭିଯୁକ୍ତ ଗିରଫ ହୋଇଛି । ବିଶାଖପାଟଣାର ଏକ ଚା ଦୋକାନରୁ ସପ୍ତମ ଅଭିଯୁକ୍ତଙ୍କୁ ଧରିଲା ବାଦାମବାଡି ପୋଲିସ । ପରିଚୟ ଗୋପନ ରଖି ଏକ ଦୋକାନରେ କାମ କରୁଥିଲା ଅଭିଯୁକ୍ତ । ଘଟଣା ପରଠାରୁ ଗିରଫଦାରୀ ଭୟରେ ଫେରାର ଥିଲା । ଏହା ପୂର୍ବରୁ ଏହି ଘଟଣାରେ ଗିରଫ ହୋଇଛନ୍ତି ୬ ଜଣ ଅଭିଯୁକ୍ତ । ୫ ଓ ୬ ତାରିଖରେ ଗିରଫ ହୋଇଥିଲେ ୬ ଅଭିଯୁକ୍ତ । ଗଣଦୁଷ୍କର୍ମ ଭିଡିଓକୁ ଭାଇରେଲ କରିବା ନେଇ ପୋଲିସ ପାଖେ ଅଭିଯୋଗ ଥିଲା । ଘଟଣାର ତଦନ୍ତ କରି ପୋଲିସ ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି । ଅଭିଯୋଗ ଅନୁଯାୟୀ, କଟକର ଏକ କଲେଜରେ ପଢୁଥିବା ପୀଡ଼ିତା ଛାତ୍ରୀ ଜଣକ ସହର ଉପକଣ୍ଠ ଏକ ହଷ୍ଟେଲରେ ରହୁଛନ୍ତି । ବାଦାମବାଡି ଥାନା ଅଞ୍ଚଳର ଜଣେ ଯୁବକ ମଧ୍ୟ ସେହି କଲେଜରେ ପଢୁଛି । ଉଭୟଙ୍କ ମଧ୍ୟରେ ବନ୍ଧୁତ୍ୱ ପରେ ପ୍ରେମ ସମ୍ପର୍କ ଗଢିଉଠିଲା । ଯୁବକ ଜଣକ ଛାତ୍ରୀଙ୍କୁ ଭସାଣୀ ଦେଖିବା ପାଇଁ ସହରକୁ ଡାକିବା ପରେ କାଠଗଡା ସାହିରେ ଥିବା ଏକ ସାଇବର କାଫେକୁ ନେଇଥିଲା । ସେଠାରେ ପୀଡ଼ିତାଙ୍କ ସହ ଯୁବକ ଜଣକ ଜୋରଜବରଦସ୍ତ ଶାରୀରିକ ସମ୍ପର୍କ ରଖିଥିଲା । ଆଉ ଏହି ସମୟର ଦୃଶ୍ୟକୁ ଯୁବକର ଜଣେ ସାଙ୍ଗ ଲୁଚି କରି ମୋବାଇଲ ଫୋନରେ ରେକର୍ଡ କରିଥିଲା । ଏହାପରେ ଯୁବକ ଜଣକ ଛାତ୍ରୀଙ୍କୁ ଅନ୍ତରଙ୍ଗ ମୁହୂର୍ତ୍ତର ଭିଡିଓ ଦେଖାଇ ଭାଇରାଲ କରିଦେବେ ବୋଲି ଧମକାଇଇଥିଲା । ଏନେଇ ନଭେମ୍ବର ୪ ତାରିଖରେ ଏତଲା ହୋଇଥିଲା ।