ଜଳିଗଲା ବ୍ୟାଟେରୀ ସ୍କୁଟି: ଶିକ୍ଷକ ଆହତ

ଭଦ୍ରକ: ଜଳିଗଲା ବ୍ୟାଟେରୀ ସ୍କୁଟି । ଏଭଳି ଅଭାବନୀୟ ଘଟଣା ଘଟିଛି ଭଦ୍ରକ ଜିଲ୍ଲା ଧାମନଗର ବ୍ଲକ ସୋହଡ଼ା ଗାଁରେ। ଶିକ୍ଷକ ପରେଶ ସାହୁ ନିଜ ସ୍କୁଟି ଯୋଗେ ପଧାନୀ ପଞ୍ଚାୟତ କଇଥଡିହ ପ୍ରାଥମିକ ବିଦ୍ୟାଳୟକୁ ଆସିଥିଲେ । ସ୍କୁଲ ଛୁଟି ସମୟ ହେବାରୁ ଶିକ୍ଷକ ଘରକୁ ଫେରିବା ପାଇଁ ବାହାରିଥିଲେ । ସ୍କୁଲ ପରିସରରେ ରଖିଥିବା ସ୍କୁଟିକୁ ଷ୍ଟାର୍ଟ କରିଥିଲେ, ହେଲେ ହଠାତ୍‌ ଗାଡିର ବ୍ୟାଟେରୀ ଫାଟି ଯାଇଥିଲା । ଯାହାଫଳରେ ନିଆଁ ଛିଟ୍‌କି ଶିକ୍ଷକଙ୍କ ଦେହରେ ପଡିଥିଲା। ପରେ ସ୍ଥାନୀୟ ଲୋକ ଶିକ୍ଷକଙ୍କୁ ଉଦ୍ଧାର କରି ସ୍ଥାନୀୟରେ ଭର୍ତ୍ତି କରିଛନ୍ତି । ହେଲେ ସେତେବେଳକୁ ଶିକ୍ଷକଙ୍କ ଦେହ ଓ ମୁହଁର କିଛି ଅଂଶ ପୋଡିଯାଇଥିଲା । ସେପଟେ ସ୍କୁଲ ପରିସରରେ ନିଆଁ ଲାଗିଥିବା ଦେଖି ଘଟଣାସ୍ଥଳରେ ଉପସ୍ଥିତ ଥିବା ପିଲାଙ୍କୁ ସ୍ଥାନୀୟଲୋକେ ସୁରକ୍ଷିତ ସ୍ଥାନକୁ ଉଦ୍ଧାର କରାଯାଇଥିଲା ।