ରାଜ୍ୟ ସଙ୍ଗୀତକୁ ଅସମ୍ମାନ କଲେ ବିଜେପି-ବିଜେଡି ନେତା

ଭୁବନେଶ୍ୱର: ଆଜି ଉତ୍କଳ ଦିବସ । ପ୍ରତି ଓଡ଼ିଆଙ୍କ ପାଇଁ ଗର୍ବ ଓ ଗୌରବର ଦିନ । କିନ୍ତୁ ଆମ ରାଜ୍ୟର ସଙ୍ଗୀତ ‘ବନ୍ଦେ ଉତ୍କଳ ଜନନୀ’କୁ ମିଳୁନି ଉପଯୁକ୍ତ ମର୍ଯ୍ୟାଦା । ଏହି ସଙ୍ଗୀତକୁ ଗାନ କଲାବେଳେ ଶବ୍ଦର ଉଚ୍ଚାରଣ ତ୍ରୁଟିପୂର୍ଣ୍ଣ ରହୁଛି । ଗାଇବାର ଅବଧି ୨ ମିନିଟ୍‌ ୧୧ ସେକେଣ୍ଡ ରହିଛି । କିନ୍ତୁ କେତେବେଳେ ଗାନ କଲାବେଳେ ଅବଧି ବଢିଯାଉଛି, କେତେବେଳେ କମିଯାଉଛି । ସବୁଠୁ ବିଡମ୍ବନାର ବିଷୟ, ‘ବନ୍ଦେ ଉତ୍କଳ ଜନନୀ’ ଗାନ କଲାବେଳେ ଖୋଦ୍ ଜନପ୍ରତିନିଧିମାନେ ଏହାକୁ ଅମାନ୍ୟ କରୁଛନ୍ତି । କିଛି ଦିନ ତଳେ ଜଣେ ବିଧାୟକ ଏହି ରାଜ୍ୟ ସଙ୍ଗୀତ ଗାନ ବେଳେ ବସିରହିଥିଲେ । ସମସ୍ତେ ଛିଡ଼ା ହୋଇଥିବା ବେଳେ ବିଧାୟକ ନିଜ ସିଟ୍‌ରେ ବସି ରହିଥିଲେ । ଗତକାଲି ବଲାଙ୍ଗୀରର ଜଣେ ବିଜେଡି ନେତା ମଧ୍ୟ ରାଜ୍ୟ ସଙ୍ଗୀତକୁ ଅସମ୍ମାନ କରିଥିବା ଦେଖିବାକୁ ମିଳିଥିଲା । ବର୍ଷ ବର୍ଷ ଧରି କାନ୍ତ କବି ଲକ୍ଷ୍ମୀକାନ୍ତ ମହାପାତ୍ରଙ୍କ ରଚିତ ‘ବନ୍ଦେ ଉତ୍କଳ ଜନନୀ’କୁ ନେଇ ଏମିତି ସ୍ଥିତି ଲାଗିରହିଛି । ବିଧାୟକ ଜୟନାରାୟଣ ମିଶ୍ରଙ୍କ ଝିଅ ମଧ୍ୟ ରାଜ୍ୟ ସଂଗୀତ ଗାନ ବେଳେ ବସିରହିଛନ୍ତି । ଏବେ କିନ୍ତୁ ରାଜ୍ୟର ବିଭିନ୍ନ ସ୍ଥାନରେ ରାଜ୍ୟ ସଙ୍ଗୀତକୁ ଅସମ୍ମାନ କରାଯାଉଛି । ଉପଯୁକ୍ତ ମର୍ଯ୍ୟାଦା ମିଳୁନାହିଁ । ଏବେ ସମୟ ଆସିଛି, ଓଡ଼ିଶାବାସୀ ଜାଗ୍ରତ ହେବାର । ରାଜ୍ୟ ସଙ୍ଗୀତକୁ ଅସମ୍ମାନ କଲେ ଦଣ୍ଡବିଧାନର ବ୍ୟବସ୍ଥା ଥିଲେ ମଧ୍ୟ ଦଣ୍ଡବିଧାନ କରାଯାଉନାହିଁ ।