ପାଟନା: ଗ୍ରୀଷ୍ମ ଋତୁରେ, ତାପମାତ୍ରା ୪୦ ଡିଗ୍ରୀ ସେଲସିୟସକୁ ବୃଦ୍ଧି ପାଉଥିବା ବେଳେ, ବିହାରର କ୍ରୀଡା ମନ୍ତ୍ରୀ ଏବଂ ବିଜେପି ବିଧାୟକ ସୁରେନ୍ଦ୍ର ମେହେଟ୍ଟା ଗ୍ରାମବାସୀଙ୍କୁ କମ୍ବଳ ବଣ୍ଟନ କରିବା ପରେ ଅନଲାଇନରେ ପ୍ରତିକ୍ରିୟାର ଲହରୀ ଖେଳିଯାଇଛି। ବେଗୁସରାଇ ଜିଲ୍ଲାର ମନସୁରଚକ ବ୍ଲକ ଅନ୍ତର୍ଗତ ଅହିଆପୁର ଗାଁରେ ଏପ୍ରିଲ ୬ ତାରିଖରେ ଅନୁଷ୍ଠିତ ଏହି କାର୍ଯ୍ୟକ୍ରମ ଭାରତୀୟ ଜନତା ପାର୍ଟିର ୪୫ତମ ପ୍ରତିଷ୍ଠା ଦିବସ ପାଳନର ଏକ ଅଂଶ ଥିଲା। ରିପୋର୍ଟ ଅନୁଯାୟୀ, ୭୦୦ ରୁ ଅଧିକ ଲୋକ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ଉତ୍ତର ଭାରତରେ ଏପ୍ରିଲର ପ୍ରବଳ ଗରମ ସତ୍ତ୍ୱେ, ମେହେଟ୍ଟା କମ୍ବଳ ବଣ୍ଟନ କରିଥିଲେ। ସମାରୋହର ଫଟୋ ଏବଂ ଭିଡିଓ ଭାଇରାଲ ହେବାପରେ, ବର୍ତ୍ତମାନ ଏହି ପଦକ୍ଷେପ ସୋସିଆଲ ମିଡିଆରେ ହଇଚଇ ସୃଷ୍ଟି କରିଛି।
ବିହାରର ଅଧିକାଂଶ ଅଞ୍ଚଳ ଗରମ ପ୍ରବାହ ସହିତ ଜଡ଼ିତ ହେଉଥିବା ସମୟରେ କମ୍ବଳ ବଣ୍ଟନକୁ ନେଇ ଅନେକ ଉପଭୋକ୍ତା ପ୍ରଶ୍ନ ଉଠାଇଛନ୍ତି। ଏକ ପ୍ରତୀକାତ୍ମକ ସମ୍ମାନ ସ୍ୱରୂପ ଏହି କାର୍ଯ୍ୟପନ୍ଥା ମିମ୍ସ, ବ୍ୟଙ୍ଗାତ୍ମକ ମନ୍ତବ୍ୟ ଏବଂ ରାଜନୈତିକ ସମାଲୋଚନାର ବିଷୟ ପାଲଟିଛି। ତ୍ରିପୁରା କଂଗ୍ରେସ ସମ୍ପାଦକ ସଞ୍ଜିବ ଭଟ୍ଟାଚାର୍ଯ୍ୟ ଏହି ଘଟଣାର ଏକ କ୍ଲିପ୍ ଏକ୍ସ(ପୂର୍ବରୁ ଟ୍ୱିଟର) ରେ ସେୟାର କରି ଲେଖିଛନ୍ତି, “ବିହାରର ଯୁବପିଢ଼ିଙ୍କ ପାଇଁ କଂଗ୍ରେସ ଦଳ ‘ପ୍ରବାସ ବନ୍ଦ କର, ଚାକିରି ଦିଅ’ ଅଭିଯାନ ଆରମ୍ଭ କରିବା ମାତ୍ରେ, ଏହା ରାଜ୍ୟର ବିଜେପି ନେତାମାନଙ୍କ ମଧ୍ୟରେ ଏକ ଅଶାନ୍ତି ସୃଷ୍ଟି କରିଥିଲା। ଏତେ ମାତ୍ରାରେ ପ୍ରଭାବ ପକାଇଲା ଯେ, ପ୍ରଚଣ୍ଡ ଗ୍ରୀଷ୍ମ ଋତୁ ମଧ୍ୟରେ ବିହାରର କ୍ରୀଡ଼ା ମନ୍ତ୍ରୀ ସୁରେନ୍ଦ୍ର ମେହେଟା ଶୀଘ୍ର ଏକ ‘କମ୍ବଳ ବଣ୍ଟନ’ ଯୋଜନା ଆରମ୍ଭ କଲେ ।”
ଏକ ସୁସଜ୍ଜିତ ମଞ୍ଚରୁ ସମାବେଶକୁ ସମ୍ବୋଧିତ କରି, ମେହତା ଏହି ବଣ୍ଟନକୁ ଲୋକଙ୍କ ପ୍ରତି କୃତଜ୍ଞତା ଏବଂ ସମ୍ମାନର ଏକ ନିଦର୍ଶନ ବୋଲି ବର୍ଣ୍ଣନା କରିଥିଲେ। କାର୍ଯ୍ୟକ୍ରମ ପରେ ଏକ ଫେସବୁକ୍ ପୋଷ୍ଟରେ ଲେଖିଥିଲେ, “ଗରୀବଙ୍କ ଉନ୍ନତି ଏବଂ ରାଷ୍ଟ୍ର ନିର୍ମାଣ ପାଇଁ ପ୍ରତିବଦ୍ଧ ବିଶ୍ୱର ସର୍ବବୃହତ ଦଳର ୪୫ତମ ପ୍ରତିଷ୍ଠା ଦିବସରେ, ଆମେ ଅଙ୍ଗ ବସ୍ତ୍ର ପ୍ରଦାନ କରି ଅହିଆପୁରରେ ଲୋକମାନଙ୍କୁ ସମ୍ମାନିତ କରିଛୁ। ଜୟ ବିଜେପି, ଜୟ ଭାରତ ମାତା।” ଯାହାକୁ ପରେ ଡିଲିଟ କରାଯାଇଥିଲା।
ମନ୍ତ୍ରୀ ସମାଲୋଚନାର ସିଧାସଳଖ ଉତ୍ତର ଦେଇ ନଥିଲେ ମଧ୍ୟ, ମନ୍ତ୍ରୀଙ୍କ ଏଭଳି ପଦକ୍ଷେପ ସମୟ, ପ୍ରତୀକାତ୍ମକତା ଏବଂ ରାଜନୈତିକ ବାର୍ତ୍ତା ବିଷୟରେ ଏକ ବ୍ୟାପକ ଆଲୋଚନା ଆରମ୍ଭ କରିଛି। ଏହି କାର୍ଯ୍ୟକ୍ରମ ବିହାର ବିଧାନସଭା ନିର୍ବାଚନ ପୂର୍ବରୁ ଆୟୋଜିତ କରି, ନୀତିଶ କୁମାରଙ୍କ ଜନତା ଦଳ (ୟୁନାଇଟେଡ୍) ସହିତ ମେଣ୍ଟ କରି ବିଜେପି ନିଜର ରାଜନୈତିକ କ୍ଷେତ୍ରକୁ ରକ୍ଷା କରିବାକୁ ପ୍ରସ୍ତୁତ ହେଉଛି।
