ବିହାର: ରୋହତାସରେ ରାହୁଲ ଗାନ୍ଧୀଙ୍କ ଉପରେ ବର୍ଷିଲେ ଅମିତ ଶାହ। କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଭୋଟର ଅଧିକାର ଯାତ୍ରା ବିଷୟରେ ଉଲ୍ଲେଖ କରି ଶାହ ରହୂଲଲ ଗାନ୍ଧୀଙ୍କ ଉପରେ ବର୍ଷିଛନ୍ତି। ସେ ଲୋକମାନଙ୍କୁ ଚେତାବନୀ ଦେଇଛନ୍ତି ଯେ ଯଦି ବିରୋଧୀ ମେଣ୍ଟ କ୍ଷମତାକୁ ଆସେ, ତେବେ ରାଜ୍ୟ “ଅନୁପ୍ରବେଶକାରୀଙ୍କ ଦ୍ୱାରା ପରିପୂର୍ଣ୍ଣ” ହୋଇଯିବ। ବିହାର ରାଜ୍ୟ ବିଧାନସଭା ନିର୍ବାଚନ ପୂର୍ବରୁ, ରାଜ୍ୟ ରାଜଧାନୀରୁ ପ୍ରାୟ ୫୦ କିଲୋମିଟର ଦୂରରେ ଦଳୀୟ କର୍ମୀଙ୍କ ଏକ ସମ୍ମିଳନୀରେ ଅମିତ ଶାହ ଉଦବୋଧନ ଦେଉଥିଲେ। କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ “ଭୋଟର ଅଧିକାର ଯାତ୍ରା” ବିଷୟରେ ଉଲ୍ଲେଖ କରି ଶାହ ଅଭିଯୋଗ କରିଥିଲେ, “ଆପଣମାନେ (ବିଜେପି କର୍ମୀମାନେ) ଜାଣନ୍ତି ଏହାର ଉଦ୍ଦେଶ୍ୟ କ’ଣ? ଏହାର ଉଦ୍ଦେଶ୍ୟ ଥିଲା ବାଂଲାଦେଶରୁ ଅନୁପ୍ରବେଶକାରୀଙ୍କୁ ସୁରକ୍ଷା ଦେବା।”
“ଆପଣମାନେ ରାଜ୍ୟ ସାରା ଯିବା ଉଚିତ, ପ୍ରତ୍ୟେକ ଘରକୁ ଯାଇ ଲୋକଙ୍କୁ କହିବା ଉଚିତ ଯେ ଯଦି ସେମାନେ (ବିରୋଧୀ ମେଣ୍ଟ) କ୍ଷମତାକୁ ଆସନ୍ତି, ତେବେ ବିହାରର ପ୍ରତ୍ୟେକ ଜିଲ୍ଲା ଅନୁପ୍ରବେଶକାରୀଙ୍କ ଦ୍ୱାରା ପରିପୂର୍ଣ୍ଣ ହୋଇଯିବ,” ଶାହ କହିଛନ୍ତି। ସେ ଗାନ୍ଧୀଙ୍କ ଭୋଟ ଚୋରି ଅଭିଯୋଗକୁ “ମିଥ୍ୟା କାହାଣୀ” ବୋଲି ମଧ୍ୟ ଅଭିହିତ କରିଥିଲେ ଏବଂ କହିଥିଲେ, “ସେମାନେ (କଂଗ୍ରେସ ନେତାମାନେ) ପୂର୍ବରୁ ସମାନ ରଣନୀତି ଗ୍ରହଣ କରିଥିଲେ ଯେତେବେଳେ ସେମାନେ ଅଭିଯୋଗ କରିଥିଲେ ଯେ ଆମେ ଅନୁସୂଚିତ ଜାତି ଏବଂ ଜନଜାତି ପାଇଁ ସଂରକ୍ଷଣ ସମାପ୍ତ କରିବାକୁ ଚାହୁଁଛୁ, ଯେତେବେଳେ ଏପରି କିଛି ହୋଇନଥିଲା।”
କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଦାବି କରିଛନ୍ତି ଯେ ଏନଡିଏ ଯେତେ ଶକ୍ତିଶାଳୀ ହେବ, ବିହାର ସେତେ ସମୃଦ୍ଧ ହେବ। ସେ କହିଛନ୍ତି ଯେ ଲାଲୁ ଯାଦବ, ରାବରୀ ଦେବୀ ଏବଂ ତେଜସ୍ୱୀ ଯାଦବ ବିହାରର ବିକାଶ କରିପାରିବେ ନାହିଁ। ଏକ କର୍ମୀ ସମାବେଶକୁ ସମ୍ବୋଧିତ କରି ଅମିତ ଶାହ କହିଛନ୍ତି ଯେ ଅନ୍ୟ ଦଳରେ ନେତାମାନେ ନିର୍ବାଚନ ଜିତିଥାନ୍ତି, କିନ୍ତୁ ବିଜେପି ଏପରି ଏକ ଦଳ ଯେଉଁଠାରେ କର୍ମୀମାନେ ନିର୍ବାଚନ ଜିତିଥାନ୍ତି। ସେ କହିଛନ୍ତି ଯେ ବିହାରର ଲୋକମାନେ ଆରଜେଡି ଏବଂ ଏହାର ସହଯୋଗୀ ଦଳଗୁଡ଼ିକୁ ସରକାର ଚଳାଇବାର ସୁଯୋଗ ଦେଇଥିଲେ, କିନ୍ତୁ ସେଠାରେ ଅପହରଣ ଏବଂ ହତ୍ୟା ଭଳି ଘଟଣା ଘଟିବା ଆରମ୍ଭ ହୋଇଥିଲା।
ସେ ଏହି ଅଞ୍ଚଳର ୮୦ ପ୍ରତିଶତ ଆସନରେ ଏନଡିଏ ପ୍ରାର୍ଥୀଙ୍କ ବିଜୟ ସୁନିଶ୍ଚିତ କରିବା ପାଇଁ ଦଳୀୟ କର୍ମୀମାନଙ୍କୁ ନିବେଦନ କରିଥିଲେ। ସେ ଲୋକମାନଙ୍କୁ ପଚାରିଥିଲେ ଯେ ଅନୁପ୍ରବେଶକାରୀଙ୍କୁ ଭୋଟ ଦେବାର ଅଧିକାର ରହିବା ଉଚିତ କି ନାହିଁ, ସେମାନଙ୍କୁ ରାସନ କାର୍ଡ କିମ୍ବା ଆୟୁଷ୍ମାନ କାର୍ଡ ମିଳିବା ଉଚିତ କି ନାହିଁ। ସେ ଦଳୀୟ କର୍ମୀମାନଙ୍କୁ ବିହାର ପାଇଁ ନୀତିଶ କୁମାରଙ୍କ ସରକାର କରିଥିବା କାର୍ଯ୍ୟ ବିଷୟରେ ପ୍ରତ୍ୟେକ ଘରେ ସୂଚନା ପ୍ରସାର କରିବାକୁ ଆହ୍ୱାନ କରିଥିଲେ।
