ୱାଶିଂଟନ: ଆମେରିକାର ଡୋନାଲ୍ଡ ଟ୍ରମ୍ପ ପ୍ରଶାସନ ପ୍ରବାସ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ପ୍ରତିଦିନ ନୂଆ ନିଷ୍ପତ୍ତି ନେଉଛି। ୨୦ ଜାନୁଆରୀ, ୨୦୨୫ରେ ପୁନର୍ବାର ରାଷ୍ଟ୍ରପତି ଭାବରେ ଶପଥ ନେବା ପରଠାରୁ, ଡୋନାଲ୍ଡ ଟ୍ରମ୍ପ ଆମେରିକାରେ ପ୍ରବାସ ବ୍ୟବସ୍ଥାକୁ ସୁଦୃଢ଼ କରିବା ପାଇଁ କାର୍ଯ୍ୟ କରିଆସୁଛନ୍ତି। କିନ୍ତୁ ତାଙ୍କର ଏହି ପଦକ୍ଷେପ ଆମେରିକାରେ ରହୁଥିବା ଗ୍ରୀନ କାର୍ଡ ଧାରକ ଏବଂ ଏଚ୍ – ୧ବି ଭିସା ଧାରକଙ୍କୁ ପ୍ରଭାବିତ କରୁଛି। ବିଶେଷକରି ଯେତେବେଳେ ସେ ବିଦେଶ ଯାତ୍ରାରେ ଯାଆନ୍ତି, ତାଙ୍କୁ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ। ଏପରି ପରିସ୍ଥିତିରେ, ଏବେ ପ୍ରଶ୍ନ ଉଠୁଛି ଯେ ଏହାର ଭାରତୀୟମାନଙ୍କ ଉପରେ କ’ଣ ପ୍ରଭାବ ପଡ଼ିବ।
ନ୍ୟୁୟର୍କ ସହରରେ ରହୁଥିବା ଭାରତୀୟ ବଂଶୋଦ୍ଭବ ଓକିଲ ନରେଶ ଗେହି ଗଣମାଧ୍ୟମକୁ କହିଛନ୍ତି, “ଟ୍ରମ୍ଫ ପ୍ରଶାସନ ଆମେରିକୀୟ ନ୍ୟାୟିକ ବ୍ୟବସ୍ଥାକୁ ଅଣଦେଖା କରି ଦେଶର ଆଇନକୁ ନିଜ ହାତରେ ନେଉଛି।” ସେ ଆହୁରି କହିଛନ୍ତି ଯେ ଆମେରିକାରେ ଗ୍ରୀନ କାର୍ଡଧାରୀ ଅନେକ ଭାରତୀୟ ବୃତ୍ତିଗତ ରିପୋର୍ଟ କରିଛନ୍ତି ଯେ ସେମାନଙ୍କୁ ପ୍ରାୟତଃ ଅତ୍ୟଧିକ ପଚରାଉଚରା କରାଯାଉଛି। ସେହି ସମୟରେ, ପ୍ରବାସନ ଓକିଲମାନେ ଗୁରୁତ୍ୱାରୋପ କରିଥିଲେ ଯେ, “ଆମେରିକାରେ ବୈଧ ପ୍ରବାସୀମାନେ ବନ୍ଦର ଦେଇ ପ୍ରବେଶ ସମୟରେ କଠୋର ଯାଞ୍ଚ ଏବଂ ଚାପର ସମ୍ମୁଖୀନ ହେଉଛନ୍ତି। ଟ୍ରମ୍ପ ପ୍ରଶାସନ ଜାତୀୟ ସୁରକ୍ଷା ଏବଂ ସୀମା ନିୟନ୍ତ୍ରଣ ଉପରେ ଧ୍ୟାନ ଦେବା ସହିତ ବିଦ୍ୟମାନ ପ୍ରବାସନ ଆଇନର ପାଳନ ସୁନିଶ୍ଚିତ କରିବାକୁ ପ୍ରତିଶ୍ରୁତି ଦେଇଛି।”
“ଡୋନାଲ୍ଡ ଟ୍ରମ୍ପ ପ୍ରଶାସନ ଦେଶରେ ପ୍ରବାସ ଆଇନକୁ ଜୋରଦାର ଭାବରେ କାର୍ଯ୍ୟକାରୀ କରୁଛି, ଯାହା ପୂର୍ବ ପ୍ରଶାସନ କରିବାରେ ବିଫଳ ହୋଇଥିଲା,” ଗୃହ ସୁରକ୍ଷା ବିଭାଗର ସହାୟକ ସଚିବ ଟ୍ରିସିଆ ମ୍ୟାକଲାଫଲିନ୍ ନ୍ୟୁଜୱିକ୍କୁ କହିଛନ୍ତି। ସେ କହିଛନ୍ତି, “ଯେଉଁମାନେ ଏହି ପ୍ରବାସନ ଆଇନ ଉଲ୍ଲଂଘନ କରିବେ ସେମାନଙ୍କ ବିରୁଦ୍ଧରେ ମାମଲା ରୁଜୁ କରାଯିବ, ଅଟକ ରଖାଯିବ ଏବଂ ଆବଶ୍ୟକ ହେଲେ ଦେଶରୁ ନିର୍ବାସିତ କରାଯିବ।” ଆମେରିକାର ଉପରାଷ୍ଟ୍ରପତି ଜେଡି ଭାନ୍ସ ଫକ୍ସ ନ୍ୟୁଜ୍ ସହିତ ଏକ ସାକ୍ଷାତକାର ସମୟରେ ପୂର୍ବରୁ କହିଥିଲେ, “ଗ୍ରୀନ କାର୍ଡ ଧାରକଙ୍କୁ ଅନିର୍ଦ୍ଦିଷ୍ଟ କାଳ ପାଇଁ ଆମେରିକାରେ ରହିବାର ଅଧିକାର ଦିଏ ନାହିଁ।”
