ନୂଆଦିଲ୍ଲୀ: ଯମୁନା ଏକ୍ସପ୍ରେସ୍ୱେରେ ଘଟିଥିବା ସିରିଜ୍ ଦୁର୍ଘଟଣାରେ ମୃତ୍ୟୁ ସଂଖ୍ୟା ୧୩କୁ ବୃଦ୍ଧି ପାଇଛି । ଆଜି ଭୋର ସମୟରେ ମଥୁରା ଜିଲ୍ଲାର ଯମୁନା ଏକ୍ସପ୍ରେସ୍ୱେରେ ୭ଟି ବସ୍ ଏବଂ ୩ଟି କାର୍ ଧକ୍କା ହୋଇ ଭୟଙ୍କର ଅଗ୍ନିକାଣ୍ଡ ଘଟିଥିଲା । ଏଦୁର୍ଘଟଣା ପରେ ମୃତ୍ୟୁ ସଂଖ୍ୟା ୪ ରେକର୍ଡ କରାଯାଇଥିଲା । ବର୍ତ୍ତମାନ ମୃତ୍ୟୁ ସଂଖ୍ୟା ବୃଦ୍ଧି ପାଇ ୧୩ରେ ପହଞ୍ଚିଛି । ସେଥି ମଧ୍ୟରୁ ଏପର୍ଯ୍ୟନ୍ତ କେବଳ ଦୁଇଜଣଙ୍କୁ ଚିହ୍ନଟ କରାଯାଇପାରିଛି। ମୃତକଙ୍କ ନାମ ପ୍ରୟାଗରାଜର ବାସିନ୍ଦା ଅଖିଳେନ୍ଦ୍ର ପ୍ରତାପ ଯାଦବ (୪୪) ଏବଂ ମହାରାଜଗଞ୍ଜ ଜିଲ୍ଲାର ବାସିନ୍ଦା ରାମପାଲ (୭୫)। ଆଗକୁ ମୃତ୍ୟୁ ସଂଖ୍ୟା ଆହୁରି ବୃଦ୍ଧି ପାଇବାର ଆଶଙ୍କା କରାଯାଉଛି । ଘନ କୁହୁଡି ଯୋଗୁଁ ବଳଦେବ ପୋଲିସ ଷ୍ଟେସନ ଅଞ୍ଚଳରେ ସକାଳ ପ୍ରାୟ ୪:୦୦ଟା ସମୟରେ ଏହି ସିରିଜ୍ ଦୁର୍ଘଟଣା ଘଟିଥିଲା । ଏହି ଦୁର୍ଘଟଣାରେ ଅନେକ ଆହତ ବର୍ତ୍ତମାନ ଚିକିତ୍ସାଧୀନ ଅବସ୍ଥାରେ ଅଛନ୍ତି ।
ଆହତମାନଙ୍କ ମଧ୍ୟରୁ ୧୫ ଜଣଙ୍କୁ ଜିଲ୍ଲା ହସ୍ପିଟାଲରେ, ୯ ଜଣଙ୍କୁ ବଳଦେବ କମ୍ୟୁନିଟି ହେଲ୍ଥ ସେଣ୍ଟରରେ, ୯ ଜଣଙ୍କୁ ଏକ ଘରୋଇ ହସ୍ପିଟାଲରେ ଏବଂ ୨ ଜଣଙ୍କୁ ଆଗ୍ରାର ଏସଏନ ମେଡିକାଲ କଲେଜରେ ଭର୍ତ୍ତି କରାଯାଇଛି। ଏହି ଘଟଣାରେ ଦୁଃଖ ପ୍ରକାଶ କରି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ ଜୀବନହାନି “ଅତ୍ୟନ୍ତ ଦୁଃଖଦ ଏବଂ ହୃଦୟବିଦାରକ”। ଏକ୍ସରେ ଏକ ପୋଷ୍ଟରେ, ସେ ଶୋକସନ୍ତପ୍ତ ପରିବାର ପ୍ରତି ସମବେଦନା ଜଣାଇଛନ୍ତି ଏବଂ ଆହତମାନଙ୍କ ପାଇଁ ଉପଯୁକ୍ତ ଚିକିତ୍ସା ସୁନିଶ୍ଚିତ କରିବାକୁ ଜିଲ୍ଲା ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଘୋଷଣା କରିଛି ଯେ ମୃତକଙ୍କ ପରିବାରକୁ ₹୨ ଲକ୍ଷ କ୍ଷତିପୂରଣ ପ୍ରଦାନ କରାଯିବ ଏବଂ ଆହତମାନଙ୍କୁ ଆର୍ଥିକ ସହାୟତା ଭାବରେ ₹୫୦,୦୦୦ ମିଳିବ।
