ହରିୟାଣା: ହରିୟାଣାର ଫରିଦାବାଦରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି । ଫରିଦାବାଦର ଗ୍ରୀନ ଫିଲ୍ଡ କଲୋନୀରେ ଥିବା ଘରେ ଏୟାର କଣ୍ଡିସନର କମ୍ପ୍ରେସରେ ବିସ୍ଫୋରଣ ଘଟିଛି । ଏହି ବିସ୍ଫୋରଣରେ ଜଳିଗଲେ ପୁରା ପରିବାର । ସୂଚନା ଅନୁସାରେ, ଗ୍ରୀନ ଫିଲ୍ଡ କଲୋନୀରେ ଚାରି ମହଲା ବିଶିଷ୍ଟ ବାସଗୃହର ଦ୍ୱିତୀୟ ମହଲାରେ ରହୁଥିବା ଏକ ଭଡା ଘରେ ପରିବାର ଶୋଇଥିବା ସମୟରେ ଭୋର ପ୍ରାୟ ୩ଟା ସମୟରେ ଏସିରେ ବିେସ୍ଫୋରଣ ଘଟିଥିଲା । ଏହି ବିସ୍ଫୋରଣରେ ଦମ୍ପତିଙ୍କ ସହ ତାଙ୍କ ଝିଅ ଏବଂ ପୋଷା କୁକରର ମୃତ୍ୟୁ ହୋଇଛି । ମୃତକଙ୍କୁ ସଚିନ କପୁର (୪୯), ତାଙ୍କ ପତ୍ନୀ ରିଙ୍କୁ କପୁର (୪୮) ଏବଂ ଝିଅ ସୁଜ୍ଜୈନ (୧୩) ବୋଲି ଚିହ୍ନଟ କରାଯାଇଛି । ଦମ୍ପତିଙ୍କ ବଡ ପୁଅ ଆର୍ଯ୍ୟନ୍ କପୁର (୨୪) ଗୁରୁତର ଆହତ ହୋଇଛନ୍ତି ।
ନିକଟସ୍ଥ ମେଡିକାଲରେ ତାଙ୍କର ଚିକିତ୍ସା ଚାଲିଛି । ଡାକ୍ତରଙ୍କ ଅନୁସାରେ, ତାଙ୍କ ଅବସ୍ଥା ସଙ୍କଟାପନ୍ନ ରହିଛି। ବିସ୍ଫୋରଣରେ ଘରେ ରଖାଯାଇଥିବା ସମସ୍ତ ଜିନିଷପତ୍ର ସମ୍ପୂର୍ଣ୍ଣ ପୋଡି ଯାଇଛି । ପୋଲିସ କହିଛି ଯେ ପରିବାର ଛାତକୁ ପଳାଇବାକୁ ଚେଷ୍ଟା କରିଥିଲେ, କିନ୍ତୁ ଦ୍ୱାର ବନ୍ଦ ଥିବାରୁ ଶ୍ୱାସରୁଦ୍ଧ ହୋଇଯାଇଥିଲା। ଏକ ସ୍ପ୍ଲିଟ୍ ଏସିରୁ ଆରମ୍ଭ ହୋଇଥିବା ନିଆଁର ଧୂଆଁ ଘରର ତଳ ଭାଗକୁ ଗ୍ରାସ କରିଥିଲା ଏବଂ ପରିବାର ଫସି ଯାଇଥିଲା। “ଆମେ ଜାଣିବାକୁ ପାଇଲୁ ଯେ ଏସି କମ୍ପ୍ରେସରରେ ବିସ୍ଫୋରଣ ଯୋଗୁଁ, ସମଗ୍ର କୋଠାରେ ନିଆଁ ବ୍ୟାପିଗଲା। ଘରେ ଚାରି ଜଣ ଥିଲେ ଏବଂ ତିନି ଜଣଙ୍କର ମୃତ୍ୟୁ ହୋଇଛି,” ପଡ଼ୋଶୀ ଶାଲିନୀ କହିଛନ୍ତି। ବିସ୍ଫୋରଣର କାରଣ ପୋଲିସ ତଦନ୍ତ କରୁଛି।
