ନୂଆଦିଲ୍ଲୀ: ଆମେରିକାରୁ ଆସିପାରେ ମହାମାରୀ । ସ୍ପେନ୍ର ବିଶେଷଜ୍ଞମାନେ ଏହି ଚେତାବନୀ ଦେଇଛନ୍ତି । ଲା ଭାନ୍ଗାର୍ଡିଆ ଅନୁସାରେ, ସଂକ୍ରାମକ ରୋଗ ବିଶେଷଜ୍ଞମାନେ କହିଛନ୍ତି ଯେ ଆମେରିକାରେ ଏଚ୍୫ଏନ୍୧ ଆଭିଆନ୍ ଫ୍ଲୁର ଲଗାତାର ପରିବର୍ତ୍ତନ ଓ ପ୍ରସାର ଜାରି ରହିଛି । ନିକଟ ଭବିଷ୍ୟତରେ ଏହା ଏକ ନୂଆ ମହାମାରୀକୁ ଜନ୍ମ ଦେଇପାରେ । ଆଭିଆନ୍ ଇନ୍ଫ୍ଲୁଏନ୍ଜା ସାଧାରଣତଃ ବାର୍ଡ ଫ୍ଲୁ ନାମରେ ପରିଚିତ । ଏହା ଏକ ଭୂତାଣୁ ଜନିତ ସଂକ୍ରମଣ, ଯାହା ପକ୍ଷୀ, ଗାଈ ଓ ଅନ୍ୟ ଜନ୍ତୁଙ୍କଠାରେ ବ୍ୟାପେ । ବର୍ତ୍ତମାନ ମଣିଷରୁ ମଣିଷକୁ ଏହାର ସଂକ୍ରମଣର କୌଣସି ଭୟଙ୍କର ପ୍ରମାଣ ନାହିଁ । ତଥାପି ବିଶେଷଜ୍ଞଙ୍କ କହିବା ଅନୁସାରେ, ବନ୍ୟଜନ୍ତୁଙ୍କ ମାଧ୍ୟମରେ ପୋଷା ଜନ୍ତୁଙ୍କଠାରେ ପ୍ରସାରରେ ଭୂତାଣୁର କ୍ଷମତା ଦର୍ଶାଉଛି ଯେ ନୂଆ ମ୍ୟୁଟେସନ୍ ଓ ବିଭିନ୍ନ ପ୍ରକାର ମଧ୍ୟରେ ପୁନଃସଂଯୋଜନ ଯୋଗୁ ମଣିଷକୁ ଏହା ସଂକ୍ରମିତ କରିବାର ଆଶଙ୍କା ରହିଛି । ହୁଏଲଭା ସ୍ଥିତ ଜୁଆନ ରାମନ୍ ଜିମେନେଜ୍ ୟୁନିଭର୍ସିଟି ହସ୍ପିଟାଲର ମାଇକ୍ରୋବାୟୋଲୋଜି ବିଭାଗର ମୁଖ୍ୟ ଫ୍ରାନ୍ ଫ୍ରାନ୍କୋ କହିଛନ୍ତି, ଆମେରିକାରୁ ନୂଆ ମହାମାରୀ ଆସିବାର ଆଶଙ୍କା ଅଧିକ । ତେବେ ସେମାନେ ସ୍ପଷ୍ଟ କରିଛନ୍ତି ଯେ ଏହା ବିଷୟରେ ବିସ୍ତୃତ ସୂଚନା ସେମାନଙ୍କ ପାଖରେ ଅଛି । ତେଣୁ ଆମେରିକାରେ କିଛି ବି ଘଟିଲେ, ସଙ୍ଗେସଙ୍ଗେ ଜଣାପଡ଼ିଯିବ । ସେମାନେ ଆଶ୍ୱସ୍ତ ଯେ ସମଗ୍ର ବିଶ୍ୱର ଯାଞ୍ଚ୍ ପଦ୍ଧତି ମଣିଷଠାରେ ଏଚ୍୫ଏନ୍୧ ଆଭିଆନ୍ ଫ୍ଲୁ ସଂକ୍ରମଣକୁ ଚିହ୍ନଟ କରିବ । କୋଭିଡ୍ ମହାମାରୀ ଘଟଣା ସମସ୍ତ ପଦ୍ଧତିକୁ ସଶକ୍ତ କରିଛି ।
