ଦୋସାର ସମ୍ବର ଭିତରୁ ବାହାରିଲା ମଲା ଝିଟିପିଟି

ଉତ୍ତରାଖଣ୍ଡ : ଦୋସାର ସମ୍ବର ଭିତରୁ ବାହାରିଲା ମଲା ଝିଟିପିଟି । ଉତ୍ତରାଖଣ୍ଡରେ ରେଷ୍ଟୁରାଣ୍ଟକୁ ଖାଇବାକୁ ଯାଇଥିବା ପରିବାର ସହ ଘଟିଛି ଅଭାବନୀୟ ଘଟଣା । ସେମାନେ ଅର୍ଡର ଦେଇଥିବା ଖାଦ୍ୟରୁ ଏକ ମଲା ଝିଟିପିଟି ବାହାରିଛି । ପରିବାରର ଜଣେ ସଦସ୍ୟ ଦୋସା ମଗାଇଥିବା ବେଳେ ତାଙ୍କ ସମ୍ବର ପ୍ଲେଟରୁ ଝିଟିପିଟି ବାହାରିଥିଲା । ଘଟଣାକୁ ନେଇ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ପରିବାର ଲୋକେ ଏ ନେଇ ରେଷ୍ଟୁରାଣ୍ଟ ମାଲିକଙ୍କୁ ଜଣାଇଥିଲେ । ଥାନାରେ ଅଭିଯୋଗ ହେବା ପରେ ପୋଲିସ ଘଟଣାର ତଦନ୍ତ କରୁଛି । ଏହି ଘଟଣାକୁ ନେଇ ପୋଲିସ ମଧ୍ୟ ଆଶ୍ଚର୍ଯ୍ୟ ହୋଇଯାଇଛି । ଖବର ପାଇ ପୋଲିସ ଏବଂ ବରିଷ୍ଠ ଖାଦ୍ୟ ସୁରକ୍ଷା ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ । ଖାଦ୍ୟ ବିଭାଗ ଟିମ୍‌ ଉକ୍ତ ରେଷ୍ଟୁରାଣ୍ଟ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଅଧିକାରୀମାନେ ରେଷ୍ଟୁରାଣ୍ଟ ମାଲିକ ଏବଂ ରୋଷେୟାମାନଙ୍କୁ ଗାଳି ଦେବା ସହ ଖାଦ୍ୟର ନମୁନା ସଂଗ୍ରହ କରିଛନ୍ତି । ସେପଟେ ରେଷ୍ଟୁରାଣ୍ଟ ମାଲିକଙ୍କ ବିରୋଧରେ କୋର୍ଟରେ ମାମଲା ଦାୟର କରିବାକୁ ମଧ୍ୟ ଆବେଦନ ପତ୍ର ଦାଖଲ କରାଯାଇଛି ।