ଉତ୍ତରପ୍ରଦେଶ: ଉତ୍ତରପ୍ରଦେଶର ଗାଜିଆବାଦରେ ମର୍ମନ୍ତୁଦ ସଡକ ଦୁର୍ଘଟଣା। ଦୁଇ ବାଇକ୍ ମୁହାଁମୁହିଁ ଧକ୍କା ହୋଇଛନ୍ତି। ଏହି ଦୁର୍ଘଟଣାରେ ଦୁଇ ଜଣଙ୍କର ମୃତ୍ୟୁ ଘଟଥିବା ବେଳେ ତିନି ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ଦୁଇ ଜଣଙ୍କ ଅବସ୍ଥା ଗୁରୁତର ଥିବା ଜଣାପଡିଛି। ରବିବାର ବିଳମ୍ବିତ ରାତିରେ ପ୍ରାୟ ୧୨ଟା ସମୟରେ ତନୁଶ୍ରୀ ଫାର୍ମ ସମ୍ମୁଖରେ ଜାତୀୟ ରାଜପଥ ୯ ସର୍ଭିସ୍ ରୋଡ୍ରେ ଏହି ଦୁର୍ଘଟଣା ଘଟିଛି। ସୂଚନା ଅନୁସାରେ, ୱେଭ୍ ସିଟି ଥାନା ଅଞ୍ଚଳର ଦାସନାର ବାସିନ୍ଦା ରାଇସୁଦ୍ଦିନ ଏକ ସ୍ପେ୍ଲଣ୍ଡର ବାଇକ୍ ଯୋଗେ ଦାସନା ଅଭିମୁଖେ ଯାଉଥିଲେ। ତାଙ୍କ ସହିତ ଖୋଡାର ଜଣେ ମହିଳା ମଧ୍ୟ ଥିଲେ। ଏହି ସମୟରେ ଏକ ବାଇକ୍ରେ ତିନି ଜଣ ଯୁବକ ଅମନ, ବିପିନ୍ ଏବଂ ପ୍ରେମ୍ ଏକ ଆଭେୱର୍ ବାଇକ୍ ଯୋଗେ ସାମ୍ନାରୁ ଆସୁଥିଲେ।
ହଠାତ୍ ଜାତୀୟ ରାଜପଥ ୯ ସର୍ଭିସ୍ ରୋଡ୍ରେ ଉଭୟ ବାଇକ୍ ମୁହାଁମୁହିଁ ଧକ୍କା ହୋଇଥିଲା। ସ୍ଥାନୀୟ ଲୋକଙ୍କ ସହାୟତାରେ ସମସ୍ତ ଆହତଙ୍କୁ ତୁରନ୍ତ ମଣିପାଳ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ଅମନ ଏବଂ ରାଇସୁଦ୍ଦିନଙ୍କୁ ମୃତ ଘୋଷଣା କରିଥିଲେ। ଦୁର୍ଘଟଣାରେ ମହିଳା ବେବି ଏବଂ ବିପିନ ଗୁରୁତର ଥିବା ଡାକ୍ତର କହିଛନ୍ତି। ଅମନ ଏବଂ ବିପିନ ଗଲଫଲିଙ୍କସରେ ଥିବା ଏକ କ୍ଲବରେ କାମ କରୁଥିଲେ ଏବଂ ଉଭୟ ନେପାଳର ବାସିନ୍ଦା। ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ହେପାଜତକୁ ନେଇ ପୋଷ୍ଟମର୍ଟମ ପାଇଁ ପଠାଇଛି। ଏହି ଘଟଣାରେ ଅଧିକ ତଥ୍ୟ ପାଇଁ ପୋଲିସ ତଦନ୍ତ ଆରମ୍ଭ କରିଛି।
