ହରିୟାଣା: ହରିୟାଣାର ଯମୁନାନଗର କାଠ କାରଖାନାରେ ଭୟଙ୍କର ଅଗ୍ନିକାଣ୍ଡ ଘଟିଛି। ଏହି ଅଗ୍ନିକାଣ୍ଡ ଶୁକ୍ରବାର ଶନିବାର ମଧ୍ୟରାତ୍ରି ପ୍ରାୟ ୧ଟା ସମୟରେ ଯମୁନାନଗରର ଲକ୍କର ମଣ୍ଡିରେ ଥିବା ଜେପିବି କାଠ କାରଖାନାରେ ଘଟିଛି। ଏହି ଅଗ୍ନିକାଣ୍ଡରେ କୋଟି କୋଟି ଟଙ୍କାର କ୍ଷୟକ୍ଷତି ଘଟିଥିବା ନେଇ ସୂଚନା ମିଳିଛି। ଖବର ସମ୍ପର୍କରେ ସୂଚନା ପାଇ ୧୦୦ରୁ ଅଧିକ ଅଗ୍ନିଶମ ବାହିନୀ ଗାଡି ପହଞ୍ଚିଥିଲା। ପ୍ରାୟ ଆଠ ଘଣ୍ଟାର ପ୍ରୟାସ ପରେ ମଧ୍ୟ ନିଆଁ ଲିଭାଇବା କଷ୍ଟକର ହୋଇପଡିଥିଲା। ଏହି ସମୟ ମଧ୍ୟରେ ନିଆଁ ଲାଗି କାରଖାନାର ଏକ ଅଂଶ ଭୁଶୁଡ଼ି ପଡ଼ିଥିଲା, ଯାହା ପରିସ୍ଥିତିକୁ ଆହୁରି ବିପଦପୂର୍ଣ୍ଣ କରିଦେଇଥିଲା।
ଅଗ୍ନିଶମ କର୍ମଚାରୀମାନେ ଏବେ ଜେସିବି ବ୍ୟବହାର କରି ପୋଡ଼ିଯାଇଥିବା କାଠ ଏବଂ ଭଗ୍ନାବଶେଷକୁ ବାହାର କରିବା ଆରମ୍ଭ କରିଛନ୍ତି ଯାହାଦ୍ୱାରା ନିଆଁ ଲାଗି ରହିଥିବା ସ୍ଥାନଗୁଡ଼ିକ ଥଣ୍ଡା ହୋଇପାରିବ। ଅଗ୍ନିଶମ ଅଧିକାରୀମାନେ କହିଛନ୍ତି ଯେ ନିଆଁର ତୀବ୍ରତା ଏବେ ବହୁତ ହ୍ରାସ ପାଇଛି, କିନ୍ତୁ କିଛି ଅଞ୍ଚଳରୁ ଏବେ ବି ଧୂଆଁ ବାହାରୁଛି। ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ଅସ୍ପଷ୍ଟ ଥିଲେ ମଧ୍ୟ ସର୍ଟ ସର୍କିଟ୍ କାରଣ ହୋଇଥାଇପାରେ ବୋଲି ଅନୁମାନ କରାଯାଉଛି। ଅଗ୍ନିଶମ ଅଧିକାରୀଙ୍କ ଅନୁଯାୟୀ, ଅଗ୍ନିକାଣ୍ଡ ଏତେ ଭୟଙ୍କର ଥିଲା ଯେ ଅନେକ ମେସିନ୍, କାଠ ଷ୍ଟକ୍ ଏବଂ ପ୍ରସ୍ତୁତ ବାକ୍ସ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା।
