ନୂଆଦିଲ୍ଲୀ: ଅହମ୍ମଦାବାଦରେ ଦୁର୍ଘଟଣାଗ୍ରସ୍ତ ହୋଇଥିବା ଏୟାର ଇଣ୍ଡିଆ ଏଆଇ-୧୭୧ ବିମାନ ବିଷୟରେ ଏକ ନୂତନ ଖୁଲାସା ହୋଇଛି। ଜୁନ୍ ୧୨ ତାରିଖରେ ଅହମ୍ମଦାବାଦରୁ ଉଡ଼ାଣ ଭରିବାର କିଛି ମିନିଟ୍ ପରେ ଏୟାର ଇଣ୍ଡିଆର ବିମାନ ଏଆଇ ୧୭୧ ଦୁର୍ଘଟଣାଗ୍ରସ୍ତ ହେବା ପରେ, ବିମାନର ଡାହାଣ ପାର୍ଶ୍ୱ ଇଞ୍ଜିନଟି ତଦନ୍ତକାରୀଙ୍କ ଦୃଷ୍ଟି ଆକର୍ଷଣ କରିଛି। ଇଞ୍ଜିନଟି ମାତ୍ର ତିନି ମାସ ପୂର୍ବରୁ, ମାର୍ଚ୍ଚ ୨୦୨୫ରେ ମରାମତି ଏବଂ ପୁନଃସ୍ଥାପନ କରାଯାଇଥିଲା। ପ୍ରାୟ ୧୨ ବର୍ଷ ପୁରୁଣା ବୋଇଂ ୭୮୭-୮ ଡ୍ରିମଲାଇନର ଶେଷ ଥର ପାଇଁ ଜୁନ୍ ୨୦୨୩ରେ ଏକ ବିସ୍ତୃତ ରକ୍ଷଣାବେକ୍ଷଣ ଯାଞ୍ଚ କରାଯାଇଥିଲା, ଏବଂ ପରବର୍ତ୍ତୀ ଡିସେମ୍ବର ୨୦୨୫ରେ ଯାଞ୍ଚ କରାଯିବାର ଯୋଜନା ଥିଲା, ବିଜିନେସ୍ ଟୁଡେ ସୂତ୍ରରୁ ପ୍ରକାଶ କରିଛି।
ଏହି ମର୍ମନ୍ତୁଦ ଦୁର୍ଘଟଣାରେ ୨୪୧ ଜଣ ଯାତ୍ରୀଙ୍କ ସମେତ ପ୍ରାୟ ୨୭୦ ଜଣଙ୍କର ମୃତ୍ୟୁ ହୋଇଥିଲା । ଜଣେ ବ୍ରିଟିଶ ନାଗରିକ ଏକମାତ୍ର ବଞ୍ଚିଯାଇଛନ୍ତି। ଏହା ଦଶନ୍ଧିରୁ ଅଧିକ ସମୟ ମଧ୍ୟରେ ଭାରତର ସବୁଠାରୁ ଭୟଙ୍କର ବିମାନ ଦୁର୍ଘଟଣା ଥିଲା। ବିମାନଟି ମେଘାନୀ ନଗରରେ ଏକ ମେଡିକାଲ ହଷ୍ଟେଲ କୋଠାରେ ଧକ୍କା ଦେଇଥିଲା। ଏହି ଦୁର୍ଘଟଣା ଭାରତୀୟ ବିମାନ ଚଳାଚଳ ଇତିହାସର ସବୁଠାରୁ ବଡ଼ ବୀମା ଦାବି ମଧ୍ୟରୁ ଗୋଟିଏ ହେବ ବୋଲି ଆଶା କରାଯାଉଛି , ପ୍ରାରମ୍ଭିକ ଆକଳନ ଅନୁଯାୟୀ ଏହା ପ୍ରାୟ ୩,୦୦୦ କୋଟି ଟଙ୍କା ହେବ। ଉଲ୍ଲେଖଯୋଗ୍ୟ, ଦୁର୍ଘଟଣାର ମାତ୍ର ଦୁଇ ମାସ ପୂର୍ବରୁ ଏୟାର ଇଣ୍ଡିଆ ବିମାନର ବୀମା କଭର ୭୫୦ କୋଟି ଟଙ୍କାରୁ ୮୫୦ କୋଟି ଟଙ୍କାକୁ ବୃଦ୍ଧି କରିଥିଲା।
ଏହି ଘଟଣା ପରେ, ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ଏୟାର ଇଣ୍ଡିଆର ଫ୍ଲିଟରେ ଥିବା ସମସ୍ତ ଡ୍ରିମଲାଇନର ବିମାନର ଏକକାଳୀନ ସୁରକ୍ଷା ଯାଞ୍ଚ ପାଇଁ ନିର୍ଦ୍ଦେଶ ଦେଇଛି। ଏପର୍ଯ୍ୟନ୍ତ, ଏୟାରଲାଇନ୍ସର ୩୩ଟି ବୋଇଂ ୭୮୭ ମଧ୍ୟରୁ ନଅଟି ବିମାନର ଯାଞ୍ଚ ସମାପ୍ତ ହୋଇଛି, ଅବଶିଷ୍ଟ ବିମାନର ଯାଞ୍ଚ ଜାରି ରହିଛି। ଏହା ବ୍ୟତୀତ, ବିମାନ କମ୍ପାନୀ ପ୍ରତ୍ୟେକ ମୃତ ପୀଡିତଙ୍କ ପରିବାର ଏବଂ ବଞ୍ଚିଥିବା ବ୍ୟକ୍ତିଙ୍କ ପାଇଁ ୨୫ ଲକ୍ଷ ଟଙ୍କାର ମଧ୍ୟବର୍ତ୍ତୀକାଳୀନ କ୍ଷତିପୂରଣ ଘୋଷଣା କରିଛି, ଏହା ସହିତ ମୂଳ କମ୍ପାନୀ ଟାଟା ସନ୍ସ ଦ୍ୱାରା ପୂର୍ବରୁ ଘୋଷଣା କରାଯାଇଥିବା ୧ କୋଟି ଟଙ୍କାର କ୍ଷତିପୂରଣ ମଧ୍ୟ ଦିଆଯାଇଛି।
