ରତ୍ନାଗିରିରେ ନର୍ସିଂ ଛାତ୍ରୀଙ୍କୁ ଦୁଷ୍କର୍ମ

ମୁମ୍ବାଇ: କୋଲକାତା ଟ୍ରେନି ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ଘଟଣାକୁ ନେଇ ସମଗ୍ର ଦେଶ ଏବେ ଦୁଷ୍କର୍ମ ଭଳି ଅପରାଧ ଏବଂ ଏଥିରେ ସମ୍ପୃକ୍ତ ଅପରାଧୀଙ୍କ ପାଇଁ କଠୋରରୁ କଠୋର ଦଣ୍ଡାଦେଶ ଦାବି କରିବାରେ ଲାଗିଛନ୍ତି । ଏସବୁ ସତ୍ତ୍ୱେ ଦେଶର ଅନ୍ୟପ୍ରାନ୍ତରେ ଏପ୍ରକାର ଘଟଣା ବନ୍ଦ ହେବାର ନାଁ ଧରୁନି । ରିପୋର୍ଟ ଅନୁସାରେ ମହାରାଷ୍ଟ୍ରର ରତ୍ନାଗିରି ଜିଲ୍ଲାରେ ଜଣେ ନର୍ସିଂ ଛାତ୍ରୀଙ୍କ ସହ ଦୁଷ୍କର୍ମ ଭଳି ଘଟଣା ସାମ୍ନାକୁ ଆସିଛି । ପୁଲିସ୍ ସୂଚନାନୁସାରେ ମହାରାଷ୍ଟ୍ରର ରତ୍ନାଗିରିରେ ଜଣେ ୧୯ ବର୍ଷୀୟ ଟ୍ରେନି ନର୍ସଙ୍କ ସହ ଏକ ଅଟୋ ଚାଳକ ନିଛାଟିଆ ରାସ୍ତାରେ ଦୁଷ୍କର୍ମ କରି ସେଠାରୁ ଫେରାର ହୋଇଯାଇଛି । ଯୁବତୀ ଜଣକ ନିଜ ଘରକୁ ଅଟୋରେ ଫେରୁଥିବା ବେଳେ ତାଙ୍କ ସହ ଏହି ଅଘଟଣ ଘଟିଛି । ଅଟୋ ଚାଳକଜଣକ ପାନୀୟ ଜିନିଷରେ କିଛି ନିଶା ଦ୍ରବ୍ୟ ମିଶାଇ ନିଛାଟିଆ ସ୍ଥାନକୁ ନେଇ ଦୁଷ୍କର୍ମ କରିଥିବା ପୀଡ଼ିତା କହିଛନ୍ତି । ଯୁବତୀ ଜଣକ ଚେତା ଫେରି ପାଇବା ପରେ ଘଟଣା ବିଷୟରେ ନିଜ ପରିବାରକୁ ଜଣାଇଥିଲେ । ଏହାପରେ ଯୁବତୀଙ୍କ ଅଭିଯୋଗ କ୍ରମେ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଘଟଣା ଜଣାପଡିବା ପରେ ସ୍ଥାନୀୟ ବାସିନ୍ଦା ଅସନ୍ତୋଷ ପ୍ରକାଶ କରିବା ସହ ସୋମବାର ବିଳମ୍ବିତ ରାତିରୁ ରାସ୍ତାରୋକ୍ ସହ ଆନ୍ଦୋଳନ କରି ବିରୋଧ ପ୍ରଦର୍ଶନ କରିଛନ୍ତି । ପୁଲିସ ସିସିଟିଭି ମାଧ୍ୟମରେ ଅଭିଯୁକ୍ତକୁ ଖୋଜାଖୋଜି ଆରମ୍ଭ କରିଛି । ପୀଡିତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।