ରାଞ୍ଚି : ଶ୍ରାବଣରେ ମହାଦେବଙ୍କ ପୀଠରେ ଜଳଲାଗି କରି ଫେରିବା ସମୟରେ ୫ କାଉଡିଆ ଭକ୍ତଙ୍କ ଅସ୍ୱାଭାବିକ ମୃତ୍ୟୁଗତ ସମ୍ବାଦ ସମସ୍ତଙ୍କୁ ସ୍ତବ୍ଧ କରିଦେଇଛି । ରିପୋର୍ଟ ଅନୁସାରେ ଏହି ୫ କାଉଡିଆ ଭକ୍ତ ଦେଓଘର ସ୍ଥିତ ବାବା ବୈଦ୍ୟନାଥଙ୍କ ପୀଠରେ ଜଳାଭିଷେକ ସାରି ଘରକୁ ଫେରୁଥିବା ସମୟରେ ଦୁର୍ଭାଗ୍ୟବଶତଃ ଏକ ଖୋଲା ତାର ସଂସ୍ପର୍ଶରେ ଆସିଯାଇଥିଲେ । ଝାଡ଼ଖଣ୍ଡର ଲାତେହର ଜିଲ୍ଲା ଅନ୍ତର୍ଗତ ଟମ ଟମ ଟୋଲା ଅଞ୍ଚଳରେ ଏହି ଅଘଟଣ ଘଟିଛି ।
କାଉଡିଆମାନେ ଜଳଲାଗି ପରେ ବିଭିନ୍ନ ଜାଗା ବୁଲାବୁଲି କରି ବୁଧବାର ବିଳମ୍ବିତ ରାତିରେ ଏକ ଗାଡ଼ିରେ ଘରକୁ ଫେରୁଥିଲେ । ତେବେ ଗୁରୁବାର ଭୋର ପ୍ରାୟ ୩ଟାରେ ଗାଡି ଡ୍ରାଇଭର ଭାରସାମ୍ୟ ହରାଇବାରୁ ଗାଡ଼ିଟି ଏକ ବିଦ୍ୟୁତ୍ ଖୁଣ୍ଟକୁ ଧକ୍କା ଦେଇଥିଲା । ଫଳରେ ଖୁଣ୍ଟରୁ ତାର ଛିଡ଼ି ଗାଡ଼ି ଉପରେ ପଡ଼ିଥିଲା । ବିଦ୍ୟୁତ ସଂସ୍ପର୍ଶରେ ଆସିଯିବାରୁ ଗାଡ଼ିରେ ଥିବା ୫ କାଉଡିଆଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଯାଇଥିଲା । ତେବେ ଅନ୍ୟ ୩ କାଉଡିଆ ଏବଂ ଡ୍ରାଇଭରଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ପୁଲିସ ଘଟଣାରେ ସ୍ଥଳରେ ପହଞ୍ଚି ତଦନ୍ତ ଚଳାଇଛି ।
ବିଦ୍ୟୁତ୍ ଆଘାତରେ ୫ କାଉଡିଆ ମୃତ
