ବ୍ୟୁରୋ : ବାତ୍ୟା ସମୟରେ ପୁଅ ଜନ୍ମ ହେବାରୁ ପରିବାର ଲୋକେ ପୁଅର ନାଁ ରଖିଲେ ଦାନା । ବର୍ଷା, ପବନ ସମୟରେ ବିଳମ୍ବିତ ରାତିରେ ଭଦ୍ରକ ଧାମନଗର ବ୍ଲକ କଣ୍ଟିକା ଗାଁର ଶୁଭ ମଲ୍ଲିକ ନାମକ ମହିଳାଙ୍କ ପ୍ରସ୍ତୁତି ଯନ୍ତ୍ରଣା ହେବାରୁ ତାଙ୍କୁ ଧୂଷୁରୀ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଗୋଟିଏ ପୁତ୍ର ସନ୍ତାନ ଜନ୍ମ ହୋଇଥିବା ବେଳେ ପ୍ରସବ ହେବା ପରେ ଉଭୟ ମା ଓ ଶିଶୁ ସୁସ୍ଥ ଅଛନ୍ତି । ସନ୍ତାନ ଜନ୍ମକୁନେଇ ପରିବାର ଲୋକେ ବେଶ ଖୁସି ଅଛନ୍ତି । ତେବେ ବାତ୍ୟା ଦାନା ତାଣ୍ଡବ ଲୀଳା ରଚୁଥିବା ବେଳେ ପୁତ୍ର ସନ୍ତାନ ଜନ୍ମ ହୋଇଥିବାରୁ ପରିବାର ଲୋକେ ପୁଅର ନାମ ଦାନା ଦେଇଛନ୍ତି । ପୁଅ ବଡ ହେଲେ ବାପା ମାଙ୍କ ମୁହଁରେ ଦାନା ଦେବ ବୋଲି ସେହି ଆଶାରେ ପିଲାର ନା ଦାନା ରଖିବେ ବୋଲି ପରିବାର ଲୋକେ କହିଛନ୍ତି ।
ବାତ୍ୟା ସମୟରେ ରାଜ୍ୟରେ ଜନ୍ମନେଲେ ୧୬୦୦ ନବଜାତ ଶିଶୁ । ସମସ୍ତ ନବଜାତକ ଓ ମାମାନେ ସୁସ୍ଥ ଥିବା ଜଣାପଡିଛି । ଏସଆରସିଙ୍କ କାର୍ଯ୍ୟାଳୟରେ ଗଣମାଧ୍ୟମକୁ ବାତ୍ୟା ମୁକାବିଲା ସମ୍ପର୍କିତ ସୂଚନା ଦେବା ସମୟରେ ଏଭଳି କିଛି ତଥ୍ୟ ଦେଇଛନ୍ତି ମୁଖ୍ୟମନ୍ତ୍ରୀ ମୋହନଚରଣ ମାଝୀ । ବାତ୍ୟା ପୂର୍ବରୁ ଗର୍ଭବତୀ ଓ ପ୍ରସୂତୀମାନଙ୍କୁ ମେଡଜିକାଲକୁ ଅଣାଯାଇଥିବା ବେଳେ ରାଜ୍ୟସରକାରଙ୍କ ସ୍ୱାସ୍ଥ୍ୟ ବିଭାଗପକ୍ଷରୁ ବିଭିନ୍ନ ବ୍ୟବସ୍ଥା ଗ୍ରହଣ କରାଯାଇଥିଲା । ବାତ୍ୟା ସମୟରେ ଭଲରେ ପିଲା ଜନ୍ମ ହୋଇଥିବାରୁ ବେଶ ଖୁସି ଅଛନ୍ତି ପରିବାର ଲୋକେ । ଏନେଇ ସରକାରଙ୍କୁ ବିଭିନ୍ନ ପରିବାର ପକ୍ଷରୁ ଧନ୍ୟବାଦ ଦିଆଯାଇଛି ।
ବାତ୍ୟା ଦାନା ସମୟରେ ଜନ୍ମହେଲେ ୧୬୦୦ ନବଜାତ ଶିଶୁ
