ଉତ୍ତରପ୍ରଦେଶ: ଉତ୍ତରପ୍ରଦେଶରେ ଅଭାବନୀୟ ଘଟଣା । ବାଲିଆରେ ଜଣେ ଯୁବକଙ୍କୁ ଗୁଳି କରି ହତ୍ୟା କରିଛନ୍ତି ଦୁର୍ବୃତ୍ତ । ମୃତକଙ୍କୁ ୨୫ ବର୍ଷୀୟ ଆୟୁଷ ଯାଦବ ବୋଲି ଚିହ୍ନଟ କରାଯାଇଛି । ବ୍ୟକ୍ତିଗତ ଶତ୍ରୁତାରୁ ଏହି ହତ୍ୟାକାଣ୍ଡ ହୋଇଥିବା ସନ୍ଦେହ କରାଯାଉଛି । ଏହି ଘଟଣାରେ ପୋଲିସ ଚାରି ଜଣଙ୍କ ବିରୁଦ୍ଧରେ ହତ୍ୟା ମାମଲା ରୁଜୁ କରିଛି । ଘଟଣାଟି ଉଡାଓଁ ଥାନା ଅଞ୍ଚଳ ଅନ୍ତର୍ଗତ ବେଲଥରା ରୋଡ୍ ଗ୍ରାମପଞ୍ଚାୟତର ଅଂଶ ବାନସି ପ୍ୟାଲେସ୍ ଗାଁରେ ଘଟିଛି । ସୂଚନାରୁ ପ୍ରକାଶ, ଡିସେମ୍ବର ୧୩ ତାରିଖ ସନ୍ଧ୍ୟାରେ ଆୟୁଷ ଘରକୁ ଫେରୁଥିବା ସମୟରେ ତାଙ୍କୁ ଗୁଳି କରି ହତ୍ୟା କରିଛନ୍ତି ଦୁର୍ବୃତ୍ତ । ଅଭିଯୁକ୍ତମାନେ ତାଙ୍କ ଘର ନିକଟ ରାସ୍ତାରେ ଦୁଇ ରାଉଣ୍ଡ ଗୁଳି ଚଳାଇ ସେଠାରୁ ଫେରାର ହୋଇଯ ।ଇଥିଲେ । ଗୁଳି ଶବ୍ଦ ଶୁଣି ସ୍ଥନୀୟ ଲୋକେ ଘଟଣାସ୍ଥଳରେ ପହଞ୍ଚି ଯୁବକଙ୍କୁ ଉଦ୍ଧାର କରି ହସ୍ପିଟାଲ ନେଇ ଯାଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଘଟଣା ସମ୍ପର୍କରେ ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା । ପରିବାର ଲୋକେ ଆୟୁଷଙ୍କ ହତ୍ୟା ପାଇଁ ସେହି ଗାଁର ରବିନ ସିଂହ, ପବନ ସିଂହ, ରୋହିତ ସିଂହ ଏବଂ ରାଜ ବର୍ମାଙ୍କୁ ଅଭିଯୁକ୍ତ କରିଛନ୍ତି । ପରିବାରର ଅଭିଯୋଗ ଆଧାରରେ, ଅଭିଯୁକ୍ତଙ୍କ ବିରୁଦ୍ଧରେ ଏକ ନାମିତ ରିପୋର୍ଟ ଦାଖଲ କରାଯାଇଛି । ପୋଷ୍ଟମର୍ଟମ ପରେ, ପୋଲିସ ଆୟୁଷଙ୍କ ମୃତଦେହକୁ ତାଙ୍କ ପରିବାରକୁ ହସ୍ତାନ୍ତର କରିଛି । ଚାରି ଅଭିଯୁକ୍ତ ଏବେ ବି ଫେରାର ଅଛନ୍ତି । ସେମାନଙ୍କୁ ଖୋଜା ଚାଲିଛି। ସେମାନଙ୍କୁ ଧରିବା ପାଇଁ ପୋଲିସ ଦଳ ଗଠନ କରାଯାଇଛି । ଘଟଣା ସମ୍ପର୍କରେ ଅଧିକ ତଥ୍ୟ ପାଇଁ ତଦନ୍ତ ଜାରି ରହିଛି ।
