ଉତ୍ତର ପ୍ରଦେଶ: ଉତ୍ତର ପ୍ରଦେଶର ମେରଠ୍ରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଜଣେ ସ୍ତ୍ରୀ ତାଙ୍କ ପ୍ରେମିକ ସହ ମିଶି ସ୍ୱାମୀକୁ ହତ୍ୟା କରିଛି । ମୃତକଙ୍କୁ ଅନିଲ ବୋଲି ଚିହ୍ନଟ କରାଯାଇଛି। ଏହି ଘଟଣାଟି ରୋହଟା ପୋଲିସ ଷ୍ଟେସନ ଅଞ୍ଚଳରେ ଘଟିଛି। ସ୍ତ୍ରୀ ପ୍ରଥମେ ତାଙ୍କ ସ୍ୱାମୀଙ୍କୁ ନିଶା ଦେଇ ପରେ ସ୍କାର୍ଫ ଗଳା ଚିପି ହତ୍ୟା କରିଛି। ଏହା ପରେ ମହିଳା ଜଣକ ତାଙ୍କ ପ୍ରେମିକଙ୍କ ସହାୟତାରେ ତାଙ୍କ ସ୍ୱାମୀଙ୍କୁ ଏକ କେନାଲରେ ଫିଙ୍ଗି ଦେଇଥିଲେ। ସୂଚନାରୁ ପ୍ରକାଶ, ପୋଲିସ ହତ୍ୟାକାଣ୍ଡ ଘଟଣାର ପର୍ଦ୍ଧାଫାସ କରିବା ପୂର୍ବରୁ କେନାଲରେ ବୁଡି ଜଣେ ବ୍ୟକ୍ତିଙ୍କ ମୃତ୍ୟୁବରଣ ହୋଇଥିବା ନେଇ ଖବର ପୋଲିସ ପାଇଥିଲା। ମୃତଦେହକୁ କେନାଲରୁ ଉଦ୍ଧାର କରିବା ପରେ ଅଧିକ ତଦନ୍ତ ପରେ ସ୍ପଷ୍ଟ ହୋଇଥିଲା ଯେ ଏହା ଏକ ଦୁର୍ଘଟଣା ନୁହେଁ, ବରଂ ଏକ ଯୋଜନାବଦ୍ଧ ହତ୍ୟା। ଯେତେବେଳେ ପୋଲିସ ମୃତକଙ୍କ ସ୍ତ୍ରୀ କାଜଲଙ୍କୁ କଠୋରତାର ସହ ପଚରାଉଚରା କଲା, ସେ ଏକ ଆଶ୍ଚର୍ଯ୍ୟଜନକ ଖୁଲାସା କଲେ।
କାଜଲ କହିଥିଲେ ଯେ ସେ ଆଠ ବର୍ଷ ଧରି ବିବାହିତ ଥିଲେ, କିନ୍ତୁ କିଛି ସମୟ ପୂର୍ବରୁ ସେ ତାଙ୍କ ପୂର୍ବତନ ପ୍ରେମିକଙ୍କ ସହ ପୁନଃ ସମ୍ପର୍କ ସ୍ଥାପନ କରିଥିଲେ। ଏହା ପରେ ସେମାନେ ମିଶି ଅନିଲଙ୍କୁ ହତ୍ୟା କରିବା ପାଇଁ ଏକ ଷଡ଼ଯନ୍ତ୍ର ରଚିଲେ। ଯୋଜନାର ଅଂଶ ଭାବରେ, କାଜଲ ପ୍ରଥମେ ଅନିଲଙ୍କୁ ନିଶା ଦେଇଥିଲେ ଏବଂ ତା’ପରେ, ତାଙ୍କ ପ୍ରେମିକଙ୍କ ସହ ମିଶି ତାଙ୍କୁ କେନାଲରେ ଫିଙ୍ଗି ଦେଇଥିଲେ। ତା’ପରେ ସେମାନେ ଘଟଣାକୁ ଏକ ଦୁର୍ଘଟଣା ବୋଲି ଦର୍ଶାଇବାକୁ ଚେଷ୍ଟା କରିଥିଲେ, କିନ୍ତୁ ପୋଲିସ ତଦନ୍ତରେ ସେମାନଙ୍କର ସମ୍ପୂର୍ଣ୍ଣ ଷଡ଼ଯନ୍ତ୍ରର ପର୍ଦ୍ଦାଫାସ ହୋଇଥିଲା। ଗ୍ରାମାଞ୍ଚଳ ପୋଲିସ ଅଧିକ୍ଷକ ଅଭିଜିତ କୁମାର କହିଛନ୍ତି ଯେ ପୋଲିସ କାଜଲ ଏବଂ ତାଙ୍କ ପ୍ରେମିକ ଉଭୟଙ୍କୁ ଗିରଫ କରିଛି। ସେମାନଙ୍କ ବିରୁଦ୍ଧରେ ହତ୍ୟା ଏବଂ ଷଡ଼ଯନ୍ତ୍ର ଧାରା ଅନୁଯାୟୀ ଏକ ମାମଲା ରୁଜୁ କରାଯାଇଛି ଏବଂ ସେମାନଙ୍କୁ କୋର୍ଟରେ ହାଜର କରାଯାଇଛି, ଯେଉଁଠାରୁ ସେମାନଙ୍କୁ ଜେଲକୁ ପଠାଇ ଦିଆଯାଇଛି।
