ଭୁବନେଶ୍ୱର: ଉଚ୍ଚ ଶିକ୍ଷା ବିଭାଗର ମହାଦୁର୍ନୀତିର ଅଭିଯୋଗ ପର୍ଦାଫାଶ ଆଜି ଛାତ୍ର କଂଗ୍ରେସର ସଭାପତି ଶ୍ରୀ ଉଦିତ ପ୍ରଧାନ ରାଜ୍ୟ କଂଗ୍ରେସ ଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଖୁଲାସା କରିଛନ୍ତି । ଶ୍ରୀ ପ୍ରଧାନ ସାମ୍ବାଦିକ ମାନଙ୍କୁ ସମ୍ବୋଦ୍ଧିତ କରି କହିଲେ ଏ ଡବଲ ଇଞ୍ଜିନ ସରକାର ବିକାଶର ଯେଉଁ ମିଛ ସ୍ବପ୍ନ ଦେଖାଇଥିଲେ ବାସ୍ତବରେ ତାହା ଆଜି ଏକ କୁହେଳିକାରେ ପରିଣତ ହୋଇସାରିଛି । ଗୋଟେ ଇଞ୍ଜିନର ସରକାର ନୂଆ ଶିକ୍ଷାନୀତି ପ୍ରବର୍ତନ କରାଇବାପାଇଁ ଲାଗି ପଡ଼ିଥିଲା ବେଳେ ଏହା ଦ୍ଵାରା ଆସନ୍ତା ୩୦ ବର୍ଷ ଭିତରେ ଭାରତ ବର୍ଷର ଶିକ୍ଷା ବ୍ୟବସ୍ଥା ସଂପୂର୍ଣ୍ଣ ଭାବରେ ବିପର୍ଯ୍ୟସ୍ତ ହୋଇପଡ଼ିବ। ଏହି ଡବଲ ଇଞ୍ଜିନ ସରକାରର କିଛି ବର୍ଷ ଭିତରେ ପେପର ଲିକ, ଶିକ୍ଷା ବିଭାଗର ବହୁ ଦୁର୍ନୀତି ଏବଂ ଉଚ୍ଚ ଶିକ୍ଷିତ ଛାତ୍ରଛାତ୍ରୀ ମାନଙ୍କୁ ନିଯୁକ୍ତି ଦେବାରେ ସରକାର ସାମର୍ଥ୍ୟ ନୁହନ୍ତି । ଏକ ଗୁରୁତ୍ୱପୂର୍ଣ୍ଣ ଘଟଣା ହେଲା ଭୁବନେଶ୍ୱର ଜୟଦେବ ବିହାର ଠାରେ ବିଜୁ ପଟ୍ଟନାୟକ କଲେଜର ପୂର୍ବତନ ପ୍ରିନ୍ସପାଲ ଯିଏକି ୫ ବର୍ଷ ଧରି ସେ କଲେଜରେ ପ୍ରିନ୍ସପାଲ ଥିଲାବେଳେ ତାଙ୍କ ବିରୁଦ୍ଧରେ ବହୁ ଗୁରୁତ୍ବପୂର୍ଣ ଆର୍ଥିକ ଅନିୟମିତତା ଏବଂ ଅନ୍ୟାନ୍ୟ ହେରଫେରର ଅଭିଯୋଗ ଅଛି। ସରକାରଙ୍କର ନୀୟମ ଅନୁଯାୟୀ ଜଣେ ବ୍ୟକ୍ତି ପ୍ରଥମେ ତିନିବର୍ଷ ପାଇଁ ଗୋଟେ କଲେଜରେ ଅଧ୍ଯକ୍ଷ ଭାବେ ରହିପାରିବେ ଏବଂ ଆବଶ୍ୟକତା ପଡ଼ିଲେ ତାଙ୍କର ଦୁଇବର୍ଷ କାର୍ଯ୍ୟକାଳକୁ ବୃଦ୍ଧି କରାଯାଇପାରିବ। ଅତଏବେ ପୂର୍ବତନ ପ୍ରିନ୍ସପାଲ ଡ. ପ୍ରଦୀପ୍ତ ଗାହଣ ୫ ବର୍ଷ ଧରି ବିଜୁ ପଟ୍ଟନାୟକ କଲେଜରେ ଅଧ୍ଯକ୍ଷ ରହିସାରିଛନ୍ତି ।
ତାଙ୍କର କାର୍ଯ୍ୟକାଳ ସରିଯାଇଥିଲା । ଏପରିକି ସରକାରୀ ନୀୟମ ରହିଛି ଯଦି କୌଣସି ଅଧ୍ଯକ୍ଷଙ୍କ ବିରୁଦ୍ଧରେ ଦୁର୍ନୀତି ବା ଆର୍ଥିକ ଅନିୟମିତତାର ଅଭିଯୋଗ ଥାଏ ତାହାଲେ ତାଙ୍କୁ ପୁର୍ନବାର ନିଯୁକ୍ତି ଦିଆଯିବ ନାହିଁ । ଏସବୁ ସତ୍ତ୍ୱେ ଶ୍ରୀ ଗାହଣଙ୍କୁ ପୁର୍ନବାର କିଭଳି ସରକାର ସେହି କଲେଜର ଆଉଥରେ ଅଧ୍ୟକ୍ଷ ଭାବେ ନିଯୁକ୍ତି ଦେଲେ। ଏ ବ୍ୟକ୍ତି ଏତେ ଶକ୍ତିଶାଳୀ କାହିଁକି। ସମସ୍ତ ସରକାରୀ ନୀୟମକୁ ଜଳାଞ୍ଜଳି ଦେଇ ତାଙ୍କୁ କାହିଁକି ଓ କାହା ଆଶୀର୍ବାଦରେ ପୁର୍ନବାର ନିଯୁକ୍ତି ମିଳିଛି । ବିଶେଷ ସୂତ୍ରରୁ ଯାହା ଜଣାପଡ଼ୁଛି ସେ ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନଙ୍କର ପାରିବାରିକ ବନ୍ଧୁ ଏବଂ ପୂର୍ବରୁ ମଧ୍ୟ କେଭିସିଂହ ଦେଓଙ୍କ ସହିତ ସମ୍ପର୍କ ଅଛି । ଏହି କାରଣରୁ ଏଭଳି ଏକ ଦୁର୍ନୀତିଗସ୍ତ ବ୍ୟକ୍ତିଙ୍କୁ ପୁର୍ନବାର ନିଯୁକ୍ତି ଦିଆଯାଇଛି ବୋଲି ସେ ପ୍ରଶ୍ନ କରିଛନ୍ତି । ଏଥିପାଇଁ କିଏ କେତେ ଟଙ୍କା ରୋଜଗାର କରିଛନ୍ତି। ଏହାର ଖୁଲା ଉତ୍ତର ସରକାର ଦିଅନ୍ତୁ । ଉଚ୍ଚଶିକ୍ଷା ବିଭାଗର ମନ୍ତ୍ରୀ ଏ ଘଟଣାର ତଦନ୍ତ କରନ୍ତୁ। ଯଦି ଏଭଳି ଦୁର୍ନୀତିଗସ୍ତ ବ୍ୟକ୍ତିଙ୍କ ନିଯୁକ୍ତିକୁ ରଦ୍ଧ କରାନଯାଇଛି ତାହାଲେ ଛାତ୍ର କଂଗ୍ରେସ ଏହାର ଉପଯୁକ୍ତ ଉତ୍ତର ଦେବ। ଏହି ସାମ୍ବାଦିକ ସମ୍ମିଳନୀରେ ଓଡ଼ିଶା ପ୍ରଦେଶ ଛାତ୍ର କଂଗ୍ରେସ ପ୍ରଭାରୀ ଚୁନୁ ସିଂ ଓ ସାହାରୁଖ ଖାନ ଉପସ୍ଥିତ ଥିଲେ।
