ବାଂଲାଦେଶ: ବାଂଲାଦେଶରେ ପୁଣି ଥରେ ହିଂସା ଦେଖାଦେଇଛି। ଏକ ଆଦିବାସୀ ବହୁଳ ଅଞ୍ଚଳରେ ତିନି ଜଣଙ୍କର ମୃତ୍ୟୁ ହୋଇଛି। ବାଂଲାଦେଶ ଗୃହ ମନ୍ତ୍ରଣାଳୟ ରବିବାର ଏକ ବିବୃତ୍ତିରେ କହିଛି ଯେ ପାହାଡ଼ି ଜିଲ୍ଲା ଖାଗରାଛରୀରେ ଘଟିଥିବା ହିଂସାରେ ତିନି ଜଣ ଆଦିବାସୀଙ୍କ ମୃତ୍ୟୁ ହୋଇଛି। ଅଞ୍ଚଳରେ ଉତ୍ତେଜନା ଲାଗି ରହିଛି। ସେଠାରେ ସେନା ଏବଂ ପୋଲିସ ମୁତୟନ କରାଯାଇଛି। ବିବୃତ୍ତିରେ କୁହାଯାଇଛି, “ଖାଗରାଛରୀ ଜିଲ୍ଲାର ଗୁଇମାରା ଉପଜିଲାରେ ଦୁର୍ବୃତ୍ତମାନଙ୍କ ଆକ୍ରମଣରେ ତିନି ଜଣ ପାହାଡ଼ି ଲୋକଙ୍କ ମୃତ୍ୟୁ ଏବଂ ଜଣେ ମେଜରଙ୍କ ସମେତ ୧୩ ଜଣ ସେନା କର୍ମଚାରୀ, ଗୁଇମାରା ପୋଲିସ ଷ୍ଟେସନର ଓସିଙ୍କ ସମେତ ତିନି ଜଣ ପୋଲିସ ଏବଂ ଅନେକ ଆହତ ହେବା ଘଟଣାରେ ଗୃହ ମନ୍ତ୍ରଣାଳୟ ଗଭୀର ଦୁଃଖ ପ୍ରକାଶ କରିଛି।” ତଦନ୍ତ ପରେ ଏହି ଘଟଣାରେ ଜଡିତ ଲୋକଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମନ୍ତ୍ରଣାଳୟ ପ୍ରତିଶ୍ରୁତି ଦେଇଛି। କୌଣସି ଦୋଷୀଙ୍କୁ ଛଡ଼ାଯିବ ନାହିଁ।
ଜଣେ ଆଦିବାସୀ ଛାତ୍ରୀଙ୍କୁ ଗଣଦୁଷ୍କର୍ମ ପରେ ପ୍ରତିବାଦ ଆରମ୍ଭ ହୋଇଥିଲା। ମଙ୍ଗଳବାର ଦିନ ଖାଗରାଛରୀ ଜିଲ୍ଲାରେ ଜଣେ ଅଷ୍ଟମ ଶ୍ରେଣୀ ଛାତ୍ରୀଙ୍କ ସହ ଗଣଦୁଷ୍କର୍ମ ଅଭିଯୋଗ ପରେ ସଂଘର୍ଷ ଆରମ୍ଭ ହୋଇଥିଲା। ପୋଲିସ କହିଛି ଯେ ଝିଅଟି ଟ୍ୟୁସନରୁ ଫେରିବା ସମୟରେ ଗଣବଳାତ୍କାରର ଶିକାର ହୋଇଥିଲା ଏବଂ ମଧ୍ୟରାତ୍ରିରେ ସହରର ଏକ ନିର୍ଜନ ଅଞ୍ଚଳରେ ତାଙ୍କ ବାପାମା ଏବଂ ପଡ଼ୋଶୀମାନେ ତାଙ୍କୁ ଅଚେତ ଅବସ୍ଥାରେ ପାଇଥିଲେ। ଝିଅଟିର ଚିକିତ୍ସା ସ୍ଥାନୀୟ ହସ୍ପିଟାଲରେ କରାଯାଇଥିଲା ପୋଲିସ, ସାମରିକ ସହାୟତାରେ, ଏହି ଘଟଣାରେ ଜଣେ ନାବାଳକ ପୁଅକୁ ଅଟକ ରଖିଛି। ପୋଲିସ ସନ୍ଦେହ କରୁଛି ଯେ ପୁଅଟି ଅପରାଧୀ ସେଠି ପାଇଁ କୋର୍ଟଙ୍କ ନିର୍ଦ୍ଦେଶରେ ତାକୁ ଏବେ ଛଅ ଦିନିଆ ରିମାଣ୍ଡରେ ପଚରାଉଚରା କରାଯାଉଛି।
