ଭୋପାଳ: ମଧ୍ୟପ୍ରଦେଶରୁ ଏକ ଲୋମହର୍ଷଣକାରୀ ଘଟଣା ସାମ୍ନାକୁ ଆସିଛି । ବ୍ୟସ୍ତବହୁଳ ସଡ଼କରେ ଜଣେ ଯୁବତୀଙ୍କୁ ବଳାତ୍କାର କରାଯିବାର ଭିଡିଓ ସୋସିଆଲ ମିଡିଆରେ ଭାଇରାଲ୍ ହେଉଛି । ଏଭଳି ଅସାମାଜିକ ଘଟଣାର ବିରୋଧ କରିବା ପରିବର୍ତ୍ତେ ରାସ୍ତାରେ ଯାଉଥିବା ଲୋକେ ଭିଡିଓ ସୁଟିଂ କରି ସୋସିଆଲ ମିଡିଆରେ ପୋଷ୍ଟ କରିଛନ୍ତି । ବୁଧବାର ଅପରାହ୍ନରେ ସହରର ସବୁଠୁ ବ୍ୟସ୍ତବହୁଳ ଛକ କୋଏଲା ଫାଟକ ନିକଟରେ ଏହି ଘଟଣା ଘଟିଛି । ପରେ ଲୋକେଶ ନାମକ ଅଭିଯୁକ୍ତଙ୍କୁ ପୋଲିସ ଗିରଫ କରିଛି । ପୋଲିସର ସୂଚନାନୁସାରେ, ଯୁବକ ଜଣକ ଏହି ଅଞ୍ଚଳରେ ପୀଡିତାଙ୍କୁ ଭେଟିଥିଲେ । ମହିଳା ଜଣଙ୍କୁ ବିବାହର ପ୍ରତିଶ୍ରୁତି ଦେଇ ତାଙ୍କୁ ସାଙ୍ଗରେ ନେଇଯାଇଥିଲେ ।
ଏହାପରେ ସେ ମହିଳାଙ୍କୁ ମଦ୍ୟପାନ କରାଇଥିଲେ ଏବଂ ଯେତେବେଳେ ସେ ମଦ୍ୟପାନ କରି ଅଚେତ ହୋଇଯାଇଥିଲେ, ସେତେବେଳେ ସେ ତାଙ୍କୁ ରାସ୍ତାକଡ଼କୁ ନେଇ ତାଙ୍କୁ ବଳାତ୍କାର କରିଥିଲେ । ଜଣେ ପ୍ରତ୍ୟକ୍ଷଦର୍ଶୀ ଏହି ଘଟଣାର ସୁଟିଂ କରି ଭିଡିଓ ଅନଲାଇନରେ ଶେୟାର କରିଥିବାବେଳେ ଅଭିଯୁକ୍ତ ମହିଳାଙ୍କୁ ଧମକ ଦେଇ ଘଟଣାସ୍ଥଳରୁ ପଳାଇ ଯାଇଥିଲେ । ଏହି ଭାଇରାଲ ଭିଡିଓ ପୀଡ଼ିତାଙ୍କୁ ଉଦ୍ଧାର କରିବାରେ ପୋଲିସକୁ ସାହାଯ୍ୟ କରିଥିଲା । ପରେ ମହିଳାଙ୍କର ବୟାନ ଆଧାରରେ ମାମଲା ରୁଜୁ ହୋଇଥିଲା ।
ଅଭିଯୁକ୍ତଙ୍କୁ ଚିହ୍ନଟ କରିବା ପାଇଁ ପୋଲିସ ଭିଡିଓର ସମୀକ୍ଷା କରି ଲୋକେଶଙ୍କୁ ଗିରଫ କରିଥିଲା । ତେବେ ଏହି ଘଟଣାକୁ ନେଇ ରାଜ୍ୟ ରାଜନୀତି ସରଗରମ ହୋଇଯାଇଛି । ବିରୋଧୀ କଂଗ୍ରେସ ଶାସକ ଭାଜପାକୁ ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ବିଗିଡି ଯାଉଛି ବୋଲି ଦାୟୀ କରିଛି । ମଧ୍ୟପ୍ରଦେଶ କଂଗ୍ରେସ ଏହି ଘଟଣାର ଭିଡିଓ ଏହାର ଏକ୍ସ ହ୍ୟାଣ୍ଡେଲରେ ପୋଷ୍ଟ କରି କହିଛି, “ପବିତ୍ର ସହର ଉଜ୍ଜୟିନୀ ପୁଣି ଥରେ ଲଜ୍ଜିତ । କ୍ଷମତାରେ ଥିବା ଲୋକମାନେ ଲଜ୍ଜାରେ ମରିବା ଉଚିତ୍ କିମ୍ବା ଇସ୍ତଫା ଦେବା ଉଚିତ୍ ।
