ୱାଶିଂଟନ: ଆମେରିକା-ଚୀନ୍ ମଧ୍ୟରେ ଚାଲିଥିବା ବାଣିଜ୍ୟ ଯୁଦ୍ଧରେ ଯବନିକା ପଡ଼ିବାର ଏକ ବଡ଼ ଆଶା ସଞ୍ଚାର ହୋଇଛି । ରିପୋର୍ଟ ଅନୁସାରେ ଉଭୟ ଆମେରିକା ଏବଂ ଚୀନ୍ ମିଳିତ ପ୍ରୟାସରେ ଦ୍ୱିପାକ୍ଷିକ ଆଲୋଚନା କରିବା ପୂର୍ବକ ପାରସ୍ପରିକ ଶୁଳ୍କ (ଟାରିଫ୍) ହ୍ରାସ କରିବାକୁ ସହମତି ପ୍ରକାଶ କରିଛନ୍ତି । ଆମେରିକାର ଅର୍ଥ ସଚିବ ସ୍କଟ୍ ବେସାଣ୍ଟ ଗଣମାଧ୍ୟମକୁ କହିଛନ୍ତି ଯେ ଦୁଇ ପକ୍ଷ ୯୦ ଦିନ ପାଇଁ ପଦକ୍ଷେପଗୁଡ଼ିକୁ ବିରତ ରଖିବା ପାଇଁ ଏକ ଚୁକ୍ତିରେ ପହଞ୍ଚିଛନ୍ତି । ଏହି ଚୁକ୍ତି ଅନ୍ତର୍ଗତ ପାରସ୍ପରିକ ଶୁଳ୍କରେ ୧୧୫% ହ୍ରାସ କରାଯିବ । ଏପ୍ରକାର ନିଷ୍ପତ୍ତି ଦ୍ୱାରା ଶୁଳ୍କ ହ୍ରାସ ସମ୍ଭାବନା ବଢ଼ିଯାଇଛି । ଦୁଇ ଦେଶ ଏକ ବାଣିଜ୍ୟ ଚୁକ୍ତି ଚୂଡ଼ାନ୍ତ କରିଛନ୍ତି ଏବଂ ବାଣିଜ୍ୟ ଶୁଳ୍କ ହ୍ରାସ କରିବାକୁ ରାଜି ହୋଇଛନ୍ତି ବୋଲି ସେ କହିଛନ୍ତି ।
ସମ୍ବାଦ ସରବରାହ ସଂସ୍ଥା ରଏଟର୍ସ ରିପୋର୍ଟ ଅନୁସାରେ ଜେନିଭାରେ ଚୀନ୍ ଅଧିକାରୀଙ୍କ ସହ ଆଲୋଚନା ପରେ, ଆମେରିକାର ଅର୍ଥ ସଚିବ ସ୍କଟ୍ ବେସାଣ୍ଟ ଗଣମାଧ୍ୟମକୁ ଉପରୋକ୍ତ ସୂଚନା ଦେଇଛନ୍ତି । ଆମେରିକା ଚୀନ୍କୁ ଆମେରିକୀୟ ସାମଗ୍ରୀ ପାଇଁ ଅଧିକ ଖୋଲା ଦେଖିବାକୁ ଚାହୁଁଥିବା ବେସାଣ୍ଟ କହିଛନ୍ତି । ଚୀନର ବାଣିଜ୍ୟ ମନ୍ତ୍ରଣାଳୟର ଏକ ବିବୃତ୍ତି ଉପରେ ଆଧାରିତ ଗଣନା ଅନୁଯାୟୀ, ଚୀନ୍ ଆମେରିକୀୟ ସାମଗ୍ରୀ ଉପରେ ୧୦% ଶୁଳ୍କ ଲଗାଇବାକୁ ଯାଉଛି, ଯେତେବେଳେ ଆଗାମୀ ୯୦ ଦିନ ପାଇଁ ଅତିରିକ୍ତ ୨୪% ଶୁଳ୍କ ସ୍ଥଗିତ ରଖିବ ଏବଂ ଅତିରିକ୍ତ ୯୧% ଶୁଳ୍କକୁ ଉଚ୍ଛେଦ କରିବ । ଆମେରିକା ମଧ୍ୟ ସମାନ କିଛି ନିଷ୍ପତ୍ତି ନେବ, ଯାହାଦ୍ୱାରା ଚୀନ୍ ପାଇଁ ମଧ୍ୟ ଆମେରିକୀୟ ବଜାରରେ ଉତ୍ପାଦର ଯୋଗାଣ ନିରବଚ୍ଛିନ୍ନ ଭାବେ ଜାରି ରହିପାରିବ ।
ଆମେରିକା ଯେତେବେଳେ ଚୀନ୍ ଆମଦାନୀ ଉପରେ ୧୪୫% ଶୁଳ୍କ ଲାଗୁ କରିଥିଲା, ସେତେବେଳେ ଚୀନ୍ ମଧ୍ୟ କାଉଣ୍ଟର ଜବାବରେ ଆମେରିକା ଉପରେ ପ୍ରତିଶୋଧମୂଳକ ୧୨୫% ଶୁଳ୍କ ଲଗାଇଥିଲା, ଏବଂ ଆମେରିକାକୁ “ବିରଳ ପୃଥିବୀ’ ଭାବେ ବିବେଚନା କରିବା ସହ ଏହାର ରପ୍ତାନି ଉପରେ ମଧ୍ୟ ନିଷେଧ କରିଥିଲା । ଏହା ବିଶ୍ୱର ଦୁଇ ଶ୍ରେଷ୍ଠ ଅର୍ଥନୀତି ମଧ୍ୟରେ ଏକ ସମ୍ପୂର୍ଣ୍ଣ ବାଣିଜ୍ୟ ପ୍ରତିବନ୍ଧକ ସହିତ ସମାନ ଥିଲା, ଏବଂ ଦୀର୍ଘକାଳୀନ ଭାବରେ ଏହା ଅସହ୍ୟ ଥିଲା । ତେବେ ଉଭୟ ଦେଶ ମଧ୍ୟରେ ଏପ୍ରକାର ଅଚଳାବସ୍ଥାକୁ ଦୂର କରିବା ପାଇଁ ବେସାନ୍ତ ଏବଂ ଚୀନର ଉପ-ପ୍ରଧାନମନ୍ତ୍ରୀ ହି ଲାଇଫିଙ୍ଗ୍ ଗତ ସପ୍ତାହନ୍ତରେ ରୁଦ୍ଧଦ୍ୱାର ଆଲୋଚନାରେ ସାମିଲ ହୋଇଥିଲେ । ଉପ-ପ୍ରଧାନମନ୍ତ୍ରୀ ଲିଫିଂ କହିଛନ୍ତି ଯେ ଆଲୋଚନା “ଗମ୍ଭୀର’ ଏବଂ “ସ୍ପଷ୍ଟ’ ଥିଲା ।
ପ୍ରକାଶ, ଆମେରିକା-ଚୀନ୍ ମଧ୍ୟରେ ଏପ୍ରକାର ଟାରିଫ୍ ଯୁଦ୍ଧ ତଥା ବାଣିଜ୍ୟିକ ଉତ୍ତେଜନା ଭାରତକୁ ଲାଭ ଦେବା ଆରମ୍ଭ କରିଥିଲା । କାରଣ ଆମେରିକା ଚୀନ୍ ସାମଗ୍ରୀ ଉପରେ ଭାରୀ ଶୁଳ୍କ ଲଗାଇବା ପରେ ଆମେରିକୀୟ କ୍ରେତାମାନେ ଭାରତୀୟ ଯୋଗାଣକାରୀଙ୍କ ଆଡ଼କୁ ମୁହାଁଇବା ଆରମ୍ଭ କରିଥିଲେ । ଏହି ଉତ୍ତେଜନା ପଶ୍ଚିମ ଦେଶଗୁଡ଼ିକ ସହିତ ଭାରତର ଗଭୀର ଆର୍ôଥକ ସମନ୍ୱୟର ସମ୍ଭାବନାକୁ ମଧ୍ୟ ଉନ୍ନତ କରିଥିଲା । ଚୀନର ବାଣିଜ୍ୟ ମନ୍ତ୍ରଣାଳୟର ତଥ୍ୟ ଦର୍ଶାଉଛି ଯେ ଏପ୍ରିଲ ମାସରେ ଆମେରିକାକୁ ଚୀନର ରପ୍ତାନି ୨୦%ରୁ ମଧ୍ୟ ଅଧିକ ହ୍ରାସ ପାଇଛି, ଯେତେବେଳେ ଏସିଆନ୍ ଅଞ୍ଚଳ ଏବଂ ଅନ୍ୟାନ୍ୟ ବଜାରରେ ଦୃଢ଼ ପ୍ରଦର୍ଶନ ଯୋଗୁଁ ଏହାର ସାମଗ୍ରିକ ରପ୍ତାନି ବର୍ଷ ବର୍ଷ ଧରି ୮.୧ ପ୍ରତିଶତ ବୃଦ୍ଧି ପାଇଛି, ଯାହା ଆମେରିକାର ଶୁଳ୍କର ସୀମିତ ପ୍ରଭାବକୁ ସୂଚୀତ କରୁଛି ।
