ନୂଆଦିଲ୍ଲୀ: ଉନ୍ନାଓ ଦୁଷ୍କର୍ମ ମାମଲାରେ ଦିଲ୍ଲୀ ହାଇକୋର୍ଟଙ୍କ ରାୟ ଉପରେ ରହିତାଦେଶ। ଦିଲ୍ଲୀ ହାଇକୋର୍ଟଙ୍କ ଜାମିନ ଉପରେ ରହିତାଦେଶ ଦେଲେ ସୁପ୍ରିମକୋର୍ଟ। ଉନ୍ନାଓ ଦୁଷ୍କର୍ମ ମାମଲାରେ ହାଇକୋର୍ଟ କୁଲଦୀପ ସେନଗାରଙ୍କ ଆଜୀବନ କାରାଦଣ୍ଡକୁ ସ୍ଥାଗିତ ରଖିଥିଲେ ଏବଂ ତାଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଥିଲେ। ରାୟକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟ ଯାଇଥିଲା ସିବିଆଇ। ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜେକେ ମାହେଶ୍ୱରୀ ଏବଂ ବିଚାରପତି ଅଗଷ୍ଟିନ ଜର୍ଜ ମାସିହଙ୍କୁ ନେଇ ଗଠିତ ଏକ ଛୁଟିକାଳୀନ ଖଣ୍ଡପୀଠ ଏହି ଆବେଦନର ଶୁଣାଣି କରିଛନ୍ତି।
ସିବିଆଇର ପ୍ରତିନିଧିତ୍ୱ କରୁଥିବା ଏସଜି ତୁଷାର ମେହେଟ୍ଟା ଯୁକ୍ତି ଦେଇଥିଲେ ଯେ ନାବାଳିକାଙ୍କୁ ଅତ୍ୟନ୍ତ ନୃଶଂସ ଭାବରେ ବଳାତ୍କାର କରାଯାଇଥିଲା ଏବଂ ହାଇକୋର୍ଟ ଆଇପିସିର ଧାରା ୩୭୬ ଏବଂ ଯୌନ ଅପରାଧରୁ ଶିଶୁ ସୁରକ୍ଷା (ପୋକ୍ସୋ) ଧାରା ୫କୁ ଅଣଦେଖା କରିଛନ୍ତି। ଜଷ୍ଟିସ୍ ଜେକେ ମାହେଶ୍ୱରୀ ଦର୍ଶାଇଥିଲେ ଯେ ଧାରା ୩୭୬ ଉପରେ ପୂର୍ବରୁ ବିଚାର କରାଯାଇଛି। ଏସଜି ମେହେଟ୍ଟା ଆହୁରି ମଧ୍ୟ କହିଥିଲେ ଯେ ଏହା ଜଣେ ନାବାଳିକା ପୀଡିତାଙ୍କ ସହିତ ଜଡିତ ମାମଲା ଥିଲା, କିନ୍ତୁ ହାଇକୋର୍ଟ ଏହି ମାମଲାରେ ଅନେକ ଦିଗକୁ ଅଣଦେଖା କରିଛନ୍ତି।
ଏସଜି ତୁଷାର ମେହେଟା କହିଛନ୍ତି ଯେ ସେନଗାରଙ୍କୁ ଦୁଇଟି ମାମଲାରେ ଦୋଷୀ ସାବ୍ୟସ୍ତ କରାଯାଇଛି ଏବଂ ଘଟଣା ସମୟରେ ପୀଡିତାଙ୍କ ବୟସ ମାତ୍ର ୧୫ ବର୍ଷ ୧୦ ମାସ ଥିଲା ଏବଂ ଦୋଷୀ ସାବ୍ୟସ୍ତ ହେବା ବିରୁଦ୍ଧରେ ଏକ ଆବେଦନ ବିଚାରାଧୀନ ଥିଲା। ସେ କହିଛନ୍ତି ଯେ ଦୋଷୀ ସାବ୍ୟସ୍ତ ହେବାର କାରଣ ସ୍ପଷ୍ଟ ଯେ ବଳାତ୍କାର ଜଣେ ସରକାରୀ କର୍ମଚାରୀଙ୍କ ଦ୍ୱାରା କରାଯାଇଥିଲା, ଏବଂ ସିବିଆଇ ଏହାକୁ ତଥ୍ୟ ଏବଂ ପ୍ରମାଣ ସହିତ ପ୍ରମାଣିତ କରିଛି। ଏହି ମାମଲା ୨୦୧୭ ମସିହାର, ଉତ୍ତର ପ୍ରଦେଶର ବିଧାନସଭାର ସଦସ୍ୟ କୁଲଦୀପ ସିଂହ ସେନଗାରଙ୍କ ଉପରେ ଉନ୍ନାଓ ଜିଲ୍ଲାର ଜଣେ ନାବାଳିକା ଝିଅ ବଳାତ୍କାର ଅଭିଯୋଗ ଆଣିଥିଲା।
୨୦୧୯ ମସିହାରେ ଦିଲ୍ଲୀର ଏକ ଟ୍ରାଏଲ୍ କୋର୍ଟ କୁଲଦୀପ ସିଂହ ସେନଗାରଙ୍କୁ ବଳାତ୍କାର ପାଇଁ ଦୋଷୀ ସାବ୍ୟସ୍ତ କରି ଆଜୀବନ କାରାଦଣ୍ଡରେ ଦଣ୍ଡିତ କରିଥିଲେ। ସେନଗାରଙ୍କୁ ପୀଡିତାଙ୍କ ପିତାଙ୍କ ହାଜତ ମୃତ୍ୟୁ ଏବଂ ସାକ୍ଷୀମାନଙ୍କୁ ପ୍ରଭାବିତ କରିବା ପାଇଁ ମଧ୍ୟ ଦୋଷୀ ସାବ୍ୟସ୍ତ କରାଯାଇଥିଲା। ଡିସେମ୍ବର ୨୩ ତାରିଖରେ, ଦିଲ୍ଲୀ ହାଇକୋର୍ଟ ସେନଗାରଙ୍କ ଆବେଦନ ଉପରେ ତାଙ୍କ ଦଣ୍ଡାଦେଶକୁ ସ୍ଥଗିତ ରଖିଥିଲେ ଏବଂ ପୂର୍ବରୁ ଭୋଗିଥିବା ଦଣ୍ଡର ଅବଧି (ସାତ ବର୍ଷ ପାଞ୍ଚ ମାସ) ଏବଂ ଆଇନଗତ ଆଧାର ଉଲ୍ଲେଖ କରି ତାଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଥିଲେ।
