ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରତିରକ୍ଷା ବିଭାଗ ପରମାଣୁ ଅସ୍ତ୍ର ସମ୍ପର୍କରେ ଏକ ବଡ ନିର୍ଦ୍ଦେଶ ଜାରି କରିଛି। ରୁଷ ସହିତ ଚାଲିଥିବା ବିବାଦ ମଧ୍ୟରେ, ଟ୍ରମ୍ପଙ୍କ ମନ୍ତ୍ରଣାଳୟ ପରମାଣୁ ଅସ୍ତ୍ର ପରୀକ୍ଷଣ କରିବାକୁ ନିଷ୍ପତ୍ତି ନେଇଛି। ଏହି ପରୀକ୍ଷଣ ରୁଷ ଏବଂ ଚାନର ପରମାଣୁ ଅସ୍ତ୍ର ହିତ ସମକକ୍ଷ ହେବ। ଟ୍ରମ୍ପ ଏହି ପ୍ରସଙ୍ଗ ସମ୍ପର୍କରେ ସୋସିଆଲ ମିଡିଆରେ ଏକ ପୋଷ୍ଟ ମଧ୍ୟ ସେୟାର କରିଛନ୍ତି। ସେ କହିଛନ୍ତି ଯେ ଆମେରିକା ପାଖରେ ସର୍ବାଧିକ ସଂଖ୍ୟକ ପରମାଣୁ ଅସ୍ତ୍ର ଅଛି।
ଗୁରୁବାର ଦିନ, ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ରେ ଏକ ପୋଷ୍ଟ ସେୟାର କରି କହିଛନ୍ତି, “ଆମେରିକା ପାଖରେ ବିଶ୍ୱର ଅନ୍ୟ ଯେକୌଣସି ଦେଶ ଅପେକ୍ଷା ଅଧିକ ପରମାଣୁ ଅସ୍ତ୍ର ଅଛି। ଏହି ସଫଳତା ମୋର ପ୍ରଥମ କାର୍ଯ୍ୟକାଳ ସମୟରେ ହାସଲ ହୋଇଥିଲା, ଯେଉଁଥିରେ ପୂର୍ବରୁ ଥିବା ଅସ୍ତ୍ରଶସ୍ତ୍ରର ସମ୍ପୂର୍ଣ୍ଣ ଅପଡେଟ୍ କରାଯାଇଥିଲା। ଏହି ଅସ୍ତ୍ରଶସ୍ତ୍ରଗୁଡ଼ିକର ବିପଦପୂର୍ଣ୍ଣ ଶକ୍ତି ଯୋଗୁଁ ମୁଁ ଏହା କରିବାକୁ ଘୃଣା କରୁଥିଲି, କିନ୍ତୁ ମୋ ପାଖରେ ଅନ୍ୟ କୌଣସି ବିକଳ୍ପ ନଥିଲା!”
ସେ ରୁଷ ବିଷୟରେ ମଧ୍ୟ ଉଲ୍ଲେଖ କରିଥିଲେ। ଆମେରିକା ରାଷ୍ଟ୍ରପତି କହିଛନ୍ତି, “ରୁଷ ଦ୍ୱିତୀୟ ସ୍ଥାନରେ ଅଛି ଏବଂ ଚୀନ୍ ତୃତୀୟ ସ୍ଥାନରେ ବହୁତ ପଛରେ ଅଛି। ତଥାପି, ଚୀନ୍ ଆଗାମୀ ପାଞ୍ଚ ବର୍ଷ ମଧ୍ୟରେ ଏହା ହାସଲ କରିପାରିବ। ଅନ୍ୟ ଦେଶର ପରୀକ୍ଷଣ କାର୍ଯ୍ୟକ୍ରମକୁ ଦୃଷ୍ଟିରେ ରଖି, ମୁଁ ପ୍ରତିରକ୍ଷା ବିଭାଗକୁ ସେମାନଙ୍କର ପରମାଣୁ ଅସ୍ତ୍ରଶସ୍ତ୍ର ସହିତ ସମକକ୍ଷ ଭାବରେ ଆମର ପରମାଣୁ ଅସ୍ତ୍ରଶସ୍ତ୍ର ପରୀକ୍ଷା କରିବାକୁ ନିର୍ଦ୍ଦେଶ ଦେଇଛି। ଏହି ପ୍ରକ୍ରିୟା ତୁରନ୍ତ ଆରମ୍ଭ ହେବ।”
