ଅରୁଣାଚଳ ପ୍ରଦେଶ: ଅରୁଣାଚଳ ପ୍ରଦେଶରେ ଖାଇକୁ ଟ୍ରକ୍ ଖସିବା ଘଟଣାରେ ମୃତ୍ୟୁ ସଂଖ୍ୟା ବୃଦ୍ଧି ପାଇଛି। ମୃତ୍ୟୁ ସଂଖ୍ୟା ୧୭ରୁ ବୃଦ୍ଧି ପାଇ ୨୨ରେ ପହଞ୍ଚିଛି। ଅରୁଣାଚଳ ପ୍ରଦେଶର ଅଞ୍ଜୱା ଜିଲ୍ଲାର ଚଗ୍ଲଗାମ ଅଞ୍ଚଳରେ କାମ କରିବାକୁ ଗଲା ବେଳେ ଏକ ବିପଦପୂର୍ଣ୍ଣ ପାହାଡିଆ ରାସ୍ତାରୁ ଟ୍ରକ ଖସି ପଡି ଦୁର୍ଘଟଣା ଘଟିଥିଲା। ଏହି ଦୁର୍ଘଟଣାରେ ୨୨ ଜଣ ମୃତ୍ୟୁବରଣ କରିଥିବା ବେଳେ ଏପର୍ଯ୍ୟନ୍ତ କେବଳ ଜଣଙ୍କୁ ଜୀବିତ ଉଦ୍ଧାର କରାଯାଇଛି। ଡିସେମ୍ବର ୮ ହାଇଲାଙ୍ଗ-ଚାଗଲାଘମ ରାସ୍ତାରେ ମେଟେଙ୍ଗଲିଆଙ୍ଗ ନିକଟରେ ଏହି ଦୁର୍ଘଟଣା ଘଟିଛି। ସମସ୍ତ ଶ୍ରମିକ ଆସାମର ତିନସୁକିଆ ଜିଲ୍ଲାର ଗେଲାପୁଖୁରୀ ଚା ଇଷ୍ଟେଟର ଥିଲେ। ସେମାନେ ଅରୁଣାଚଳ ପ୍ରଦେଶର ଏକ ପ୍ରକଳ୍ପରେ କାମ କରିବାକୁ ଯାଉଥିଲେ।
ମୃତକଙ୍କ ମଧ୍ୟରେ ବୁଦ୍ଧେଶ୍ୱର ଦୀପ, ରାହୁଲ କୁମାର, ସମୀର ଦୀପ, ଜନ୍ କୁମାର, ପଙ୍କଜ ମଙ୍କି, ଅଜୟ ମଙ୍କି, ବିଜୟ କୁମାର, ଅଭୟ ଭୁମିଜ, ରୋହିତ ମଙ୍କି, ବିରେନ୍ଦ୍ର କୁମାର, ଆଗୋର ତନ୍ତୀ, ଧୀରନ ଚେତିଆ, ରଜନୀ ନାଗ, ଦୀପ ଗୋୱାଲା, ରାମଚକ ସୋନାର, ସୋନାନନ କୁମାର, ସୋନାରତ ନାଗ ଅନ୍ୟ ତିନିଜଣ ଶ୍ରମିକଙ୍କୁ ଏପର୍ଯ୍ୟନ୍ତ ଚିହ୍ନଟ କରାଯାଇ ନାହିଁ। ମୃତକଙ୍କ ପରିବାର ଲୋକଙ୍କୁ ସୂଚନା ଦିଆଯାଇଛି। ଦୁର୍ଘଟଣାସ୍ଥଳରୁ ଉଦ୍ଧାରକାରୀ ଦଳ ୧୩ ଜଣଙ୍କ ମୃତଦେହ ଉଦ୍ଧାର କରିଛନ୍ତି। ବାକି ଲୋକଙ୍କ ସନ୍ଧାନ ଜାରି ରହିଛି। ପାହାଡ଼ ଢାଲ, ଅତ୍ୟନ୍ତ କଷ୍ଟକର ଭୂମି ଏବଂ ଘଟଣାସ୍ଥଳରେ ଖରାପ ରାସ୍ତା ଉଦ୍ଧାର କାର୍ଯ୍ୟରେ ବାଧା ସୃଷ୍ଟି କରୁଛି। ପୋଲିସ, ଜିଲ୍ଲା ପ୍ରଶାସନ, ଏସଡିଆରଏଫଏବଂ ସେନାର ଦଳ ମିଳିତ ଭାବରେ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ସମସ୍ତ ଉଦ୍ଧାର ହୋଇଥିବା ମୃତଦେହକୁ ପୋଷ୍ଟମର୍ଟମ୍ ପାଇଁ ପଠାଯାଇଛି।
