ବିହାର: ବିହାରରୁ ସାମ୍ନାକୁ ଆସିଛି ଏକ ଅଭାବନୀୟ ଘଟଣା । ୩ ଜଣଙ୍କୁ ଖଣ୍ଡାରେ ହାଣି ମାରିଦେଲେ ଦୁର୍ବୃତ୍ତ। ଏଭଳି ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି ବିହାରର ସିୱାନରେ। ଶୁକ୍ରବାର ବିଳମ୍ବିତ ରାତିରେ ତିନି ଜଣଙ୍କୁ ଖଣ୍ଡାରେ ହାଣି ହତ୍ୟା କରାଯାଇଛି। ଏହି ଘଟଣା ଜିଲ୍ଲାର ଭଗବାନପୁର ହାଟ ଥାନା ଅଞ୍ଚଳର ମାଲମାଲିଆ ଚୌକରେ ଘଟିଛି। ମୃତକଙ୍କ ନାମ ମୁନ୍ନା ସିଂହ ରୋହିତ ଏବଂ କନହୈୟା ସିଂହ ବୋଲି କୁହାଯାଉଥିବାବେଳେ ରୋଶନ ଏବଂ କରଣ ଗୁରୁତର ଆହତ ହୋଇଛନ୍ତି। ଉଭୟଙ୍କୁ ସିୱାନ ସଦର ହସ୍ପିଟାଲକୁ ପଠାଯାଇଛି। କୁହାଯାଉଛି ଯେ ଏହି ହତ୍ୟାକାଣ୍ଡର ସ୍କ୍ରିପ୍ଟ ତିନି ଦିନ ପୂର୍ବରୁ ଲେଖାଯାଇଥିଲା।
ଶୁକ୍ରବାର ସନ୍ଧ୍ୟାରେ ୨୪ରୁ ଅଧିକ ଲୋକ ଏକାଠି ହୋଇ ଏହି ଲୋକଙ୍କ ଉପରେ ଆକ୍ରମଣ କରିଥିଲେ। ଘଟଣାସ୍ଥଳରେ ତିନି ଜଣଙ୍କର ମୃତ୍ୟୁ ହୋଇଥିଲା। ଏହି ଚାଞ୍ଚଲ୍ୟକର ଘଟଣା ପରେ, ଗାଁର ଲୋକମାନେ କ୍ରୋଧିତ ହୋଇ ପଡ଼ିଥିଲେ। ଉତ୍ତ୍ୟକ୍ତ ଗ୍ରାମବାସୀମାନେ ଘଣ୍ଟା ଘଣ୍ଟା ଧରି ପାଟନା-ସିୱାନ ମୁଖ୍ୟ ରାସ୍ତା ଅବରୋଧ କରିଥିଲେ। ବିଳମ୍ବିତ ରାତିରେ ପୋଲିସ ଗ୍ରାମବାସୀଙ୍କୁ ଶାନ୍ତ କରିଥିଲା। ତା’ପରେ ଗାଁ ଲୋକମାନେ ଅଭିଯୁକ୍ତଙ୍କ ଘର ପୋଡ଼ି ଦେଇଥିଲେ। ସୂଚନା ଅନୁଯାୟୀ, ମୃତ କନହୈୟା ସିଂହ ଗୁରୁବାର ଥାନାରେ ସାତ ଜଣଙ୍କ ବିରୁଦ୍ଧରେ ଆକ୍ରମଣ ଏବଂ ଡକାୟତି ମାମଲା ରୁଜୁ କରିଥିଲେ। ଏହା ପରେ ହିଁ ଅଭିଯୁକ୍ତ ଦଳ ଏକ ବଡ଼ ଘଟଣା ଘଟାଇବାକୁ ଯୋଜନା କରିଥିଲେ। ଘଟଣାର ତଦନ୍ତ କରାଯାଉଛି। ଅଭିଯୁକ୍ତଙ୍କୁ ଗିରଫ କରିବା ପାଇଁ ପୋଲିସ ଚଢାଉ କରୁଛି।
