ମହିଳାଙ୍କଠୁ ପଇସା ନେଇ ଫେରାର ହୋଇଥିବା ଯୁବକ ଥାନାରେ ଅଟକ, ଯୁବକକୁ ନେଇ ଥାନାରେ ପହଞ୍ଚିଲେ ଶତାଧିକ ମହିଳା

ଯାଜପୁର : ମହିଳାଙ୍କ ଠୁ ପଇସା ନେଇ ଫେରାର ହୋଇଥିବା ଯୁବକ ଥାନାରେ ଅଟକ । ଯାଜପୁର ଥାନା ଅନ୍ତର୍ଗତ ବିଭିନ୍ନ ଅଂଚଳର ମହିଳା ମାନଙ୍କ ଠାରୁ ଅଧିକ ସୁଧ ଦେବାର ପ୍ରଲୋଭନ ଦେଖାଇ କୋଟିଏରୁ ଉର୍ଦ୍ଧ ଟଙ୍କା ଠକି ନେଇଥିବା ଠକକୁ କାବୁ କରିଛି ଯାଜପୁର ପୋଲିସ । ଅଭିଯୋଗ ମୁତାବକ ସାନସୁଆର, ସିମିଳିଆ ସମେତ ବିଭିନ୍ନ ପଂଚାୟତରେ ରହିଥିବା ମହିଳା ସ୍ୱୟଂସହାୟକ ଗୋଷ୍ଠୀ ମାନଙ୍କ ନିକଟରୁ କୋଟିଏରୁ ଉର୍ଦ୍ଧ ଟଙ୍କା ବିଂଝାରପୁର ଥାନା ତାଉଁତରା ଗାଁର ଶୁଭକାନ୍ତ ମିଶ୍ର ନାମକ ଠକ ଠକି ନେଇଥିବା ଅଭିଯୋଗ ହୋଇଥିଲା । ମହିଳା ମାନଙ୍କୁ ଅଧିକ ସୁଧ ଏବଂ ମାସିକ ଦରମା ଆଦିର ପ୍ରଲୋଭନ ଦେଖାଇ ଉକ୍ତ ଟଙ୍କା ଠକି ନେଇଥିଲା । ପରିସ୍ଥିତି ଏପରି ହୋଇଥିଲା ଯେ ମହିଳା ମାନେ ବିଭିନ୍ନ ଘରୋଇ ସଂସ୍ଥାରୁ ଋଣ କରି ଆଣି ସଂପୃକ୍ତ ଠକଙ୍କୁ ଟଙ୍କା ଦେଇଥିଲେ । କିନ୍ତୁ ପରବର୍ତି ସମୟରେ ସେ ଧରାଛୁଆଁ ନ ଦେବାରୁ ଏ ନେଇ ଥାନାରେ ଆଶ୍ରୟ ନେଇଥିଲେ । ପୋଲିସ ବିଭିନ୍ନ ସ୍ଥାନରେ ଚଢ଼ାଉ କରିଥିଲେ ମଧ୍ୟ କୌଣସି ସୁରାକ ପାଇନଥିଲା । ପଂଳରେ ବାଧ୍ୟ ହୋଇ ମହିଳା ମାନେ ଜିଲାପାଳ ଓ ଏସପିଙ୍କ ଦ୍ୱାରସ୍ଥ ହୋଇଥିଲେ । ତେବେ ଯାଜପୁର ପୋଲିସ ଆଜି ଅଭିଯୁକ୍ତ ଶୁଭକାନ୍ତକୁ ଅଟକ ରଖି ପଚରା ଉଚୁରା କରୁଛି । ସେପଟେ ଶତାଧିକ ମହିଳା ଜମାକାରୀ ମାନେ ଖବର ପାଇ ଯାଜପୁର ଥାନା ଆଗରେ ଭିଡ ଜମାଇଥିଲେ । ଅଭିଯୁକ୍ତ ଠାରୁ ଟଙ୍କା ଆଦାୟ କରି ଦେବା ପାଇଁ ପୋଲିସ କୁ ଗୁହାରି କରିଥିଲେ । ପୋଲିସ ତଦନ୍ତ କରି ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଏସଡିପିଓ ସୂଚନା ଦେଇଛନ୍ତି ।