ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଙ୍ଗଳବାର ଲୋକସଭାରେ ପ୍ରୟାଗରାଜ ମହାକୁମ୍ଭର ଆୟୋଜନ ସମ୍ପର୍କରେ ନିଜ ପକ୍ଷ ରଖିଥିଲେ। ମୋଦୀ କହିଥିଲେ, ମହାକୁମ୍ଭର ସଫଳତାରେ ଅନେକ ଲୋକଙ୍କର ଅବଦାନ ରହିଛି। ସେସମସ୍ତ କର୍ମଯୋଗୀଙ୍କୁ ଅଭିନନ୍ଦନ ଜଣାଇବା ସହ କୃତଜ୍ଞତା ବ୍ୟକ୍ତ କରୁଛି, ଯେଉଁମାନେ ଚଳିତ ମହାକୁମ୍ଭକୁ ସଫଳ କରି ଗଢ଼ିତୋଳିବାରେ ନିସ୍ୱାର୍ଥ ମନୋଭାବ ସହ ନିଜ ଦାୟିତ୍ୱ ନିର୍ବାହ କରିଥିଲେ। ଉତ୍ତରପ୍ରଦେଶର ଜନସାଧାରଣଙ୍କୁ ବିଶେଷକରି ପ୍ରୟାଗରାଜର ଲୋକମାନଙ୍କୁ ଅଶେଷ ଅଶେଷ ଧନ୍ୟବାଦ ଜଣାଇଛନ୍ତି ମୋଦୀ। ପ୍ରଧାନମନ୍ତ୍ରୀ କହିଥିଲେ ଯେ ଗତ ବର୍ଷ ଅଯୋଧ୍ୟାରେ ରାମ ମନ୍ଦିର ପ୍ରାଣ ପ୍ରତିଷ୍ଠା ସମାରୋହ ଆମ ସମସ୍ତଙ୍କୁ ଅନୁଭବ କରାଇଥିଲା ଯେ ଦେଶ ଆଗାମୀ ୧୦୦୦ ବର୍ଷ ପାଇଁ କିପରି ପ୍ରସ୍ତୁତ ହେଉଛି। ସେହିପରି ଚଳିତ ମହାକୁମ୍ଭ ଆମ ଚିନ୍ତାଧାରାକୁ ଆହୁରି ସୁଦୃଢ଼ କରିଛି, ଦେଶର ସାମୂହିକ ଚେତନା ଆମକୁ ଦେଶର ଶକ୍ତି ବିଷୟରେ ଜଣାଉଛି। ମହାକୁମ୍ଭ ସମୟରେ ଲୋକମାନେ ସୁବିଧା ଏବଂ ଅସୁବିଧା ବିଷୟରେ ଚିନ୍ତା ନକରି ଏଥିରେ ଅଂଶଗ୍ରହଣ କରିଥିଲେ। ଆମର ପରମ୍ପରାଗୁଡ଼ିକୁ ପିଢ଼ି ପରେ ପିଢ଼ି ହସ୍ତାନ୍ତର କରିବାର ପ୍ରକ୍ରିୟା ଜାରି ରହିଛି। ଆଜି ଭାରତର ଯୁବପିଢ଼ି ଗର୍ବ, ପୂର୍ଣ୍ଣ ଭାବପ୍ରବଣତାର ସହ ଏହାର ପରମ୍ପରା, ବିଶ୍ୱାସ ଏବଂ ରୀତିକୁ ଗ୍ରହଣ କରୁଛନ୍ତି। ଏକ ଦେଶ ଭାବରେ ଆମେ ବଡ଼ ଲକ୍ଷ୍ୟ ହାସଲ କରିବା ପାଇଁ ଆତ୍ମବିଶ୍ୱାସ ହାସଲ କଲୁ। ଏହାର ଐତିହ୍ୟ ସହିତ ଯୋଡ଼ି ହେବାର ପରମ୍ପରା ହେଉଛି ଆଜିର ଭାରତର ସବୁଠାରୁ ବଡ଼ ସମ୍ପତ୍ତି। ମହାକୁମ୍ଭ ଉପରେ ଯେଉଁମାନେ ପ୍ରଶ୍ନ ଉଠାଇଥିଲେ, ସେମାନେ ସେମାନଙ୍କର ଉତ୍ତର ପାଇଯାଇଛନ୍ତି। ଦେଶର ପ୍ରତ୍ୟେକ କୋଣରେ ଆଧ୍ୟାତ୍ମିକ ଚେତନା ଉଭା ହୋଇଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମହାକୁମ୍ଭକୁ ଭାରତର ଇତିହାସର ଏକ ମୋଡ଼ ଭାବରେ ବର୍ଣ୍ଣନା କରି ମଙ୍ଗଳବାର ଲୋକସଭାରେ କହିଥିଲେ, ବିଶ୍ୱ ଦେଶର ବିଶାଳ ରୂପ ଦେଖିଛି ଏବଂ ଏହା ‘ସବକା ପ୍ରୟାସ’ର ଜୀବନ୍ତ ପ୍ରତିମୂର୍ତ୍ତି। ପ୍ରୟାଗରାଜ ମହାକୁମ୍ଭ ସମ୍ପର୍କରେ ନିମ୍ନ ସଦନରେ ଦିଆଯାଇଥିବା ଏକ ବିବୃତ୍ତିରେ ସେ ଏହା ମଧ୍ୟ କହିଛନ୍ତି ଯେ ମହାକୁମ୍ଭରୁ ‘ଏକତାର ଅମୃତ’ ଏବଂ ଅନ୍ୟାନ୍ୟ ଅନେକ ଅମଳ ବାହାରିଛି। ମହାକୁମ୍ଭ ଆମର କ୍ଷମତା ସହ ଜଡିତ ସନ୍ଦେହ ଏବଂ ଭୟର ଉପଯୁକ୍ତ ଉତ୍ତର ଦେଇଛି। ମହାକୁମ୍ଭରେ ଆମେ ଆମର ଜାତୀୟ ଚେତନାର ମହାନ ଜାଗରଣ ଦେଖିଛୁ। ଏହା ଆମକୁ ନୂତନ ସଂକଳ୍ପ ହାସଲ କରିବାକୁ ପ୍ରେରଣା ଦିଏ। ଆମର କ୍ଷମତା ବିଷୟରେ କିଛି ଲୋକଙ୍କ ସନ୍ଦେହ ଏବଂ ଭୟର ଉପଯୁକ୍ତ ଉତ୍ତର ଦେଇଛି ମହାକୁମ୍ଭ। ଏହି କାର୍ଯ୍ୟକ୍ରମ ଦେଶରେ ଏକତାର ବାର୍ତ୍ତା ଦେଇଛି।
ଅନ୍ୟପକ୍ଷେ ପ୍ରଥମ ଥର ପାଇଁ ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ, ପ୍ରଧାନମନ୍ତ୍ରୀଙ୍କ ବୟାନ୍କୁ ସମର୍ଥନ କରିଛନ୍ତି। ରାହୁଲ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀ ଯାହା କହିଥିଲେ, ଆମେ ତାକୁ ସମର୍ଥନ କରୁଛୁ। କୁମ୍ଭ ହେଉଛି ଆମର ଇତିହାସ ଏବଂ ସଂସ୍କୃତି। ଆମର ଏକମାତ୍ର ଅଭିଯୋଗ ହେଉଛି ଯେ ପ୍ରଧାନମନ୍ତ୍ରୀ କୁମ୍ଭରେ ପ୍ରାଣ ହରାଇଥିବା ଲୋକଙ୍କୁ ଶ୍ରଦ୍ଧାଞ୍ଜଳି ଦେଇନାହାଁନ୍ତି। ମହାକୁମ୍ଭ ଯାଇଥିବା ଯୁବକମାନେ ପ୍ରଧାନମନ୍ତ୍ରୀ ମୋଦୀଙ୍କଠାରୁ ଆଉ ଗୋଟିଏ ଜିନିଷ ମଧ୍ୟ ଚାହାଁନ୍ତି, ତାହା ହେଉଛି ନିଯୁକ୍ତି। ଗଣତାନ୍ତ୍ରିକ ଢାଞ୍ଚା ଅନୁଯାୟୀ ବିରୋଧୀ ଦଳ ନେତାଙ୍କୁ କହିବାର ସୁଯୋଗ ମିଳିବା ଉଚିତ୍, କିନ୍ତୁ ସେମାନେ ଆମକୁ କହିବାକୁ ଦେଉନାହାଁନ୍ତି। ଏହା କଦାପି ନୂତନ ଭାରତ ହୋଇନପାରେ।
