ଚିତ୍ରରୁ ଜଣାପଡିଲା ହତ୍ୟା ପଛର ଅଭିଯୁକ୍ତ କିଏ ?

ନୂଆଦିଲ୍ଲୀ : ସୋମବାର ଉତ୍ତର ପ୍ରଦେଶର ଝାନ୍ସୀରେ ଜଣେ ମହିଳାଙ୍କ ମୃତ୍ୟୁ ଘଟିଛି । ହେଲେ ତାଙ୍କର ଚାରି ବର୍ଷୀୟା ଝିଅ ଏହିଁ ମୃତ୍ୟୁର ଖୁଲାସା କରିଛି । ଝିଅଟି ଚିତ୍ର ଆଙ୍କିଥିବା ନେଇ ସନ୍ଦେହ ଉପୁଜିଛି। କୁନି ଝିଅ କରିଥିବା ଚିତ୍ରରୁ ଅନୁମାନ କରାଯାଉଛି ଯେ ତାଙ୍କ ମାଆ ବର୍ଷ ବର୍ଷ ଧରି ନିର୍ଯାତନା ସହିବା ପରେ ତାଙ୍କ ସ୍ବାମୀ ତାଙ୍କୁ ଆକ୍ରମଣ କରି ହତ୍ୟା କରିଛନ୍ତି । ଝାନ୍ସି ସହରର କୋତୱାଲି ପଞ୍ଚବଟି ଶିବ ପରିବାର କଲୋନୀରେ ରହୁଥିବା ୨୭ ବର୍ଷିୟା ସୋନାଲି ବୌଧଲିୟାଙ୍କ ସନ୍ଦିଗ୍ଧ ଅବସ୍ଥାରେ ମୃତ୍ୟୁ ହୋଇଥିଲା । ଏହାକୁ ଆତ୍ମହତ୍ୟାର ନାଁ ଦେଇଥିଲେ ସ୍ବାମୀ । ହେଲେ ସବୁ ସତ ପଦାରେ ପକାଇଲା ୪ ବର୍ଷର କୁନି ଝିଅ। ସୋନାଲିଙ୍କ ବାପଘର ଲୋକେ ଜ୍ବାଇଁ ସନ୍ଦୀପ ବୌଧଲିୟା ଓ ତାଙ୍କ ପରିବାର ଉପରେ ହତ୍ୟା ଅଭିଯୋଗ ଆଣିଥିଲେ । ସୋନାଲିଙ୍କ ଶବ ସତ୍କାର ପାଇଁ ସନ୍ଦୀପ ପହଞ୍ଚିବାରୁ ତାଙ୍କୁ ଘଉଡାଇଦେବା ସହ ତାଙ୍କ ଝିଅ ହାତରେ ମୁଖାଗ୍ନି  ଦେବା କାମ କରାଇଥିଲେ । ଶବସତ୍କାର ପରେ ଘଟଣାର ତଦନ୍ତ କରିବାକୁ ପହଞ୍ଚିଥିଲା ପୋଲିସ । କୁନି ଝିଅକୁ ପଚାରିବାରୁ ସେ ଏକ ଡ୍ରଇଂ ବନାଇଥିଲା । ଏହାକୁ ଦେଖି ଆଶ୍ଚର୍ୟ୍ୟ ହୋଇଥିଲେ ପୁଲିସ ଅଧିକାରୀ । ଡ୍ରଇଂରେ ଜଣେ ମହିଳା ଫାଶିରେ ଝୁଲୁଥିଲେ ଏବଂ ତା ପାଖରେ ଅନ୍ୟ ଜଣଙ୍କ ହାତ ଦେଖିବାକୁ ମିଳିଥିଲା । ଇଏ କାହା ହାତ ବୋଲି ପଚାରିଥିଲେ ପୁଲିସ  ଏବଂ କୁନି ଝିଅ କହିଥିଲା, ପାପା ମାମାକୁ ମାରିଦେଲେ। ଏହାପରେ ରଶିରେ ଝୁଲାଇଦେଇଥିଲେ। ବାସ୍ ଏତିକିରେ ଧରାପଡିଥିଲା ସତ। ପୁଲିସ ସନ୍ଦୀପକୁ ଗିରଫ କରି ଜେରା କରୁଥିବା ଜଣାପଡିଛି।