ପୋଖରୀରେ ବୁଡି ଚାଲିଗଲା ଦୁଇ ନାବାଳକଙ୍କ ଜୀବନ

କୁଚିଣ୍ଡା : ସମ୍ବଲପୁର ଜିଲ୍ଲା କୁଚିଣ୍ଡା ଉପଖଣ୍ଡ ଗୋବିନ୍ଦପୁର ଥାନା ଅଞ୍ଚଳରେ  ପୋଖରୀରେ ବୁଡି ଚାଲିଗଲା ଦୁଇ ନାବାଳକ ସାଙ୍ଗଙ୍କ ଜୀବନ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଗୋବିନ୍ଦପୁର ଥାନା ଭିଏଏସ କଲୋନୀ ନିକଟ ପୋଖରୀକୁ ୬ଜଣ ସାଙ୍ଗ ବୁଧବାର ସଂଧ୍ୟା ୫ଟା ବେଳେ ଗାଧୋଇବା ଯାଇଥିଲେ । ପୋଖରୀରେ ଗାଧୋଇବା ବେଳେ ହଠାତ୍‌ ଦୁଇ ନାବାଳକ ବୁଡି ଯାଇଥିଲେ । ଏହାପରେ ଅଗ୍ନିଶମ ବାହିନୀ ଓ ଗୋବିନ୍ଦପୁର ପୋଲିସକୁ ଖବର ଦିଆଯାଇଥିଲା । ଉଭୟ ପହଞ୍ଚି ଘଟଣାସ୍ଥଳରେ ଖୋଜାଖୋଜି ଆରମ୍ଭ କରିଥିଲେ । କିଛି ସମୟ ଧରି ଖୋଜାଖୋଜି କରିବା ପରେ ଦୁଇ ନାବାଳକଙ୍କ ମୃତଦେହ ମିଳିଥିଲା । ମୃତକ ଗୋବିନ୍ଦପୁରର ଅଭୟ କୁମାର ଶର୍ମା (୧୧ ବର୍ଷ ), ଆଶିଷ୍‌ ନାଗ (୧୧ ବର୍ଷ ) ବୋଲି ଜଣାପଡିଛି । ସେପଟେ ପୋଲିସ ଦୁଇଟି ଅପମୃତ୍ୟୁ ମାମଲା ରୁଜୁ କରି ଛାନ୍‌ଭିନ୍‌ ଜାରି ରଖିଛି । ବାକି ଦୁଇ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ।