ନୂଆଦିଲ୍ଲୀ: ଯଦି ଆପଣଙ୍କୁ କୁହାଯାଏ ଦୁନିଆରେ ଏକ ଏଭଳି ଦେଶ ଅଛି ଯେଉଁଠାକାର ରାଜା ସେହି ଦେଶରେ ରହିବା ପାଇଁ ମାଗଣା ଜମି ଦିଅନ୍ତି କଣ ଆପଣ ବିଶ୍ୱାସ କରିବେ । କେବଳ ଯେ ଜମି ତା ନୁହେଁ ଏହି ଦେଶରେ ଶିକ୍ଷା, ବିଜୁଳି ଏବଂ ଚିକିତ୍ସା ମଧ୍ୟ ସମ୍ପୂର୍ଣ୍ଣ ମାଗଣା । ଆଉ ଏହି ଦେଶ ଏତେ ସୁନ୍ଦର ଯେ ଏହାକୁ ବିଶ୍ୱର ସ୍ୱର୍ଗ ବୋଲି ମଧ୍ୟ କୁହାଯାଏ । ଏହି ଦେଶ ହେଉଛି ଭାରତର ପଡ଼ୋଶୀ ଦେଶ ଭୁଟାନ । ଭୁଟାନ ଏପରି ଏକ ଦେଶ ଯେଉଁଠାରେ ଲୋକମାନେ ଘର, ଖାଦ୍ୟ, ଶିକ୍ଷା, ବିଦ୍ୟୁତ୍ ଏବଂ ସ୍ୱାସ୍ଥ୍ୟ ଭଳି ମୌଳିକ ଆବଶ୍ୟକତା ମାଗଣାରେ ପାଇଥାନ୍ତି । ଏଠାରେ କେହି ଭୋକିଲା କିମ୍ବା ବାସହୀନ ରୁହନ୍ତି ନାହିଁ ।
ଏଠାରେ ରାଜା ଏବଂ ସରକାର ମିଳିମିଶି ନିଷ୍ପତ୍ତି ନିଅନ୍ତି ଯେମିତି ଦେଶର କୌଣସି ନାଗରିକଙ୍କର କିଛି ଅସୁବିଧା ରହିବ ନାହିଁ । ଭୁଟାନରେ ଯଦି କୌଣସି ବ୍ୟକ୍ତିଙ୍କ ପାଖରେ ଘର ତିଆରି କରିବା ପାଇଁ ଜମି ନାହିଁ କିମ୍ବା କିଣିବାର କ୍ଷମତା ନାହିଁ, ତେବେ ତାଙ୍କୁ କେବଳ ରାଜାଙ୍କ ପାଖକୁ ଯିବାକୁ ପଡିବ । ରାଜା ସେହି ବ୍ୟକ୍ତିଙ୍କୁ ମାଗଣା ଜମି ଦିଅନ୍ତି । ଯାହାଦ୍ୱାରା ସେ ନିଜର ଘର ତିଆରି କରି ପାରିବେ ଏବଂ ନିଜ ପରିବାର ପାଇଁ ଜୀବିକା ଅର୍ଜନ କରିପାରିବେ । ଭୁଟାନରେ ଶିକ୍ଷା, ସ୍ୱାସ୍ଥ୍ୟ ଏବଂ ଚିକିତ୍ସା ସମ୍ପୂର୍ଣ୍ଣ ମାଗଣା । ଏମିତିକି ଏଠାରେ ସ୍କୁଲ ଏବଂ କଲେଜ ଟ୍ୟୁସନ ଫି ଆଦାୟ କରାଯାଏ ନାହିଁ ।
ଉଚ୍ଚଶିକ୍ଷା ପାଇଁ ମଧ୍ୟ ସରକାର ଛାତ୍ରବୃତ୍ତି ମଧ୍ୟ ଦିଅନ୍ତି, ଏପରିକି ଆବଶ୍ୟକ ସ୍ଥଳେ ବିଦେଶରେ ଅଧ୍ୟୟନ କରିବା ପାଇଁ ମଧ୍ୟ ସୁଯୋଗ ଦିଆଯାଏ । ଏଠାରେ ସମସ୍ତ ସରକାରୀ ଡାକ୍ତରଖାନା ଏବଂ ସ୍ୱାସ୍ଥ୍ୟ କେନ୍ଦ୍ରରେ ମାଗଣା ଚିକିତ୍ସା ଏବଂ ଔଷଧ ମିଳିଥାଏ । ଏହି କାରଣରୁ, ଭୁଟାନର ଲୋକମାନେ ଏକ ସୁସ୍ଥ ଏବଂ ସୁଖମୟ ଜୀବନଯାପନ କରନ୍ତି । ଭୁଟାନରେ ଛୋଟ ପରିବାର ଏବଂ ଗ୍ରାମାଞ୍ଚଳର ଲୋକଙ୍କୁ ଏକ ନିର୍ଦ୍ଦିଷ୍ଟ ପରିମାଣର ବିଦ୍ୟୁତ୍ ମାଗଣାରେ ଯୋଗାଇ ଦିଆଯାଉଛି । କୃଷକମାନେ ବିହନ, ସାର ଏବଂ କୃଷି ଉପକରଣ ଉପରେ ସବସିଡି ପାଇଥାନ୍ତି । ଚାଷ ପାଇଁ ଆବଶ୍ୟକ ସମ୍ବଳ ମାଗଣା କିମ୍ବା ବହୁତ କମ୍ ମୂଲ୍ୟରେ ଦିଆଯାଇଥାଏ ।
ଯେଉଁଥିପାଇଁ ଭୁଟାନରେ କେହି ଦାରିଦ୍ର୍ୟ କିମ୍ବା କ୍ଷୁଧାରେ ପୀଡିତ ନୁହଁନ୍ତି । ଭୁଟାନର ଲୋକମାନେ ଗର୍ବର ସହିତ ସେମାନଙ୍କର ସଂସ୍କୃତି ଏବଂ ପରମ୍ପରାକୁ ବହନ କରନ୍ତି । ଏଠାରେ ପୁରୁଷମାନେ ଆଣ୍ଠୁ ପର୍ଯ୍ୟନ୍ତ ଲମ୍ବା ପୋଷାକ ପିନ୍ଧନ୍ତି ଏବଂ ମହିଳାମାନେ ମଧ୍ୟ ଲମ୍ବା ପୋଷାକ ପିନ୍ଧନ୍ତି । ସାଧାରଣ ଲୋକମାନେ ଧଳା ସ୍କାର୍ଫ ପିନ୍ଧୁଥିବା ବେଳେ ସମ୍ଭ୍ରାନ୍ତ ଏବଂ ଭିକ୍ଷୁମାନେ ହଳଦିଆ ସ୍କାର୍ଫ ପିନ୍ଧନ୍ତି । ଭୁଟାନରେ ନିଜ ସଂସ୍କୃତି ଏବଂ ପରମ୍ପରାକୁ ବଞ୍ଚାଇବା ପାଇଁ ବିଦେଶୀ ପ୍ରଭାବ ଉପରେ ତୀକ୍ଷ୍ଣ ନଜର ରଖାଯାଏ । ସେହିଭଳି ପରିବେଶ ସଂରକ୍ଷଣରେ ମଧ୍ୟ ଭୁଟାନ ଆଗରେ ରହିଛି । ୧୯୯୯ ମସିହାରୁ ଏଠାରେ ପ୍ଲାଷ୍ଟିକ୍ ବ୍ୟାଗ ନିଷେଧ କରାଯାଇଛି । ତମାଖୁ ପ୍ରାୟ ବେଆଇନ ।
ଦେଶର ୬୦ ପ୍ରତିଶତ ସବୁବେଳେ ଜଙ୍ଗଲ ରହିବା ଉଚିତ୍ । ଏହି ଦେଶରେ ୨୦୧୫ରେ ଗୋଟିଏ ଘଣ୍ଟାରେ ୫୦ ହଜାର ଗଛ ଲଗାଇ ବିଶ୍ୱ ରେକର୍ଡ ସୃଷ୍ଟି ହୋଇଥିଲା । ଭୁଟାନ ଜାଣିଶୁଣି ବଡ଼ ପର୍ଯ୍ୟଟନରୁ ଦୂରେଇ ରୁହୁଛି, ଯାହାଦ୍ୱାରା ଦେଶର ପ୍ରାକୃତିକ ଓ ସାଂସ୍କୃତିକ ଐତିହ୍ୟକୁ ସୁରକ୍ଷା ମିଳିବ । ଭୁଟାନରେ ୨୦୦୮ରେ ଜାତୀୟ ଖୁସି ସମିତି ଗଠନ କରାଯାଇଥିଲା । ଜନଗଣନାରେ, ଲୋକଙ୍କୁ ପଚରାଯାଏ ଯେ ସେମାନେ ନିଜ ଜୀବନରେ ଖୁସି ଅଛନ୍ତି କି ନାହିଁ । ଭୁଟାନର ଅଧିକାଂଶ ଲୋକ ବୌଦ୍ଧ ଧର୍ମରେ ବିଶ୍ୱାସ କରନ୍ତି, ଯାହା ସମସ୍ତ ଜୀବଜନ୍ତୁଙ୍କ ପ୍ରତି ସମ୍ମାନ ଶିକ୍ଷା ଦେଇଥାଏ । ପ୍ରାକୃତିକ ସୌନ୍ଦର୍ଯ୍ୟରେ ଭରପୂର ଏହି ଦେଶ କୌଣସି ସ୍ୱର୍ଗ ଠାରୁ କମ୍ ନୁହେଁ ।
