ଭୁବନେଶ୍ୱର: ଆଜି ଭାଙ୍ଗିବନି ବିବାଦୀୟ ବୈକୁଣ୍ଠଧାମ ଆଶ୍ରମ । ଅନ୍ତରୀଣ ରହିତାଦେଶ ଜାରି କରିଛନ୍ତି ହାଇକୋର୍ଟ । ଡିସେମ୍ବର ୧୨ ତାରିଖ ପର୍ୟ୍ୟନ୍ତ ବୈକୁଣ୍ଠଧାମ ଆଶ୍ରମକୁ ନଭାଙ୍ଗିବାକୁ ହାଇକୋର୍ଟ ରହିତାଦେଶ ଦେଇଛନ୍ତି। ପରବର୍ତ୍ତୀ ଆଦେଶ ନଆସିବା ପର୍ୟ୍ୟନ୍ତ ଏହି ରହିତାଦେଶ ବଳବତ୍ତର ରହିବ। ପ୍ରଶାସନର ଆଶ୍ରମ ଭାଙ୍ଗିବା ନିଷ୍ପତ୍ତିକୁ ବିରୋଧ କରି ବୈକୁଣ୍ଠଧାମ କର୍ତ୍ତୃପକ୍ଷ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ । କୋର୍ଟ ଶୁଣାଣି କରି ଅନ୍ତରୀଣ ରହିତାଦେଶ ପ୍ରଦାନ କରିଛନ୍ତି । ତେବେ ଦ୍ୱନ୍ଦ୍ୱ ବଢ଼ାଇଛି ହାଇକୋର୍ଟଙ୍କ ନିର୍ଦ୍ଦେଶ । ବିବାଦୀୟ ବୈକୁଣ୍ଠଧାମ ଆଶ୍ରମର ପ୍ଲଟ ନମ୍ବର ୯୦୩୭,୯୦୩୮ ହୋଇଥିବାବେଳେ ହାଇକୋର୍ଟ ନିର୍ଦ୍ଦେଶରେ ଲେଖାଯାଇଛି ପ୍ଲଟ ନମ୍ବର ୧୨୧୫, ଯାହକୁ ନେଇ ଦ୍ୱନ୍ଦ୍ୱରେ ବିଡିଏ ଅଧିକାରୀ । ଗୁରୁବାର ସନ୍ଧ୍ୟାରେ ଉଚ୍ଛେଦ ପାଇଁ ବିଡିଏ କରିଥିଲା ଘୋଷଣା । ଭୁବନେଶ୍ୱର ଖଣ୍ଡଗିରିବାରିରେ ଥିବା ବୈକୁଣ୍ଠ ଧାମ ଆଶ୍ରମ ଆସନ୍ତାକାଲି ସକାଳୁ ଭାଙ୍ଗିବାକୁ ବିଡିଏ ଘୋଷଣା କରିଥିଲା। ଆଶ୍ରମ ଭିତରେ ଥିବା ଜିନିଷପତ୍ର ଖାଲି କରିବା ପାଇଁ ଡାକବାଜି ଯନ୍ତ୍ର ଯୋଗେ ସୂଚନା ଦିଆଯାଇଥିଲା।
