ଗୁଜରାଟ: ଶନିବାର ଦିନ ଗୁଜରାଟର ରାଜକୋଟ ଜିଲ୍ଲାରେ ଏକ ହାଇୱେରେ ଏକ ଏସ୍ୟୁଭି ଓଲଟି ପଡ଼ିବାରୁ ତିନି ଜଣ ଇଞ୍ଜିନିୟରିଂ କଲେଜ ଛାତ୍ରଙ୍କ ମୃତ୍ୟୁ ଘଟିଛି ଏବଂ ଅନ୍ୟ ଆଠ ଜଣ ଆହତ ହୋଇଛନ୍ତି। ଜଣେ ପୋଲିସ ଅଧିକାରୀ କହିଛନ୍ତି ଯେ ଜସଦାନ ତାଲୁକାର ଜାଙ୍ଗୱାଡ ଗାଁ ନିକଟରେ ରାତି ପ୍ରାୟ ୧.୩୦ ସମୟରେ ଏହି ଦୁର୍ଘଟଣା ଘଟିଥିଲା। ଇଞ୍ଜିନିୟରିଂ କଲେଜ ଛାତ୍ରଙ୍କ ଏକ ଦଳ ଦିଉ ଯାଉଥିଲା। ବାଟରେ ସେମାନଙ୍କ ଗାଡ଼ି ଦୁର୍ଘଟଣାଗ୍ରସ୍ତ ହୋଇଥିଲା। ଏହି ଦୁର୍ଘଟଣାରେ ତିନି ଜଣଙ୍କ ମୃତ୍ୟୁ ଘଟିଛି ଏବଂ ଅନେକ ଆହତ ହୋଇଛନ୍ତି। ଆଟକୋଟ ପୋଲିସ ଷ୍ଟେସନର ଇନ୍ସପେକ୍ଟର ଆର ଏସ ସାକାରିଆ କହିଛନ୍ତି ଯେ ମୃତକମାନେ ହେଲେ ନରେଶ କୋଡାବତୀ (୧୯), ମୋଥି ହର୍ଷ (୧୭) ଏବଂ ଆଫିଧ ସୟଦ (୧୭)। ସମସ୍ତେ ଆନ୍ଧ୍ରପ୍ରଦେଶର। ସେ କହିଛନ୍ତି, “ରାଜକୋଟର ଆରକେ ବିଶ୍ୱବିଦ୍ୟାଳୟର ୧୨ ଜଣ ଛାତ୍ର ଏକ ଭଡା ଏସୟୁଭିରେ ଛୁଟି କାଟିବା ପାଇଁ ଦିଉ ଯାତ୍ରା କରୁଥିଲେ।” ଅଧିକାରୀ କହିଛନ୍ତି ଯେ କାର ଚଳାଉଥିବା ଛାତ୍ରଟି ମୋଡ଼ ନେବା ସମୟରେ ନିୟନ୍ତ୍ରଣ ହରାଇ ବସିଥିଲା, ଯାହା ଫଳରେ କାରଟି ରାଜ୍ୟ ରାଜପଥରେ ଓଲଟି ପଡ଼ିଥିଲା ଏବଂ ତିନି ଜଣଙ୍କର ମୃତ୍ୟୁ ହୋଇଥିଲା।
ଆଠ ଜଣ ଆହତଙ୍କ ମଧ୍ୟରୁ ଦୁଇଜଣଙ୍କର ଫ୍ରାକ୍ଚର ହୋଇଥିଲା ଏବଂ ସେମାନଙ୍କୁ ଚିକିତ୍ସା କରାଯାଇ ହସ୍ପିଟାଲରୁ ଡିସଚାର୍ଜ କରାଯାଇଥିଲା, ଅଧିକାରୀ କହିଛନ୍ତି। ସେ ଏହା ମଧ୍ୟ କହିଛନ୍ତି ଯେ ମୃତକଙ୍କ ମୃତଦେହ ପୋଷ୍ଟମର୍ଟମ ପାଇଁ ରାଜକୋଟ ସିଭିଲ୍ ହସ୍ପିଟାଲକୁ ନିଆଯାଇଛି। ଅଗଷ୍ଟ ୨୮ ତାରିଖରେ କଚ୍ଛ ଜିଲ୍ଲାରେ ଏକ ସିପିଂ କଣ୍ଟେନର ଟ୍ରେଲରରୁ ଖସି ପଡ଼ିବାରୁ ଜଣେ କିଶୋର ସମେତ ତିନି ଜଣଙ୍କର ମୃତ୍ୟୁ ହୋଇଥିଲା। ପୋଲିସ ଅନୁଯାୟୀ, ଅପରାହ୍ନରେ ଅଞ୍ଜାର ସହର ନିକଟ ମୁନ୍ଦ୍ରା-ଅଞ୍ଜାର ରାଜପଥର ଖେଦୋଇ ଗ୍ରାମ ନିକଟରେ ଏହି ଘଟଣା ଘଟିଥିଲା। “ଟ୍ରେଲରରେ ବୋହି ଯାଉଥିବା ସିପିଂ କଣ୍ଟେନରଟି ଏକ ଦୁଇ ଚକିଆ ଯାନ ଉପରେ ପଡ଼ିଯିବାରୁ ଘଟଣାସ୍ଥଳରେ ତିନି ଜଣଙ୍କର ମୃତ୍ୟୁ ହୋଇଥିଲା। ହାଇୱେରେ ଦ୍ରୁତ ଗତିରେ ଟ୍ରେଲରଟି ଯାଉଥିବାରୁ ଏହା ନିୟନ୍ତ୍ରଣ ହରାଇଲା ଏବଂ ଏଥିରେ ରଖାଯାଇଥିବା କଣ୍ଟେନରଟି ଖସି ପଡ଼ିଲା,” ଅଞ୍ଜାର ପୋଲିସ ଷ୍ଟେସନର ଜଣେ ଅଧିକାରୀ କହିଛନ୍ତି। ସେ କହିଛନ୍ତି ଯେ ଉଦ୍ଧାରକାରୀ ଦଳ କଣ୍ଟେନରକୁ ବାହାର କରିବା ଏବଂ ମୃତକଙ୍କ ମୃତଦେହ ଉଦ୍ଧାର କରିବା ପାଇଁ କ୍ରେନ୍ ବ୍ୟବହାର କରିଥିଲେ।
