ହରିୟାଣା: ହରିୟାଣାର ଫରିଦାବାଦର ସୁରଜକୁଣ୍ଡ ମେଳା ଦୁର୍ଘଟଣା ମାମଲାରେ କାର୍ଯ୍ୟାନୁଷ୍ଠାନ। ଏହି ଘଟଣାରେ ସ୍ୱିଂ କମ୍ପାନୀର ମାଲିକ ଏବଂ ଅନ୍ୟ ଜଣେ ବ୍ୟକ୍ତିଙ୍କୁ ଗିରଫ କରିଛି ପଲିସି। ଏହି ମାମଲାର ତଦନ୍ତ ପାଇଁ ଏସଆଇଟି ଗଠନ କରାଯାଇଛି। ପୋଲିସ ସୂଚନା ଅନୁଯାୟୀ, ମାମଲାର ଗମ୍ଭୀରତାକୁ ଦୃଷ୍ଟିରେ ରଖି, ପୋଲିସ ମହାନିର୍ଦ୍ଦେଶକ ଅଜୟ ସିଂଘଲଙ୍କ ନିର୍ଦ୍ଦେଶରେ ପୋଲିସ କମିଶନର ଅଫ୍ କ୍ରାଇମ୍, ଆସିଷ୍ଟାଣ୍ଟ କମିଶନର ଅଫ୍ ପୋଲିସ କ୍ରାଇମ୍-୨, କ୍ରାଇମ୍ ବ୍ରାଞ୍ଚ (NIT)ର ଇନଚାର୍ଜ ଏବଂ ସୁରଜକୁଣ୍ଡ ପୋଲିସ ଷ୍ଟେସନର ସବ-ଇନ୍ସପେକ୍ଟର ସଞ୍ଜୟଙ୍କ ନେତୃତ୍ୱରେ ଏକ ତିନି ସଦସ୍ୟ ବିଶିଷ୍ଟ ସ୍ୱତନ୍ତ୍ର ତଦନ୍ତ ଦଳ (SIT) ଗଠନ କରାଯାଇଛି। ଏହି ଦଳ ବୈଜ୍ଞାନିକ ଏବଂ ବୈଷୟିକ ଆଧାର ଉପରେ ପୁଙ୍ଖାନୁପୁଙ୍ଖ ତଦନ୍ତ କରୁଛି।
ତଦନ୍ତ ସମୟରେ, ମେଳା ପରିସରରେ ରାଇଡଗୁଡ଼ିକ ସ୍ଥାପନ କରିଥିବା କମ୍ପାନୀ ହିମାଚଳ ଫନ୍ କେୟାରର ମାଲିକ ମହମ୍ମଦ ଶାକିରଙ୍କୁ ଗିରଫ କରାଯାଇଥିଲା। ସେ ହିମାଚଳ ପ୍ରଦେଶର ସିରମୌର ଜିଲ୍ଲାର ଟୋକା ନାଙ୍ଗଲା ଗାଁର ବାସିନ୍ଦା। ଆଉ ଜଣେ ଅଭିଯୁକ୍ତ, ଉତ୍ତର ପ୍ରଦେଶର ମିରଟ କ୍ୟାଣ୍ଟର ଧରମପୁରୀର ବାସିନ୍ଦା ନିତେଶଙ୍କୁ ମଧ୍ୟ ଗିରଫ କରାଯାଇଛି। ଏଥିରେ ସମ୍ପୃକ୍ତ ଅନ୍ୟ ବ୍ୟକ୍ତିଙ୍କ ଭୂମିକା ମଧ୍ୟ ତଦନ୍ତ କରାଯାଉଛି। ଡିଜିପି କହିଛନ୍ତି ଯେ ଇନ୍ସପେକ୍ଟର ଜଗଦୀଶ ପ୍ରସାଦ ଡ୍ୟୁଟିରେ ଥିବା ସମୟରେ ଆହତମାନଙ୍କୁ ଉଦ୍ଧାର କରିବା ପାଇଁ ଏକ ପ୍ରଶଂସନୀୟ ପ୍ରୟାସ କରିଥିଲେ। ତାଙ୍କ ମୃତ୍ୟୁ ପୋଲିସ ବିଭାଗ ପାଇଁ ଗଭୀର ଦୁଃଖଦ। ବିଭାଗ ତାଙ୍କ ପରିବାରକୁ ଯଥାସମ୍ଭବ ଆର୍ଥିକ ସହାୟତା ପ୍ରଦାନ କରିବ। ଅନୁକମ୍ପା ନୀତି ଅନୁଯାୟୀ ଯୋଗ୍ୟ ସଦସ୍ୟମାନଙ୍କୁ ନିଯୁକ୍ତି ମଧ୍ୟ ଯୋଗାଇ ଦିଆଯିବ।
