ନୂଆଦିଲ୍ଲୀ: ହାଇୱେରେ ଘଟୁଥିବା ଦୁର୍ଘଟଣା ନେଇ ସୁପ୍ରିମକୋର୍ଟଙ୍କ ଗୁରୁତ୍ବପୂର୍ଣ୍ଣ ଟିପ୍ପଣୀ। କୋର୍ଟଙ୍କ କହିବା ଅନୁସାରେ, କୌଣସି ସିଗନାଲ ନ ଦେଇ ହାଇୱେରେ ହଠାତ୍ ବ୍ରେକ୍ ଲଗାଇବା ଦାୟିତ୍ବହୀନ କାର୍ଯ୍ୟ ବୋଲି ବିବେଚନା କରାଯିବ। କୋର୍ଟ କହିଛନ୍ତି ଯେ ଯଦି ଏହାଦ୍ବାରା ଦୁର୍ଘଟଣା ଘଟେ, ତେବେ ଚାଳକଙ୍କୁ ଦାୟୀ କରାଯାଇପାରିବ। ବିଚାରପତି ସୁଧାଂଶୁ ଧୂଲିଆ ଏବଂ ବିଚାରପତି ଅରବିନ୍ଦ କୁମାରଙ୍କ ଖଣ୍ଡପୀଠ ମଙ୍ଗଳବାର ଏହି ରାୟ ଦେଇଛନ୍ତି। ବିଚାରପତି ଧୂଲିଆ କହିଛନ୍ତି, ‘ ହାଇୱେରେ ଯାନବାହାନ ଦ୍ରୁତ ଗତିରେ ଚାଲୁଥାଏ। ଯଦି ଜଣେ ଡ୍ରାଇଭର ତାଙ୍କ ଗାଡ଼ିକୁ ଅଟକାଇବାକୁ ଚାହାଁନ୍ତି, ତେବେ ତାଙ୍କ ପଛରେ ହାଇୱେରେ ଆସୁଥିବା ଗାଡ଼ିଗୁଡ଼ିକୁ ସିଗନାଲ ଦେବା ଜରୁରୀ।’
ଏହି ମାମଲା ତାମିଲନାଡୁର କୋଏମ୍ବାଟୁରରେ ୭ ଜାନୁଆରୀ ୨୦୧୭ରେ ଘଟିଥିବା ଏକ ଦୁର୍ଘଟଣା ସହିତ ଜଡିତ। ଇଞ୍ଜିନିୟରିଂ ଛାତ୍ର ଏସ ମହମ୍ମଦ ହାକିମ ତାଙ୍କ ବାଇକ୍ ରେ ଯାଉଥିବା ସମୟରେ ଜଣେ କାର ଡ୍ରାଇଭର ହଠାତ୍ ବ୍ରେକ୍ ଲଗାଇଲେ। ଏହି ସମୟରେ ହାକିମଙ୍କ ବାଇକ୍ କାର ସହିତ ଧକ୍କା ଖାଇଥିଲା ଏବଂ ସେ ରାସ୍ତାରେ ପଡ଼ିଗଲେ। ସେହି ସମୟରେ ପଛରୁ ଆସୁଥିବା ଏକ ବସ୍ ତାଙ୍କୁ ମାଡ଼ି ଯାଇଥିଲା, ଯାହା ପରେ ଚିକିତ୍ସା ସମୟରେ ତାଙ୍କ ବାମ ଗୋଡ଼କୁ କାଟିବାକୁ ପଡିଲା। ମାମଲାର ଶୁଣାଣି ସମୟରେ, କାର ଡ୍ରାଇଭର କୋର୍ଟକୁ କହିଥିଲେ ଯେ ତାଙ୍କ ଗର୍ଭବତୀ ପତ୍ନୀ ବାନ୍ତି କରିବା ଭଳି ଅନୁଭବ କରୁଥିବାରୁ ସେ ବ୍ରେକ୍ ଲଗାଇଥିଲେ। କିନ୍ତୁ ସୁପ୍ରିମକୋର୍ଟ ଏହି ଯୁକ୍ତିକୁ ଖାରଜ କରିଦେଇଥିଲେ।
ଏହି ସମୟରେ କୋର୍ଟ କହିଛନ୍ତି, କାର ଚାଳକ ପକ୍ଷରୁ ଦିଆଯାଇଥିବା ଯୁକ୍ତି ଯଥେଷ୍ଟ ନଥିଲା। ଯଦି କେହି ଜରୁରୀ ସ୍ଥିତିରେ ଥାଆନ୍ତି, ତେବେ ବି ହାଇୱେ ମଝିରେ ହଠାତ ବ୍ରେକ ଲଗାଇବା ବିପଦଜନକ ଓ ଦାୟିତ୍ବହୀନ କାର୍ଯ୍ୟ। ସୁପ୍ରିମକୋର୍ଟ ଦୁର୍ଘଟଣା ପାଇଁ ସମସ୍ତ ତିନି ପକ୍ଷଙ୍କୁ ଦାୟୀ କରି କରିଛନ୍ତି। ଦୁର୍ଘଟଣା ପାଇଁ କାର ଡ୍ରାଇଭର ୫୦% ଏବଂ ବସ୍ ଡ୍ରାଇଭର ୩୦% ଦାୟୀ। ଏହା ସହିତ, ବାଇକ୍ ଆରୋହୀ ହାକିମ ମଧ୍ୟ ୨୦% ଦାୟୀ। କାରଣ ତାଙ୍କ ପାଖରେ ବୈଧ ଡ୍ରାଇଭିଂ ଲାଇସେନ୍ସ ନଥିଲା। ଏପରିକି ସେ କାରଠାରୁ ପର୍ଯ୍ୟାପ୍ତ ଦୂରତା ବଜାୟ ରଖି ନଥିଲେ, ଯାହା ତାଙ୍କର ଅବହେଳା ଥିଲା।
