ପୁରୀ: କଣାସ ବ୍ଲକ ଅନ୍ତର୍ଗତ ଗଡିଶାଗୋଦା ଗ୍ରାମପଞ୍ଚାୟତ ନୂଆଗାଁ ଗ୍ରାମର ସୁବାସ ଦଳେଇଙ୍କ ୯ବର୍ଷର ଝିଅ ଝରଣା ଦଳେଇ ଆଜି ସକାଳେ ଦୟାନଦୀରେ ଗାଧୋଉଥିବା ସମୟରେ ବୁଡିଯାଇ ମୃତ୍ୟୁବରଣ କରିଥିବା ଜଣାପଡିଛି । ଖବର ନେବାରେ ଜଣାପଡିଛି ଯେ ୨ଜଣ ଛାତ୍ର ଓ ୨ଜଣ ଛାତ୍ରୀ ଆଜି ସକାଳେ ନୂଆଗାଁ ଠାରେ ଦୟାନଦୀରେ ଗାଧୋଉଥିବା ସମୟରେ ବୁଡିଯାଇଥିଲେ ।
ସେମାନଙ୍କ ମଧ୍ୟରୁ ୨ଜଣ ଛାତ୍ର ଓ ଜଣେ ଛାତ୍ରୀଙ୍କୁ ସ୍ଥାନୀୟ ଲୋକ ବୁଡିଯାଉଥିବା ସମୟରେ ଉଦ୍ଧାର କରିଥିଲେ । କିନ୍ତୁ ଛାତ୍ରୀ ଝରଣାଙ୍କୁ ପାଇନଥିଲେ । ବହୁ ସମୟ ଖୋଜାଖୋଜି କରିବା ପରେ ଝରଣାଙ୍କୁ ଦୟାନଦୀରୁ ଉଦ୍ଧାର କରି କଣାସ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଅବସ୍ଥା ସଂଙ୍କାଟାପନ୍ନ ଥିବାରୁ ଡାକ୍ତର ପୁରୀ ମେଡିକାଲକୁ ପଠାଇଦେଇଥିଲେ । ପୁରୀଠାରେ ଡାକ୍ତର ଝରଣାକୁ ମୃତ ଘୋଷଣା କରିଥିଲେ ।
