ଭୁବନେଶ୍ୱର: ସବୁଜିମାକୁ ବୃଦ୍ଧି କରିବା ସହ ପରିବେଶ ସନ୍ତୁଳନ ସଚେତନତା ବାର୍ତା ପ୍ରଦାନ କରିବାର ଲକ୍ଷ୍ୟ ନେଇ ଶିକ୍ଷା ଓ ଅନୁସନ୍ଧାନ (ସୋଆ)ର ଏନ୍ଏସ୍ଏସ୍ ଶାଖା ପକ୍ଷରୁ ଗତ ଜୁଲାଇ ୧୬ ତାରିଖ ଦିନ ଖୋର୍ଦ୍ଧା ଜିଲ୍ଲା ଛତାବର ସ୍ଥିତ ବିଶ୍ୱବିଦ୍ୟାଳୟର କୃଷି ଗବେଷଣା କେନ୍ଦ୍ର ଠାରେ ଏକ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜିତ ହୋଇଯାଇଛି । ପ୍ରାୟ ୭୦ ଜଣ ଏନ୍ଏସ୍ଏସ୍ ସ୍ୱେଚ୍ଛାସେବୀ, ଫ୍ୟାକଲ୍ଟି ମେମ୍ବର୍ସ ଏବଂ ସ୍ଥାନୀୟ ଅଂଚଳର ବାସିନ୍ଦା ଏହି ବୃକ୍ଷରୋପଣ କାର୍ଯ୍ୟକ୍ରମରେ ଯୋଗ ଦେଇ ଜାମୁ କୋଳି, ଓଉ, ବେଲ ଏବଂ ବଉଳ ଗଛର ଚାରା ରୋପଣ କରିବା ସହ ପରିବେଶର ସୁରକ୍ଷା ନିମନ୍ତେ ଶପଥ ନେଇଥିଲେ । ଏହି ବୃକ୍ଷରୋପଣ କାର୍ଯ୍ୟକ୍ରମର ନାମକରଣ ରଖାଯାଇଥିଲା ‘ଏକ୍ ପେଡ ମା’ କେ ନାମ ୨.୦’ ।
ଏହି ଅବସରରେ ପରିବେଶ ସଚେତନତା ନେଇ ଏକ କୁଇଜ କାର୍ଯ୍ୟକ୍ରମ ମଧ୍ୟ ଏନ୍ଏସ୍ଏସ୍ ସ୍ୱେଚ୍ଛାସେବୀଙ୍କ ଦ୍ୱାରା ଆୟୋଜିତ ହୋଇଥିଲା । କାର୍ଯ୍ୟକ୍ରମରେ ସୋଆ ପରିଚାଳିତ ଇନ୍ଷ୍ଟିଚ୍ୟୁଟ୍ ଅଫ୍ ଏଗ୍ରିିକଲ୍ଚରାଲ ସାଇନ୍ସେସ୍ (ଆଇଏଏସ୍)ର ଡିନ୍ ପ୍ରଫେସର ସନ୍ତୋଷ କୁମାର ରାଉତ, ସୋଆ ୟୁନିଭର୍ସିଟି ଆଉଟରିଚ ପ୍ରୋଗ୍ରାମ ଏବଂ ଇଂଟରନ୍ୟାସ୍ନାଲ ରିଲେସନ୍ସର ନିର୍ଦ୍ଦେଶକ ପ୍ରଫେସର ନଚିକେତା କେ. ଶର୍ମା, ଏନ୍ଏସ୍ଏସ୍ ପ୍ରୋଗ୍ରାମର କୋଅର୍ଡିନେଟର ଡକ୍ଟର କମଳ ଲୋଚନ ମହନ୍ତ, ଏନ୍ଏସ୍ଏସ୍ ପ୍ରୋଗ୍ରାମ ଅଫିସର ପ୍ରଫେସର ସରୋଜ କୁମାର ମହାନ୍ତି ଏବଂ ଡକ୍ଟର ନିଲେଶ ଜେନା, ଓଡ଼ିଶା ଏନ୍ଭାଇରନ୍ମେଂଟାଲ୍ ସୋସାଇଟିର କାର୍ଯ୍ୟକାରୀ ସଭାପତି ଶ୍ରୀ ରାଜ ଶେଖର ବେହେରା, ଡକ୍ଟର ଜୟକୃଷ୍ଣ ପାଣିଗ୍ରାହୀ, ଓଇଏସ୍ର ଉପସଭାପତି ଡକ୍ଟର ବିଜୟ କେତନ ପଟ୍ଟନାୟକ ଏବଂ ଡକ୍ଟର ଲାଲା ଅଶ୍ୱିନୀ କୁମାର ସିଂହ, ଓଇଏସ୍ର ସଂପାଦକ ଶ୍ରୀ ମନୋରଞ୍ଜନ ମିଶ୍ର, ଓୟୁଏଟିର ପୂର୍ବତନ ପ୍ରଫେସର ଡକ୍ଟର ନିମାଇ ଚରଣ ମିଶ୍ର ଏବଂ ଓୟୁଏଟି ଏନ୍ଏସ୍ଏସ୍-ଇଟିଆଇର ଟ୍ରେନିଂ କୋଅର୍ଡିନେଟର ଶ୍ରୀ ନିରୋଦ ବରଣ ଖୁଂଟିଆ ଉପସ୍ଥିତ ଥିଲେ । ଡକ୍ଟର ମହନ୍ତ ସ୍ଥାନୀୟ ଲୋକଙ୍କ ଦ୍ୱାରା ବୃକ୍ଷରୋପଣ ଗ୍ରାମର ଲୋକମାନଙ୍କୁ ଚାରା ମଧ୍ୟ ପ୍ରଦାନ କରିଥିଲେ ।
