ଇସଲାମାବାଦ: ପାକିସ୍ତାନ ବିରୋଧରେ ବଲୁଚ ବିଦ୍ରୋହୀ ଏବେ ଅଧିକ ସକ୍ରିୟ ହୋଇପଡ଼ିଛନ୍ତି । ଗତ କିଛି ଦିନ ଧରି ଏମାନେ ପାକିସ୍ତାନ ସେନା, ସାମରିକ ଘାଟିଗୁଡ଼ିକ ଉପରେ ଆକ୍ରମଣ କରିଆସୁଥିବା ବେଳେ ଶୁକ୍ରବାର ଏକ ବସ୍ ଉପରେ ଆକ୍ରମଣ କରିଛନ୍ତି । ଏପରିକି ବସ୍ରେ ଥିବା ଯାତ୍ରୀମାନଙ୍କୁ ସେମାନଙ୍କ ପରିଚୟ ପଚାରି ୯ ଜଣଙ୍କୁ ହତ୍ୟା କରିଛନ୍ତି । ଯଦିଓ ଏହି ଘଟଣା ପାଇଁ ବଲୁଚ ନିଜକୁ ସିଧାସଳଖ ଦାୟୀ କରିନାହିଁ କିନ୍ତୁ ଘଟଣାର ରୂପରେଖ ଦେଖିବା ପରେ ଏସବୁ ପଛରେ ବଲୁଚ ବିଦ୍ରୋହୀ ଗୋଷ୍ଠୀ ଥିବା ଅନୁମାନ କରାଯାଉଛି ।
ଶୁକ୍ରବାର ପାକ୍ ଅଧିକାରୀମାନେ କହିଛନ୍ତି, ପାକିସ୍ତାନର ଦକ୍ଷିଣ-ପଶ୍ଚିମ ବଲୁଚିସ୍ତାନ ପ୍ରଦେଶରେ ସଶସ୍ତ୍ର ଲୋକମାନେ ୯ ବସ୍ ଯାତ୍ରୀଙ୍କୁ ଅପହରଣ କରିବା ପରେ ହତ୍ୟା କରିଛନ୍ତି । ପ୍ରାଦେଶିକ ସରକାରଙ୍କ ମୁଖପାତ୍ର ଶାହିଦ ରିନ୍ଦ କହିଛନ୍ତି ଯେ ଗୁରୁବାର ସନ୍ଧ୍ୟାରେ ଯାତ୍ରୀମାନଙ୍କୁ ଅନେକ ବସ୍ରୁ ଅପହରଣ କରାଯାଇଥିଲା । ଶୁକ୍ରବାର ସମସ୍ତ ଅପହୃତ ବ୍ୟକ୍ତିଙ୍କ ମୃତଦେହ ଉଦ୍ଧାର କରାଯାଇଛି । ବିଚ୍ଛିନ୍ନତାବାଦୀ ବାଲୁଚ୍ ଆତଙ୍କବାଦୀମାନେ ଅତୀତରେ ଏପରି ଘଟଣାରେ ଜଡିତ ଅଛନ୍ତି । ଏମାନେ ପୂର୍ବ ପଞ୍ଜାବ ପ୍ରଦେଶରୁ ଆସୁଥିବା ଯାତ୍ରୀମାନଙ୍କୁ ଚିହ୍ନଟ କରିବା ପରେ ସେମାନଙ୍କୁ ହତ୍ୟା କରିଛନ୍ତି । ଖଣିଜ ସମୃଦ୍ଧ ଅଞ୍ଚଳ ଆଫଗାନିସ୍ତାନ ଏବଂ ଇରାନ ସୀମାବର୍ତ୍ତୀ ଅଞ୍ଚଳରେ ଦୀର୍ଘ ଦିନ ଧରି କାର୍ଯ୍ୟ କରୁଥିବା ଅନେକ ବିଦ୍ରୋହୀ ଗୋଷ୍ଠୀ ମଧ୍ୟରୁ ବଲୁଚ୍ ମୁକ୍ତି ସେନା ସବୁଠାରୁ ଶକ୍ତିଶାଳୀ ହୋଇଥିବା ବେଳେ ଏମାନେ ପଞ୍ଜାବ ପ୍ରଦେଶରେ ଖର୍ଚ୍ଚ ପାଇଁ ପାଣ୍ଠି ଯୋଗାଇବା ପାଇଁ ପାକିସ୍ତାନ ସେମାନଙ୍କର ଆଞ୍ଚଳିକ ସମ୍ବଳ ଚୋରି କରୁଥିବା ଅଭିଯୋଗ ଆଳରେ ଶସ୍ତ୍ର ଉଠାଇଛନ୍ତି ।
