ଲଳିତଗିରି/ ଭୁବନେଶ୍ୱର: ତୀୟ ଗୁରୁ ପଦ୍ମସମ୍ଭବ ସମାରୋହ ଅନୁଷ୍ଠିତ ହେବା ସହିତ ଲଳିତଗିରିର ପବିତ୍ର ପରିସର ଏକ ଗଭୀର ଆଧ୍ୟାତ୍ମିକ ଏବଂ ଐତିହାସିକ ଗୁରୁତ୍ୱପୂର୍ଣ୍ଣ ମୁହୂର୍ତ୍ତର ସାକ୍ଷୀ ହୋଇଛି। ଏହି କାର୍ଯ୍ୟକ୍ରମରେ ଦେଶ ତଥା ବିଦେଶରୁ ପୂଜ୍ୟ ବୌଦ୍ଧ ଭିକ୍ଷୁ, ବିଶିଷ୍ଟ ପଣ୍ଡିତ, ଆଧ୍ୟାତ୍ମିକ ସାଧକ ଏବଂ ଭକ୍ତମାନେ ଯୋଗ ଦେଇଥିଲେ। ଏହି ସମାରୋହ ବଜ୍ରଯାନ ବୌଦ୍ଧ ଧର୍ମର ପ୍ରଚାରକ ଭାବେ ପରିଚିତ ପୂଜ୍ୟ ବୌଦ୍ଧ ଗୁରୁ ପଦ୍ମସମ୍ଭବଙ୍କ ସ୍ମୃତିରେ ଆୟୋଜିତ ହୋଇଥିଲା ଏବଂ ଏଠାରେ ତାଙ୍କର କରୁଣା, ସଚେତନତା ଓ ଜ୍ଞାନୋଦୟର ଶିକ୍ଷା ଉପରେ ଆଲୋକପାତ କରାଯାଇଥିଲା । ଏହି ଗୁରୁତ୍ୱପୂର୍ଣ୍ଣ ଅବସରରେ, ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା (ASI) ଦ୍ୱାରା ଚିହ୍ନିତ ଖ୍ରୀଷ୍ଟପୂର୍ବ ତୃତୀୟ ଶତାବ୍ଦୀର ଏକ ବିରଳ ବୌଦ୍ଧ ଅବଶେଷକୁ ଜାନୁଆରୀ ୧୬ ତାରିଖରେ ଏହାର ସୁରକ୍ଷିତ ଆବେଷ୍ଟନୀରୁ ବାହାର କରି ଏଏସଆଇ ଲଳିତଗିରି ସଂଗ୍ରହାଳୟରେ ସର୍ବସାଧାରଣଙ୍କ ଦର୍ଶନ ପାଇଁ ରଖାଯାଇଥିଲା। ସାଧାରଣତଃ କଡ଼ା ସଂରକ୍ଷଣ ନିୟମ ମଧ୍ୟରେ ରଖାଯାଉଥିବା ଏହି ଅବଶେଷକୁ ଧାର୍ମିକ ପାଳନର ଏକ ଅଂଶ ଭାବରେ ସର୍ବସାଧାରଣଙ୍କ ପାଇଁ ଉପଲବ୍ଧ କରାଯାଇଥିଲା, ଯାହା ଶ୍ରଦ୍ଧାଳୁମାନଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିବାର ଏକ ବିରଳ ଏବଂ ଭକ୍ତିପୂର୍ଣ୍ଣ ସୁଯୋଗ ପ୍ରଦାନ କରିଥିଲା।
ଭାରତୀୟ ପ୍ରତ୍ନତତ୍ତ୍ୱ ସର୍ବେକ୍ଷଣ ସଂସ୍ଥା, ପର୍ଯ୍ୟଟନ ବିଭାଗ ଏବଂ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ମିଳିତ ସହଯୋଗରେ ଆୟୋଜିତ ଏହି ପବିତ୍ର ଅବଶେଷର ପ୍ରଦର୍ଶନ ଏକ ପ୍ରଶଂସନୀୟ ପ୍ରୟାସ। ଏହି ପଦକ୍ଷେପ ଓଡ଼ିଶାର ସମୃଦ୍ଧ ବୌଦ୍ଧ ଐତିହ୍ୟର ସଂରକ୍ଷଣ, ଏବଂ ପ୍ରସାର ପାଇଁ ସମ୍ପୃକ୍ତ ବିଭାଗଗୁଡ଼ିକର ଏକନିଷ୍ଠ ପ୍ରତିବଦ୍ଧତାକୁ ଦର୍ଶାଉଛି। ଅବଶେଷର ଉନ୍ମୋଚନ ଏହି ସମାରୋହର ମୁଖ୍ୟ ଆଧ୍ୟାତ୍ମିକ ଆକର୍ଷଣ ଥିଲା। ବହୁ ସଂଖ୍ୟାରେ ପୂଜ୍ୟ ଭିକ୍ଷୁ, ବୌଦ୍ଧ ପଣ୍ଡିତ, ସାଧକ ଏବଂ ଭକ୍ତମାନେ ଏକତ୍ରିତ ହୋଇ ପ୍ରାର୍ଥନା କରିବା ସହ ଆଶୀର୍ବାଦ ଗ୍ରହଣ କରିଥିଲେ। ଏହା ବୌଦ୍ଧ ଧର୍ମର ଏକ ପ୍ରାରମ୍ଭିକ ଗୁରୁତ୍ୱପୂର୍ଣ୍ଣ କେନ୍ଦ୍ର ଭାବରେ ଲଳିତଗିରିର ସ୍ଥାୟୀ ଆଧ୍ୟାତ୍ମିକ ମହିମାକୁ ପ୍ରମାଣିତ କରିଛି। ଧାର୍ମିକ କର୍ତ୍ତୃପକ୍ଷ ଏବଂ ପ୍ରତ୍ନତତ୍ତ୍ୱ ସଂରକ୍ଷକଙ୍କ ମଧ୍ୟରେ ଉପଯୁକ୍ତ ସମନ୍ୱୟ ରକ୍ଷା କରି ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା, ଯାହା ଦ୍ୱାରା ଅବଶେଷର, ନିରାପତ୍ତା ଏବଂ ସଂରକ୍ଷଣ ବଜାୟ ରହିଥିଲା। ଅବଶେଷର ସର୍ବସାଧାରଣ ପ୍ରଦର୍ଶନ କେବଳ ଭକ୍ତମାନଙ୍କ ଆଧ୍ୟାତ୍ମିକ ଅନୁଭୂତିକୁ ଗଭୀର କରିନାହିଁ, ବରଂ ଓଡ଼ିଶାର ସମୃଦ୍ଧ ବୌଦ୍ଧ ଐତିହ୍ୟ ଏବଂ ସମସାମୟିକ ଆଧ୍ୟାତ୍ମିକ ଆଲୋଚନାରେ ଏହାର ନିରନ୍ତର ପ୍ରାସଙ୍ଗିକତାକୁ ମଧ୍ୟ ଉଜ୍ଜୀବିତ କରିଛି। ଏହି କାର୍ଯ୍ୟକ୍ରମ ଲଳିତଗିରିର ଗୁରୁତ୍ୱକୁ ବିଶ୍ୱ ବୌଦ୍ଧ ମାନଚିତ୍ରରେ ପୁନଃ ପ୍ରତିଷ୍ଠିତ କରିବା ସହିତ ପ୍ରାଚୀନ ବୌଦ୍ଧ ସଭ୍ୟତା, ଐତିହ୍ୟ ଏବଂ ଜୀବନ୍ତ ପରମ୍ପରାର ରକ୍ଷକ ଭାବରେ ଓଡ଼ିଶାର ସ୍ଥାନକୁ ଅଧିକ ସୁଦୃଢ଼ କରିଛି।
ଲଳିତଗିରିଠାରେ ଦ୍ୱିତୀୟ ଗୁରୁ ପଦ୍ମସମ୍ଭବ ସମାରୋହ ଅବସରରେ ଖ୍ରୀଷ୍ଟପୂର୍ବ ତୃତୀୟ ଶତାବ୍ଦୀର ପବିତ୍ର ବୌଦ୍ଧ ଅବଶେଷ ସର୍ବସାଧାରଣଙ୍କ ଦର୍ଶନ ପାଇଁ ପ୍ରଦର୍ଶିତ
