ୟୁକ୍ରେନ: ଋଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଜାରି ରହିଛି। ଯୁଦ୍ଧ ମଧ୍ୟରେ, ଋଷ ପକ୍ଷରୁ ୟୁକ୍ରେନର ଅନେକ ସହର ଉପରେ ମାରାତ୍ମକ ଆକ୍ରମଣ କରାଯାଉଛି। ଏହି ସମୟରେ, ଋଷ ପୁଣି ଥରେ ୟୁକ୍ରେନର ରାଜଧାନୀ କିଭ ଉପରେ ଏକ ବଡ଼ ଆକ୍ରମଣ କରିଛି। ୟୁକ୍ରେନୀୟ ଅଧିକାରୀମାନେ କହିଛନ୍ତି ଯେ ଋଷ କ୍ଷେପଣାସ୍ତ୍ର ଏବଂ ଡ୍ରୋନ ସାହାଯ୍ୟରେ ଆକ୍ରମଣ କରିଛି। ଗୁରୁବାର ପ୍ରତ୍ୟୁଷରେ ଋଷ ଏହି ଆକ୍ରମଣ କରିଛି। ୟୁକ୍ରେନର ରାଜଧାନୀ କିଭ୍ରେ ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣରେ ଅତି କମରେ ୧୨ ଜଣଙ୍କର ମୃତ୍ୟୁ ହୋଇଥିବା ଏବଂ ୪୮ ଜଣ ଆହତ ହୋଇଥିବା ଅଧିକାରୀମାନେ କହିଛନ୍ତି। କିଭ୍ର ସହରାଞ୍ଚଳ ପ୍ରଶାସନର ମୁଖ୍ୟ ତୈମୁର ତକାଚେଙ୍କୋ କହିଛନ୍ତି ଯେ ମୃତକଙ୍କ ମଧ୍ୟରେ ଜଣେ ୧୪ ବର୍ଷୀୟ କିଶୋର ମଧ୍ୟ ଅଛନ୍ତି। ତକାଚେଙ୍କୋ କହିଛନ୍ତି ଯେ ଏକ ଆବାସିକ କୋଠାରେ ସିଧାସଳଖ ଆଘାତ ଲାଗିଛି। ସେ କହିଛନ୍ତି, “ସବୁକିଛି ନଷ୍ଟ ହୋଇଯାଇଛି।”
ସ୍ଥାନୀୟ ଅଧିକାରୀମାନେ କହିଛନ୍ତି ଯେ ଏହି ଆକ୍ରମଣରେ ରାଜଧାନୀର ୨୦ରୁ ଅଧିକ ଅଞ୍ଚଳ ପ୍ରଭାବିତ ହୋଇଛି। ଧ୍ୱଂସାବଶେଷ ତଳେ ଫସି ରହିଥିବା ଲୋକଙ୍କୁ ବାହାର କରିବା ପାଇଁ ଉଦ୍ଧାରକାରୀ ଦଳ ଘଟଣାସ୍ଥଳରେ ଉପସ୍ଥିତ ଅଛନ୍ତି। ୟୁକ୍ରେନରେ ତିନି ବର୍ଷ ଧରି ଚାଲିଥିବା ଯୁଦ୍ଧର ଅନ୍ତ ଘଟାଇବା ପାଇଁ ଏହି ମାସ ଆରମ୍ଭରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଆଲାସ୍କାରେ ସାକ୍ଷାତ କରିବା ପରେ ଗୁରୁବାରର ଆକ୍ରମଣ ହେଉଛି କିଭରେ ପ୍ରଥମ ବଡ଼ ଆକ୍ରମଣ। ଏହି ସମୟରେ, ରିପୋର୍ଟ ଆସିଛି ଯେ ରୁଷ ସେନା ଡୋନେଟ୍ସ୍କ ପ୍ରଦେଶର ଡ୍ନିପ୍ରୋପେଟ୍ରୋଭସ୍କ ଅଞ୍ଚଳର ଅନେକ ଗ୍ରାମକୁ କବଜା କରିଛି। ରୁଷ ସେନା ଯେଉଁ ଅଞ୍ଚଳକୁ କବଜା କରିଛି ତାହା ୟୁକ୍ରେନର ଏକ ବଡ଼ ଶିଳ୍ପ କ୍ଷେତ୍ର। ଏହା ୟୁକ୍ରେନର ଅଷ୍ଟମ ଅଂଶ ଯେଉଁଠାରେ ରୁଷ ସେନା ଯୁଦ୍ଧ କରିବାକୁ ଆଗେଇ ଆସିଛି। କେବଳ ଏତିକି ନୁହେଁ, ଡୋନେଟ୍ସ୍କର ଅନେକ ମୋର୍ଚ୍ଚାରେ ରୁଷ ଏବଂ ୟୁକ୍ରେନର ସେନା ମଧ୍ୟରେ ଭୟଙ୍କର ଯୁଦ୍ଧ ଚାଲିଛି।
