ଭୁବନେଶ୍ୱର: ରାଜ୍ୟରେ ଗୁଟଖା, ପାନ ମସଲା ଉପରେ କଟକଣା ଲାଗୁ। ଓଡ଼ିଶା ସରକାର ସାରା ରାଜ୍ୟରେ ଗୁଟଖା, ପାନ ମସଲା, ଜର୍ଦ୍ଦା, ଖଇନି ଏବଂ ତମାଖୁ କିମ୍ବା ନିକୋଟିନ ଥିବା ସମସ୍ତ ଖାଦ୍ୟ ଉତ୍ପାଦର ଉତ୍ପାଦନ, ପ୍ରସ୍ତୁତି, ପ୍ୟାକେଜିଂ, ସଂରକ୍ଷଣ, ପରିବହନ, ବାଣିଜ୍ୟ ଏବଂ ବିକ୍ରୟ ଉପରେ ସମ୍ପୂର୍ଣ୍ଣ ନିଷେଧ ଘୋଷଣା କରିଛନ୍ତି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଏବଂ ଭାରତୀୟ ଖାଦ୍ୟ ସୁରକ୍ଷା ଏବଂ ମାନକ ପ୍ରାଧିକରଣ (ଏଫଏସଏସଏଆଇ) ଦ୍ୱାରା ଜାରି କରାଯାଇଥିବା ନିର୍ଦ୍ଦେଶାବଳୀ ପାଳନ କରି ଏହି କଟକଣା ଲାଗୁ କରାଯାଇଛି। ଏହି ପଦକ୍ଷେପ ଖାଦ୍ୟ ସୁରକ୍ଷା ଏବଂ ମାନକ ଆଇନ, ୨୦୦୬ ର ଅଂଶ ଭାବରେ ଖାଦ୍ୟ ସୁରକ୍ଷା ଏବଂ ମାନକ (ବିକ୍ରୟ ଉପରେ ନିଷେଧ ଏବଂ ପ୍ରତିବନ୍ଧକ) ନିୟମାବଳୀ, ୨୦୧୧ର ନିୟମ ୨.୩.୪ ଅନୁଯାୟୀ କାର୍ଯ୍ୟକାରୀ କରାଯାଇଛି।
ସ୍ୱାସ୍ଥ୍ୟ ଅଧିକାରୀମାନେ ଗୁରୁତ୍ୱାରୋପ କରଛନ୍ତି ଯେ ତମାଖୁ ଏବଂ ନିକୋଟିନ୍ ଯୁକ୍ତ ଉତ୍ପାଦଗୁଡ଼ିକ ମୁଖ କର୍କଟ, ଗଳା କର୍କଟ ଭଳି ଅନେକ ଗମ୍ଭୀର ରୋଗର ପ୍ରମୁଖ କାରଣ । ଏହି ପଦାର୍ଥଗୁଡ଼ିକ ପିଲା ଏବଂ ଯୁବକମାନଙ୍କ ପାଇଁ ବିଶେଷ ଭାବରେ ଗୁରୁତର ବିପଦ ସୃଷ୍ଟି କରେ। ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ଦ୍ୱାରା ବୁଧବାର ଜାରି ହୋଇଥିବା ବିଜ୍ଞପ୍ତିରେ ଏହି ନିଷେଧକୁ ଆନୁଷ୍ଠାନିକ ଭାବେ ଘୋଷଣା କରାଯାଇଛି। ଏକ ସାର୍ବଜନୀନ ଆବେଦନରେ, ରାଜ୍ୟ ସରକାର ନାଗରିକମାନଙ୍କୁ ନୂତନ ନିୟମ ପାଳନ କରିବାକୁ ଏବଂ ଏକ ସୁସ୍ଥ, ତମାଖୁ ମୁକ୍ତ ଓଡ଼ିଶା ଗଠନରେ ସକ୍ରିୟ ଭାବରେ ଅଂଶଗ୍ରହଣ କରିବାକୁ ଅନୁରୋଧ କରିଛନ୍ତି।
