ଆମେରିକାରେ ଘରୋଇ ଜେଟ୍ ଦୁର୍ଘଟଣାଗ୍ରସ୍ତ

ୱାସିଂଟନ: ଆମେରିକାରେ ଘରୋଇ ଜେଟ୍ ଦୁର୍ଘଟଣାଗ୍ରସ୍ତ। ଏକ ଘରୋଇ ଜେଟ୍ ଉଡ଼ାଣ ଭରିବା ସମୟରେ ନିଆଁ ଲାଗି ଦୁର୍ଘଟଣାଗ୍ରସ୍ତ ହୋଇଛି। ଆମେରିକାର ମେନ୍ ରାଜ୍ୟରେ ରବିବାର ସନ୍ଧ୍ୟାରେ ଏହି ବଡ଼ଧରଣର ବିମାନ ଦୁର୍ଘଟଣା ଘଟିଛି। ସ୍ଥାନୀୟ ସମୟ ପ୍ରାୟ ସନ୍ଧ୍ୟା ୭ଟା ୪୫ରେ ବାଙ୍ଗୋର ଅନ୍ତର୍ଜାତୀୟ ବିମାନବନ୍ଦରରେ ଏହି ଦୁର୍ଘଟଣା ଘଟିଥିଲା। ଆମେରିକାର ବିମାନ ନିୟାମକ, ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ ଘଟଣାର ସତ୍ୟାସତ୍ୟ ପ୍ରକାଶ କରି କହିଛି ଯେ ବିମାନରେ ଆଠ ଜଣ ଲୋକ ଥିଲେ। ଏଫ୍‌ଏଏ ଅନୁଯାୟୀ, ବିମାନଟି ଏକ ଯୁଗ୍ମ-ଇଞ୍ଜିନ୍ ଟର୍ବୋ-ଫ୍ୟାନ୍ ଜେଟ୍, ବମ୍ବାର୍ଡିଅର୍ ଚ୍ୟାଲେଞ୍ଜର୍ ୬୦୦ ଥିଲା। ଦୁର୍ଘଟଣା ପରେ ତୁରନ୍ତ ବିମାନରେ ଏକ ବଡ଼ ଅଗ୍ନିକାଣ୍ଡ ଘଟିଥିଲା। ଏହି ଘଟଣା ସହିତ ଜଡିତ ଜଣେ ସରକାରୀ ଅଧିକାରୀ କହିଛନ୍ତି ଯେ ଦୁର୍ଘଟଣା ପରେ ଘଟଣାସ୍ଥଳରେ ପ୍ରବଳ ନିଆଁ ଲାଗିଥିବା ଦେଖାଯାଇଥିଲା, ଯଦିଓ ଯାତ୍ରୀ ଏବଂ କ୍ରୁ ସଦସ୍ୟଙ୍କ ଅବସ୍ଥା ସମ୍ପର୍କରେ ଏପର୍ଯ୍ୟନ୍ତ କୌଣସି ସରକାରୀ ବିବୃତ୍ତି ଜାରି କରାଯାଇ ନାହିଁ।