ବୃନ୍ଦାବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ

ନୂଆଦିଲ୍ଲୀ : ରାଷ୍ଟ୍ରପତି ଦ୍ରୌପଦୀ ମୁର୍ମୁ ଆଜି ନିଜର ଗସ୍ତ ସମୟରେ ବୃନ୍ଦାବନର ପ୍ରସିଦ୍ଧ ସନ୍ଥ ପ୍ରେମାନନ୍ଦ ମହାରାଜଙ୍କୁ ଭେଟିଛନ୍ତି । ଆଜି ସକାଳେ ରାଷ୍ଟ୍ରପତି ‘ଶ୍ରୀ ହିତ ରାଧା କେଳି କୁଞ୍ଜ ଆଶ୍ରମ’ରେ ପହଞ୍ଚିଥିଲେ, ଯେଉଁଠାରେ ସେ ପ୍ରେମାନନ୍ଦ ମହାରାଜଙ୍କ ଦର୍ଶନ କରିବା ସହ ତାଙ୍କ ସହ ଆଲୋଚନା କରିଥିଲେ । ରାଷ୍ଟ୍ରପତିଙ୍କ ଏହି ଗସ୍ତକୁ ନେଇ ସମଗ୍ର ମଥୁରା-ବୃନ୍ଦାବନ ଅଞ୍ଚଳରେ ସୁରକ୍ଷା ବ୍ୟବସ୍ଥା ଅତ୍ୟନ୍ତ କଡ଼ାକଡ଼ି କରାଯାଇଛି । ସକାଳ ପ୍ରାୟ ୭:୩୦ ସମୟରେ କଡ଼ା ସୁରକ୍ଷା ମଧ୍ୟରେ ଆଶ୍ରମରେ ପହଞ୍ଚିଥିବା ରାଷ୍ଟ୍ରପତି ମୁର୍ମୁଙ୍କ ସାଧାରଣ ଜୀବନଶୈଳୀ ଓ ସରଳତା ସମସ୍ତଙ୍କୁ ଆକୃଷ୍ଟ କରିଥିଲା । ଏହି ସମୟରେ ପ୍ରେମାନନ୍ଦ ମହାରାଜ ରାଷ୍ଟ୍ରପତିଙ୍କୁ ବ୍ରଜର ମହିମା ଏବଂ ସେବା ଭାବର ଗୁରୁତ୍ୱ ବୁଝାଇଥିଲେ ।ସୂଚନା ଅନୁଯାୟୀ, ରାଷ୍ଟ୍ରପତି ନିମ୍ କରୋଲି ବାବାଙ୍କ ସ୍ମାରକୀ ମଧ୍ୟ ପରିଦର୍ଶନ କରିବେ । ସନ୍ଧ୍ୟାରେ ସେ ରାମକୃଷ୍ଣ ମିଶନ ସେବାଶ୍ରମରେ ଏକ ନୂତନ ‘ଅନକୋଲୋଜି ବ୍ଲକ’ର ଉଦଘାଟନ କରିବେ।ମାର୍ଚ୍ଚ ୨୧ ତାରିଖରେ ଗୋବର୍ଦ୍ଧନର ଦଙ୍ଗଘାଟି ମନ୍ଦିରରେ ପୂଜାର୍ଚ୍ଚନା କରିବା ପରେ ସେ ସାତ ମାଇଲର ପାରମ୍ପରିକ ଗୋବର୍ଦ୍ଧନ ପରିକ୍ରମା କରିବେ ଏବଂ ତା’ପରେ ନୂଆଦିଲ୍ଲୀ ଅଭିମୁଖେ ପ୍ରତ୍ୟାବର୍ତ୍ତନ କରିବେ ।